NGÖTÏNYÖ 3 - PIPÏLIA

¹ Werïnyu, mewutyeghö kirurutyenyan wölo ikomönchï mïkulöwungu kinetutkochan.

² Ompöwölo tösunyi chane osis kïchangit nko könyis nko kalya.

³ Mekany kïweghenin konyït nko man rötinö katïngu aikirchï mïkulöwungu,

⁴ atenyorunö nyu chömchin nko kikusat nyo karam, ompö tawu Tororöt nko pich.

⁵ Tighenö kegh ECHOTYON ompö mïkulöwungu kïmïkul, ametwayta kegh kinonutköku kegh.

⁶ Twaytena kegh nyinte ompö ngaleku löwïr, tökulïtit nyinte ortïneku.

⁷ Mesïtyï kegh ngöghomnyö nyinte onkït, konyïtö ECHOTYON aimala kegh ghöyityö.

⁸ Lïku sakïtyan ompö portöngu akuchichim koyeku.

⁹ Konyïtö ECHOTYON ompö tïkuku nko ompö poretayi tïkuku löwïr,

¹⁰ kinyïghitöy pagh töpotoniku löwïr, inyorunenyi dipay* cho potyininyi wölo irorchini.

¹¹ Werïnyu, mesas sito ECHOTYON amesïnyara ompö chilatenyi.

¹² Ompöwölo köröy kong ECHOTYON chi anka tïkwïl nyo chomöy, le wölo idoy papo werïnyi nyo chömo kegh.

¹³ Soyönote chi nyo tïng ngöghomnyö nko chi nyo nyoru pköchin,

¹⁴ ompöwölo tïlöy kinyiwutyenyi nyo pö ngöghomnyo ropïyen akï wow tösunötenyi kïtïl koltin.

¹⁵ Pö kinyiwut tya ngöghomnyö kïtïl koghïn cho pö olyot nyo wow akïtïlöy tïkwïn löwïr cho pïrchini chi lö tonyorï.

¹⁶ Mi osiswö cho chang ewunyi nyo pö tagh, akïmi sïkönöt nko konyït ewunyi nyo pö löt.

¹⁷ Pïchighöch ortïna ngöghomnyö nyoman akï pö ortïnechi kïmïkul kalya.

¹⁸ Ket pö söpon ngöghomnyö ompö chane cho rïpöy lasiny akusoyönote anka tïkwïl nyo nomnyotoy nko nyinte.

¹⁹ Kitor ECHOTYON ngwïny ompö ngöghomnyö akïkatkat yïmwöy ompö chïreryenyi.

²⁰ Kigh chïreryenyi lalwatïn kïghya pögh akïropönï poltoy röyön.

²¹ Werïnyu, irip ngöghomnyö nko pköchin lasiny amekany kichïwitenin,

²² atökïlïkwï söpon ompö mïkulöwungu amina kegh karïn ompö kat.

²³ Iwesïtonyi nyu ompö kalya, amelö kwötinyi kigh.

²⁴ Ato itöpenyi ngwïny, motyonenyinye, ato irïwönyi, kïnöminyi rïwonto nyo anyïn.

²⁵ Meway otyogh nyo miru anta ato itï kiwurata mwokïyis.

²⁶ Ompöwölo lïku ECHOTYON kikönötengu akïripöy nyinte keltöngu tömökïnam ngöghöp.

²⁷ Metagha kingörokut chane cho mïchini kengarak, ato itïng owesyö nyo igho.

²⁸ Melenchï pöröryengu “Wïyö nko asïyech tokonïn,” akwanyï itïngetenyi ye kini kömököy.

²⁹ Metötyï pöröryengu ghöyityö nyo möngöy nko nyï ompö kalya.

³⁰ Momöl kegh nko chi kwïle ato melö kewunyi kïgh nyo gha.

³¹ Metup kong pkatyan amerïp arenyi anka tïkwïl,

³² Wököy ECHOTYON chï nyo le penyin, wölo chomnyegho nyinte pipö man.

³³ Mi chïpöto ECHOTYON kö pö mwokïyon wölo soyönöy nyinte möngo chi pö man.

³⁴ Rotöy nyinte pich cho le karatak wölo töni pöropchö pich cho ipöy kegh ngwïny.

³⁵ Nyoru konyït pich cho ngöghomöch, wölo nyoru arasï sölwöy.