NGÖTÏNYÖ 2 - PIPÏLIA

¹ Werïnyu, ato itakanyi ngalechan, aikaman kirurutköchan lasiny,

² aiköpchï yit ngöghomnyö aiwaghach mïkulöwungu kïnyorï kinkïtöt.

³ Owöy, ato isomonyi kekonïn pköchin aingany kutingu tenyorunö kinkïtöt.

⁴ Ato iyaranyi ngöghomnyö le silpa, aiyar le kïgh nyo pö komönut nyo wïngate.

⁵ Inkïtunyi nyu lö kewagh ECHOTYON kï ne, ainyorï chïreryo Tororöt.

⁶ Ompöwölo tötoy ECHOTYON ngöghomnyö, ngwïno chïreryö nko pköchin wölo mi ECHOTYON,

⁷ komönchini pich cho tenote ngöghomnyo man, longa nyinte ompö chane cho pö man

⁸ akïripöy ortïna man akïrïp ortïneko pikachi cho tïlilöch.

⁹ Atenkïtunö nyu man nko tïlilïn ainkïtï kïgh nyo roko ompö or anka tïkwïl nyo karam.

¹⁰ Ompöwölo ngwïnchininyi ngöghomnyö akwigh söpontöngu kïngarak.

¹¹ Ripinyi ngöghomnyö akukomöninyi pköchin,

¹² akïsöruneninyi ara ghöyityö nko pich cho ngölonöy ngal cho chumpönote,

¹³ cho pïstoy ortïn cho pö man akïrïp ortïna tuwïn

¹⁴ cho ngörekyot kwighöy ghöyityö akïmïlöy kipotöto ngokï

¹⁵ pich cho kïnuröch ortïna, cho ghach ortïnekwa.

¹⁶ Akïsöruneninyi chepkartayan korka, nyo kïnkïno pich ngalechi.

¹⁷ Nyo pïstoy kongenyi nyo kinörchinö tïkwïl akïwutyeghö kiyomisöto Tororötïnyi

¹⁸ töngöy konyi ngwen akïpetöy ortïnechi kutöngöy meghat.

¹⁹ Möminye chi ompö akonga nyo wechini nyinte nyo mïlo, anta nyorï ara söpon.

²⁰ Kïlenyona erïpenyi ara pich cho karamach airïp ortïna pich cho pö man.

²¹ Ompöwölo möngöy kor pipö man akudongöy kor pich cho tenote.

²² Wölo kipuktoy mwokïyis ompö ngwïny akewany pkatis ompö ngwïny.