NGONGUT 14 - PIPÏLIA

¹ Atolapay asïwan Wawa Kech kughyongo kutïng pö Sayon* nko pich 144,000 cho kikikirchï tokochwekwa kaynata Yeso nko nyo pö Kwanta.

² Alïman ompö atoni kut nyo ngwïno yïm, kut nyo lata kighumötö puseryon nyo wow akïlata tïlöto ilat nyo wow. Kilata chöghötononi kyalïman nyo pö pich cho pïtöy pïkantiskakwa.

³ Kughyongo pïchoni le 144,000 tawu ngacharu paytagh nko tyonchoni le angwan sötote nko poyichoni. Kimi pïchoni kïtumöy tum nyo rel, tum nyo kimemïnye chito anka kunet kegh kïpoto chane. Akï pïchoni opïn ompö ptangengmötin kïmïkul cho kikïsörunö ngwïny.

⁴ Pich chane cho kikïrö kegh sïmnyontöno cheporesnan, ompöwölo ki kïltïte chane. Mi chane kïrïpöy Wawa Kech wop anka tïkwïl nyo wetöy. Kikïsörunö chane kwenu ptangengmötine walaka, akï chane cho kïnyoghöy keropchini Tororöt nko Wawa Kech.

⁵ Kimörumunönye putintön kutïwekwa akimötïngetöcha chane lelut nyonikïny.

Malayken sömök

⁶ Atolapay asïwan malaykayante anka nyo kipilöy kïmïröy poltoy akitïng Lökoy cho Karamach atökwomchï pipö ngwïny, punton löwïr nko pich lapay, kutïw löwïr nko pipö koros lapay!

⁷ Kïmwa nyinte ompö kut nyo wow lö, “Okonyïtö Tororöt, asal töroryenyi! Ompöwölo ketïta ato rwokyini nyinte pipö ngwïny. Asagha nyinte nyini kigh yïm nko ngwïny wölo tïyame nko nanam nko kori pöghon!”

⁸ Kirïp malaykayanteto odeny nyay pö tagh akimi kïlentöy, “Kikïrul! Kikïrul Papilon nyay Wow! Nyinte nyini kigh pipö punton löwïr kïgha kumichi, kumïn cho ngwonöch cho pö cheporesnanenyi!”

⁹ Atolapay kïrïp malaykayanteto sömök malaykenichay pö tagh, akïlö ompö kut nyo wow, “Anka tïkwïl nyo soghöy tyonyoni nko körkeyïntanyi akïcham kïtak macheyunyi ompö tokochunyi anta ewunyi pö tagh,

¹⁰ kïgheghöy chichoni dipaypa* nörekyo Tororöt, cho matasa chi pögh ekeyin kikompeto nörekyenyi! Kinyörilo chichoni ma, mapa koghïn cho nöghsot ompö tawu malayken cho tïlilöch nko Wawa Kech.

¹¹ Pusöy parak kokay nko kokay igho mayoni kinyörilo chane kong. Nyoru nyarïl nyo möngötöy, pöghet nko nangat pïchoni soghöy tyonyoni nko körkeyïntanyi nko cho toköy macheyuto kaynatenyi.”

¹² Akwompö choni, mïchini kïmïkukön pipö Tororöt. Choni kï chane cho rïpöy Kirurut pö Tororöt amötomtomön kughönöy Yeso.

¹³ Atolapay alïman kut nyo ngwïnö yïm nyo kilentöy, “Kira lö! Soyönote pich cho meghyot kïngeta ye kïtas tagh, kïpöghisyechini Echotyon!” Kuyokyï Mïkulögh lö, “Owöy lenyoni nyoman! Sïköy chane kimïny ompö kighotikwa, ompöwölo rïpöy chane ighisyewutkökwa.”

Ilo ngwïny

¹⁴ Atolapay asïwan lö kimi polta nyo rel atoni. Kitöpo kïgh poltononi nyo lata ptangengmöt nyo kitïng tenta koltin ompö mötïnyi nko rotwö nyo ngatip nyo kilo pagh ompö ewunyi.

¹⁵ Atoni nyu, kungwïna malaykayante anka Kö pö Tororöt* akïlenchï malaykayantanay kitöpo polta ompö kut nyo wow, “Nama rotwengu atetorö ilsyenö ompöwölo kikwitïta asispa ilö, akikïrïryö pagha ngwïny nyo kömïchï kel!”

¹⁶ Atoni nyu kïnam malaykayantanay kitöpo polta rotwenyi akwil ngwïny.

¹⁷ Atolapay asïwan malaykayante anka kungwïno Kö pö Tororöt nyo mi yïm akitïng nyinte tïkwïl rotwo ilö nyo ngatip.

¹⁸ Atolapay kungwïn malaykayante anka nyo kighyongtoy ma, kungwïna wölay kïpelo amöros akïmwochï ompö kut nyo wow malaykayantanay kitïng rotwo ilö nyo ngatip lö, “Nama rotwengu aitörunö mori sapipun cho pö ngwïny, ompöwölo kikïrïryö akwekwa!”

¹⁹ Kïlenyona kïnam malaykayantanay rotwenyi akïmutï akwa sapipun, akïwirchï chane wölo kïpïro dipaypa nörekyo Tororöt.

²⁰ Ketïkatïk akwechay pö sapipun kïpïrunö dipay ompö sanypa kanasyan. Kïpkana kisön könonay cho kimïlta kegh le puseryon nyo kirot kilomiten cho ngata 300 akï nyo kimuköy kïlït tany lö lïm.