NGÖTÏNYÖ 10 - PIPÏLIA

¹ Ighöy worö nyo ngöghom kwanta kïngarak wölo wonguno kame worö nyo le sölwö.

² Menyiwunye kïgh tïkwïn cho kïnyoru ompö ortïn cho ghach, wölo söru man chi ompö meghat.

³ Melö pïsyini ECHOTYON chi pö man kukar, wölo ngisöy machata mwokïyis.

⁴ Ipu chi nyo le chepkowo meywontön, wölo ipu sïkonöt chi nyo kilöy kegh.

⁵ Ngöghom worö nyo ghömïtöy paghechï osiswo kasa wölo ipu arasï worö nyo rïwöy atay kïkösisïyi.

⁶ Nyoru kisoyönöt chi pö man, wölo körtoy ghöyityö kuti mwokïyon.

⁷ Kenan pipö man kï kisoyönöt, wölo potöy kaynata chemwokïyon.

⁸ Rïpöy kiruröt chi nyo ngöghom ompö mïkulögh, wölo wïröy sölwö nyo ngölonöy kïtïkon.

⁹ Westoy chi nyo karam ompö man, wölo kinkïtu chi nyo masteghate ortïnechi.

¹⁰ Ipu kömpölelyö chi nyo pïropïroy konyïn, wölo ipu kalya chi nyo köröy ompö nyakanat.

¹¹ Kö pö pögho söpon kuti chi pö man, wölo kortoy ghöyityö kuti mwokïyon.

¹² Ngetöy kireyata poryot, wölo körtoy chomnyogh lelut löwïr.

¹³ Kïnyorchini ngöghomnyö kuti chi nyo tïng pköchin, wölo mïchini sitöt chi nyo mötïny pköchin.

¹⁴ Roröy pich cho ngöghomöch chïreryö, wölo ipu kuti sölwö kiwurat kïlekïtit.

¹⁵ Sïkönöto chi nyo le sïkön kï longenyi, kiwonyogh pö mey kï meywontönengwa.

¹⁶ Töngöy ighisyo chi pö man söpon, kutöngöy cho pö mwokïyis ngokï.

¹⁷ Mi ara söpon chi nyo chomöy kepïr, wölo potöy chi nyo töghöy chilat.

¹⁸ Chi nyo kortoy kireyat kï putin, akï sölwö chi nyo ngölonöy riri.

¹⁹ Mösirnye ngokï ato changit ngala, wölo ngöghom chi nyo pïröy kegh.

²⁰ Karkegh kuti chi pö man nko kari Silpa cho pïchighöch, amenyiwunye kïgh mïkulöwu mwokïyon.

²¹ Pöghöy pich cho chang kuti chi pö man wölo meghot mwokïyis ompöwölo melö tïng pköchin.

²² Ighöy chi kisöyönöto ECHOTYON kïsïkönon amelö töstoy kiwongunöt.

²³ Ighöy sölwö kïgh nyo gha le pirö, wölo ngörekyö otöp nyo karam ompö chi nyo ngöghom.

²⁴ Ngwïnchini mwokïyon kini wöghöy nyinte, wölo kitöni cho pö man möchutkökwa.

²⁵ Weröy mwokiyon le pïchpïch, wölo chïchïmöy chi pö man kokay.

²⁶ Kïle wölo idoy siki kelat nko wölo idoy ighöt konyïn, kïlata nyoni chi nyu pïrönotyon ompö cho yoktoy chane.

²⁷ Tösöy osiswo chi kiwaghata ECHOTYON wölo kichïchuköy könyiswo mwokïyis kingörïngit.

²⁸ Lïku kikönöto chi pö man ngörekyö wölo lïku kwïle kikönöto mwokïyis.

²⁹ Ghïpöwon nyo tïghume ara ECHOTYON ompö chi nyo tïlilöch ortinechi, wölo wongöy ECHOTYON mwokïyis.

³⁰ Melö timtimöy kïgh chi pö man wölo mömöngöcha mwokïyis ngwïny.

³¹ Ngwïno ngöghomnyö kuti chi pö man, wölo kitöghöy ngalyap nyo masteghate.

³² Nkït kuti chi pö man kïgh nyo chömunote, wölo potote kuti mwokïyon.