NGÖTÏNYÖ 13 - PIPÏLIA

¹ Köpchini yit worö nyo ngöghom kinetutko kwanta, wölo mölïmönye mïnin karata kong.

² Nyoru chi nyo karam cho onyïn, akwompö ngaleko kutinyi cho karamach, wölo poryot kwïle nyo nyo nyoru lïsï.

³ Ripöy söpontanyi chi nyo ripöy kutinyi, wölo nyoru kiwurat nyo yitïtoy ngalechi.

⁴ Pïrchini kïgh chi nyo le sosö wölo mönyorunye kïgh, wölo pïghyongöy chi nyo kilöy kegh.

⁵ Lilöy kïgh chi pö man putintön, wölo ighöy mwokïyon tïkwïn cho ghach cho pö arasï.

⁶ Ripöy man chi nyo tenate arenyi, wölo kikölöngoy mwokïyon.

⁷ Mi chi nyo ighöy kegh le sïkön amelö nyu tïng kïgh, kïmi anka nyo ighöy kegh le meywon wölo nyu sïkön kïtïl.

⁸ Tyoköy chi kegh ompö sïkonötenyi, wölo mötïnye meywon kïgh nyo tyoko kegh.

⁹ Ngörököy löpoyïn pö chi pö man, wölo kimisöy kitömöwonto mwokïyon.

¹⁰ Ipu menotön poryot kwïle, wölo tïng ngöghomnyö chane cho lïmöy ngal.

¹¹ Chïchuköy kïgh sïkönöt nyo kakïnyorï lawel, wölo tösisyot cho pö chi nyo pösöy kï ngörï.

¹² Ighöy kikönötö nyo möpïntönye mïkulögh kuchir, wölo lenye möchutyö nyo köpïntö ket pö söpon

¹³ Anka tïkwïl nyo sösöy ngölyon kwipchini kegh kiwurat, wölo kïropchini chi kïgh nyo konyïtöy kirurut.

¹⁴ Kompa pögho söpon, kinetutyo chi nyo ngöghom, nyo chïwïtegho chi ngöghöpu meghat.

¹⁵ Ipu chömchin pköchin, wölo itöy kiwurat ara pich cho puryö kighanat.

¹⁶ Pöghisyegho pköchin chi anka tïkwïl nyo chïrer, wölo portoy sölwö sölwontönenyi.

¹⁷ Ipchini pich tapan kiyoktoghintö nyo gha, wölo ipu sopön kiyoktoghintö nyo ghanate.

¹⁸ Nyoru chi meywontön nko arasï nyo töghöy kepïr, wölo kïkonyïtöy chi nyo köpchini yit karata.

¹⁹ Anyïn machata nyo kakipuntö ompö söpon pö chi, wölo ghöchini sölwöy kïpïstö ngokï.

²⁰ Ngöghomitu chi nyo westoy nko pich cho ngöghomöch, wölo wongu cho nomnyotoy nko sölwöy.

²¹ Rïpotoy ghöyityö mwokïyis, wölo kikerchini pipö man köromnyö.

²² Pïsyini chi nyo karam tïkuchi moneko löwïr, wölo kïrorchini sïkönöto mwokïyon chi pö man.

²³ Rïröy para meywon nyoman nyo kangor, wölo ato möminye man, keserseröy tïku.

²⁴ Nyoröy chi werïnyi nyo mömungönye, wölo nyinte nyo chömöy werïnyi kïpïröy nyinte lachïs.

²⁵ Nyoru chi pö man cho mïchini, wölo melö pïghyongöy mwokiyon.