NGÖTÏNYÖ 19 - PIPÏLIA1 Kaykay meywon nyo kïltït arenyi, kïtïl chi nyo mörkelöch ngala akï sölwö. 2 Melö karam kïtöpö chi kïpuryö chïreryö, akïlelöy chi nyo sörchini ngal. 3 Ato par chi sölwontönenyi, kurïp kïnörekyï ECHOTYON. 4 Ipu mökosyö kongot cho relach cho chang, wölo pökodoy meywon kongenyi. 5 Möwetanye kwïle amönyorï sitöt söwin nyo le putin, amöchïwïtönye chi nyo mwoghöy putintön. 6 Möröy pich cho chang köromnyo chi nyo le pöropchon, akï chomnyegho chi anka tïkwïl chi nyo tötöy tïkwïn. 7 Reyöy meywon werkökwa löwïr, lowöchitu nyu nyoman kongotichi ompö nyinte! Kïrkegh kïrïpata akïsoghsoghotoy chane, makïnyorunye chane. 8 Chömöy kegh chi nyo yöröy ngöghomnyö, nyoru perur nyinte nyo rïpöy pköchin. 9 Möwetönye kwïle mönyorï sitöt söwin nyo le putin, akupotöy chi nyo mwoghöy putintön. 10 Melö mïchini sölwö kïmakosit, amelö mïchini sekeyon kïpayta pöytoghï. 11 Melö nyoghöy kïnöreköy chi nyo ngöghom, akï ororyenyi kïpïstö mayang lelut. 12 Karkegh nörekyo pöytoghin nko tïlöto ngotïny, wölo lenye köromnyenyi röyön ompö sus. 13 Nyarïl worö nyo le sölwö ompö kwanta, akïlenye korka nyo nchïsöy kanïsan. 14 Nyoruno chi tïkwïn nko sïkönöt katangwa, wölo nyorchini chi ECHOTYON korka nyo ngöghom. 15 Töni chi sosönöt rïwon nyo nïkis, wölo omöy kömöy chepkowö. 16 Ripöy chi söpontanyi nyo rïpöy kirurut. Meghöy chi nyo melö yongöy wölo töptoy. 17 Pösönchini ECHOTYON chi nyo syonchini mey, akïghokchini ECHOTYON nyinte ompö ighisyenyi. 18 Pïrö werïngu otini tökïmi kikönötö, Wölo memung ompö mirmiryö. 19 Nyoru sitenyi chi nyo mïrmïr, ompöwölo ato isörunyi nyinte, kïtelimenyi ngat ghete nyinte. 20 Köpchinö yit kiruröt aicham kinetut, atenyorunö ngöghomnyö ompö osis cho pkonöy. 21 Tïng chi tötut chi cho chang ompö mötïnyi, wölo machata ECHOTYON nyo rïntoy. 22 Chömo kegh pich chi kighönöy, akï kaykay meywon kïtïl putin. 23 Ipu kiwaghata ECHOTYON söpon, akï nyinte nyo tïng kïpöghisïyi nyo karam, akï melö itini nyinte kïgh nyo gha. 24 Lutöy chepkowö egh otupenyi, wölo puryö kïgh nyo töni kut. 25 Mungö pkatyan atökïchïkan sölwö, pïrö chi nyo tïng pköchin atökïtasa chïreryenyi. 26 Ipu lalïyanat nko arasï worö nyo wököy kwanta akïyon kame, 27 Werïnyu, metagh tera kiruröt, tömepot menyoru chïreryö. 28 Sösöy kirwok söwin nyo puryö kinyiwut, akïnyïkïwöy mwokïyis ngokï. 29 Kikemutyï kichïmpisï kirwok, nko sitit cho kumungo sölwöy. |
©Bible Society of Kenya, 2019
Bible Society of Kenya