NGONGUT 12 - PIPÏLIA

¹ Atolapay kïrumunö kïgh nyo pö töngönchin yïm, korka nyo kiloköy asis akukönoghöy kelyechi arawa. Kiloköy ompö mötïnyi tenta kokel cho le taman nko odeny!

² Kimirsïyi kokononi akwompöwölo kikikwitïta osiswechi cho pö lusyogh, kïrir ompö ngwonïn nko kichïr pö lusyogh.

³ Atolapay kïrumunö töngönchintö anka yïm: ntara wow akï pïrir nyo kitïng mötöw mut nko odeny nko kuy taman akimi tenta mötöwichoni löwïr.

⁴ Kuchutö töronkwenyi kareran akonga ompö sömök nyo pö kokel cho kimi yïm akutyorchï ngwïny. Kughyongö tawu kokononi kimököy kïlusïyi atökwam montö panini lawel kakïyi.

⁵ Atolapay kïyï kokonay monïng nyo le worö nyo pöyu punton löwïr ompö paytagh nyo körom nyo wurwuröy pungkachi. Wölo kimamnye ntaranay monïngay wölo kikipulchi akemït wölo mi Tororöt nko ngacharunyi nyo pö paytagh.

⁶ Kuperta kokonay kïwö wölo le surkwen wölo kökikïsötyï Tororöt atökeripö nyinte ompö osis 1,260.

⁷ Atolapay kïchöghö poryot yïm. Kïporyö Mikael nko malaykenichi, kïporyeghö ntaranay nko malaykenichi.

⁸ Wölo kikïrïnta ntaranay amökechömchïnye nyinte nko malaykenichi kïtöpï yïm.

⁹ Ketyorchï sany ntaranoni wow. Nyinte kï moroyonanya pö köny kikuro, Onyöt anta Oyin, nyanye kigh pipö ngwïny kïmïkul kwigh ngokï. Kikityorï nyinte kungwïn ngwïny nko malaykenichi löwïr.

¹⁰ Atolapay alïman kut nyo kitegho yïm nyo kilentöy, “Ketï ye nyu sörunöto Tororöt! Köngongwï ye Tororöt owesyenyi akuporï Masiyenyi owesyenyi! Ompöwölo kiketyorchï sanypa yïm nyinte nyanye kiwetöy tawu Tororöt, pöghet nko nangat kïmwotïtoy lö kalel tupchenicho.

¹¹ Kirïnta tupchenicho nyinte ompö kisön pö Wawa Kech nko ompö man nyo kisöwintönchï chane, ompöwölo kicham kïkonï kegh chane kïrkegh kutupuy kong meghat.

¹² Kïlenyona, ongörekyenö nyu yïmwöy nko akwa löwïr cho omitö wöloni! Wölo ochech ompö akwa cho omöngöy nko nanam! Ompöwölo körökï Onyöto kungwïn wöloni omitekwa akïnarekate tya, ompöwölo nkït lö kikïrich kuwonyö pöroyïn nyo muköy kwigh kïgh.”

¹³ Otini kisöwï ntaranoni lö kiketyorchï nyinte ngwïny, kutor kurey kokonay kiyï worö.

¹⁴ Ketö kokonay köpepoy odeny cho pö mötony nyo wow atömanyïl kupilchï wölo le surkwen. Kïripo nyinte wöloni könyis sömök nko nïsï akï wölo memukönye ntaranay kusus nyinte.

¹⁵ Atoni nyu kungunguna ntaranay kutinyi puseryonto pögh tökuchut kamanay

¹⁶ wölo kungarak nyinte ngwïnya nyo kiyata akïnyïkwïda puseryontonay.

¹⁷ Kïnörekyï nyu ntaranay kamanay nyoman, atolapay akïwö kïporyeghö piko orengwa cho kingötï. Pïchoni kï pich löwïr cho rïpöy Kirurut pö Tororöt akïsöwintönchini man nyo kingongchï Yeso chane.

¹⁸ Atolapay kughyongö ntaranoni sörömu nanam.