NGÖTÏNYÖ 25 - PIPÏLIA

¹ Chete tïkwïl kï ngötïnyö cho pö Solomon, cho kikir pipö Esekia pöytoghinto Yuda.

² Ororyo Tororöt kï kïwïny tïkwïn wölo ororyo pöytoghï kï kïsakas tïkwïn.

³ Kïle wölo lowtö yïmwöy nko ngwïny, anta kenkïtï lö low kïtya toyo ngwïny, kïlenyoni tïkwïl mïkulis pö pöytoghï, melö kinkïtu.

⁴ Mwatïteghena silpa sïmnyon, atökwigh kitongintö kölöwö nyo tïlil,

⁵ Nateghena mwokïyon ompö tawu pöytoghin, tökïchïchïm nyo pö paytagh ompö man.

⁶ Mepartegha kegh tawu pöytoghin anta ighyongö ato tïpisot pich cho echön,

⁷ ompöwölo kaykay kemwowun lö, “Tokunö,” kïtïl kemïnïngitïn ompö tawu pöytoghin, nyo kesïweghenyi konyiku.

⁸ Mesörchï ip ngal ka kirwok ompöwölo ilïkunenyi ne ato le söröm, ato ipunyi pöröryengu arasï?

⁹ Orwokö nko pöröyengu opïn, amanganyta ngalekwo,

¹⁰ tömötöp chi nyo lïmokwa ntökïkonekwa arasï, akïmewonyotnye arasingu.

¹¹ Karkegh ngölyon nyo kakïmwowï ato mïchini nko akwa koltin cho kakïtötyï wïsino silpa.

¹² Kiteghchin nyo ngöghom ompö chi nyo teröy ngal, kïlenye kaymorïsya koltin anta tïkwïn cho kikïmina koltin cho pïchighöch.

¹³ Chi nyo kïyontoy nyo ghanate, kïlenye köghïtïn pö powöy ompö osiswo kasa, ompö pich cho yontoy nyinte, ighöy mïkulisko echotkachi kïngörekyö.

¹⁴ Pich cho yomisöy kutötö ropöw ametötoy, kïlenye poltoy nko yomat cho puryö rop.

¹⁵ Muko kekïnkïn pöytoghin ompö mïkukönöt, akumuköy ngölyon nyo talase kuriy kowö.

¹⁶ Ato inyoru kumat iyam nyo mïchininyi kïpoto, tömepïghyö aingunta.

¹⁷ Metyak koto pöröryengu kïnomnyö, tömaghach nyinte ompö nyi akïghöchinyi.

¹⁸ Karkegh chi nyo söwintönchini pöröryenyi ompö putintön nko runku poryot anta chok anta kotöt nyo ngatip.

¹⁹ Ato kikotön chi nyo puryö kighanat osiswo nyarïl, kïlenye kelat nyo kömïrö anta kel nyo kachit.

²⁰ Karkegh chi nyo tumchini chi tumwöy nyo mi nyarïl, nko chi nyo ngwïsöy sïra ompö asispa kaghïtan akïlata mo nyo kakitö paryan.

²¹ Ato amate kömöy punyontengu, ipagh anta ato amate maral, itö pögh kïgha,

²² ompöwölo irïrukyinenyi ngeset mötïny, atökïkonïn ECHOTYON ropöwon.

²³ Ipu rop yomat nyo kutuno okumpö löt, kwipu lenyoni ngalyap nyo swomsïyi tokochu sïngiryö.

²⁴ Kaykay kemang luchpa kö ato le monchök, kïtïl kemang kö nko korka nyo le syölin.

²⁵ Lata pögh cho köghïte ompö chi nyo amate maral, lökoy cho karamach cho pkono kor nyo low.

²⁶ Chi pö man nyo rïpöy ngala mwokïyon kïlenye kompa pögh nyo le norayon anta kö pö pögh nyo kakïtïntïr pöghe.

²⁷ Melö karam kyam kumat nyo wow, merokonye tïkwïl kïyörchï chi kegh kwolöt nyo wow!

²⁸ Karkegh chi nyo mötïng pïröt nko kanasyan nyo kakïwir lö wanka.