NGONGUT 17 - PIPÏLIA

¹ Atolapay kungwïn akong ompö malaykenichay le mut nko odeny kitïng pakulin mut nko odeny akïlenchanïn, “Nyonö atoporun wölo kinyöriltoy kong cheporesyantanay wow, nyoni kï kanasyantanay wow kikïtek wölo lekïto lalwatïn cho chang.

² Kigh pöytoghi ngwïny cheporesnan nko nyinte akïtömesyö pipö ngwïny ompö kumiko cheporesnanenyi.”

³ Atolapay kumïtanïn Mïkulögh ntatan surkwen. Osöchan wölini korka nyo kitöpo paraku tyony nyo pïrir nyo kikikir kaynötut pö kimwagh portanyi kïmïkul. Kitïng tyonyoni mötöw mut nko odeny nko kuy taman.

⁴ Kilach kokononi sïro cho lata munyantengwa akwa lamay nko cho pïröch, akupïchigha kegh koltin nko karïn cho pö olyot nyo wow nko lulun. Kinama ewunyi kikompa nyo pö kikwigha koltin akï nyo kinyïghï tïkwïn cho lilöy pich nko cho le sïmnyon, cho kipka cheporesnanenyi.

⁵ Kikikir tokochunyi kaynat nyo pö wïnga nyo lentöy, “Papilon nyo Wow, yoto cheporestin löwïr nko ighisyewut löwïr cho lilöy pich ompö ngwïny.”

⁶ Atolapay asïwan lö kitamasa kokononi kisön pö pipö Tororöt nko kisön pö pich cho kikïpar ompöwölo kimöpïstönye kïrïp Yeso. Otini kyasïwan kokononi, atanganyan nyoman.

⁷ Kïtepanïn malaykayantanay lö, “Ompö ne tetöngönyenyi? Omwowunyi kïgh nyo wïnyate ompö kokononi nko tyonyoni tïng mötöw mut nko odeny nko kuy taman kösönöy nyinte.

⁸ Ki söpote osiswe walaka tyonyoni kesïwenyi, wölo melö tökïsöpote ye. Karich ye kïngetunö nyinte ngwen atökenyar. Töngönyöy pich cho möngöy ngwïny cho tomöcha kekirchï kaynötutkökwa kitapu söpon kïngeta otini le towunöto ngwïny töngönyöy chane ato sïwa tyonyoni ki söpöy osiswe walaka akïma, akwanyï ye söpöy ngat!

⁹ “Möchöy ye nyu ngölyontonï chi nyo ngöghom akïtïng pköchin. Mötöwechoni le mut nko odeny, kï kutïngkot mut nko odeny cho töpo korkononi. Mötöwechoni tïkwïl kï pöytoghï mut nko odeny.

¹⁰ Akwompö pöytoghichoni, kikuwonyö cho le mut, kïtökïmi anka kïpöytoy, kïtomönye kwitï nyinö anka. Akwotini ketï, pïsini Tororöt kïpayta nyo tangogh.

¹¹ Kïkany tyonyay ki söpöy osiswe walaka wölo melö tökïsöpote ye, kï pöytoghinteto mut nko sömök aki akonga ompö pöytoghichoni pö tagh le mut nko odeny akïmi nyinte kïwetöy atökeyar.

¹² “Kuyechay le taman kesïwenyi, kï pöytoghï taman cho tomöcha kutor kïpayta, wölo kitöni chane owesyö nyo pöytoy nko tyonyoni ompö sa akonga.

¹³ Tïngeto pöytoghichoni keröt akonga kïtaman akïchömöy kutöni tyonyoni owesyengwa nko wowïntöngwa.

¹⁴ Poryegho pöytoghichay nko tyonyay Wawa Kech, wölo rïntoy Wawa Kech nko kïlankachi cho kikur akughönote, ompöwölo Echotyonto echot nyinte, akï pöytoghinto pöytoghï.”

¹⁵ Atolapay kïlenchanïn malaykayantanay, “Pöghechanye kisöchinyi atanye kitöpo chepores, kï söpïchis pö pipö koros löwïr nko punton löwïr nko kutïw löwïr.

¹⁶ Reyöy cheporestanoni kuyechay le taman nko tyonyoni kisïwenyi. Chengöy chane cheporesnoni sïro nko kïgh anka tïkwïl nyo tïng akïpïstö nyinte kïchïrut atolapay kwam panyechi akïpela ma portanyi lömïs.

¹⁷ Ompöwölo kitö Tororöt mïkuliskökwa machat kupuntö kerötenyi, otini kichomnyechï chane kutö owesyo paytagh tyonyoni ntökïtenö kusïlta keröto Tororöt nyo kimwa.

¹⁸ “Akï kokononi kisïwenyi kï kanasyantanoni wow, akï nyo pöytoy pöytoghintenyi pöytoghi ngwïny löwïr.”