NGONGUT 15 - PIPÏLIA

¹ Atolapay asïwan kiporunöte anka ompö yïm, kiporunöt nyo wow akï pö töngönchin. Kimi malayken cho le mut nko odeny cho ki acheytangwa kwipchï ngwïny kinyörilut mut nko odeny cho pö söröm, cho lïtitöy nörekyo Tororöt.

² Atolapay asïwan kïgh nyo lata nanampa kiyo nyo kikikulkulyö nko ma. Asïwan tïkwïl pïchanya kirïnta tyonyanye nko körkeyïntanyi akï nyo kikïmwowunö kaynenyi ompö nampa. Kighyongo pïchoni nanampa kiyo akinömöy pïkantis cho kitö Tororöt.

³ Kimi chane kïtumöy tum pö Musa, mötworinto Tororöt nko tum pö Wawa Kech kïlentöy, “Echotyon Tororöt Kimuktoghin, wechï echön akï pö töngönchin ighisyewutköku! Nyi nyo ichï pöytoghinto punton löwïr, tenote akï pö man kïtya ortïneku!

⁴ Ekï ngo nyo mewöghinyinye köny? Akï ngo nyinte nyo töghöy lö taparta owesyengu? Nyi onkït nyo ichï tïlil. Pkonöy puntonï lapay kïsoghinyi, ompöwölo rumteghote ighisyewutköku cho tenote ompö chane löwïr.”

⁵ Otini kimuchö, asïwan lö kiyata Kö pö Tororöt nyo mi yïm akimi ema kiporunöto Tororöt orinyi.

⁶ Kïlïtunö Kö pö Tororöt malaykenichay le mut nko odeny chay kipchini ngwïny kinyörilutchay le mut nko odeny. Kikilokyï chane sïro cho relach löka akitïng anankis cho kikïnöpchï koltin ompö töketwekwa.

⁷ Atolapay kutö akong ompö tyonchay le angwan sötote malaykenichoni le mut nko odeny pakulino koltin mut nko odeny cho kinyïghï nörekyo Tororöt nyoni söpöy kokay nko kokay.

⁸ Kïnyïghï ighöt Kö pö Tororöt nyo kingwïn ompö ororyö nko owesyo Tororöt, akimöminye chi nyo kimï kïlït Kö pö Tororöt ntökïtenö kuwonyö kinyörilutchoni le mut nko odeny cho kipï malaykenichoni le mut nko odeny.