NGONGUT 11 - PIPÏLIA

¹ Atolapay kekonanïn techan nyo kilata lïkïp nyo kipimtoy akelenchanïn, “Ngeta aipim Kö pö Tororöt* nko ato kïpelo amöros, aiyit pich cho sogho Kö pö Tororöt.

² Wölo mepim kiroryenyi, ompöwölo kiketö wöloni pipö punton walaka kïtyakatyak Kanasyantanoni Tïlil aro cho le 42.

³ Oyontonan söwichu cho le odeny cho loköy sarankwachtin atökwamta ngölyonto ompö Tororöt osiswechoni le 1,260.”

⁴ Söwichoni le odeny kï ketichay pö arol nko tatïn cho le odeny cho ghyongo tawu Echotyonto ngwïny.

⁵ Ato töp chi anka tïkwïl kumukyï lö onyörilöy chane kong, kungwïno ma kutïwekwa nyo wuröy pungkökwa. Kïlenyona kïpöröy nyo mötïny chi anka tïkwïl nyo mukyini kunyörilöy chane kong.

⁶ Tïngeto söwichoni le odeny owesyö kïkar yïm maropan ompö osiswechoni mi chane kwomtoy ngölyonto Tororöt. Tïngeto chane tïkwïl owesyö kïwaghach pögho kori pöghon löwïr kïlïkwï kisön nko owesyö nyo tyorchini ngwïny sömewut cho wongöy pich le wölini kachamta chane.

⁷ Wölo otini kamta chane lökoyekwa kumuchö, kïporyö chane tyonyay ngwïno ngwen, akïrïnta akïpar chane.

⁸ Ghömu nyu atoni mïntïruch ortïna kanasyantanoni wow, wölo kikïwudochï Echotyontengwa kimurtöwon. Kïkuro kaynata kanasyantanoni Sodoma, anta Misri ompö körkeyïn.

⁹ Pkono pich koros löwïr nko ortïn löwïr nko puntoni nko kutïw löwïr, pkonöy kurosöy mïntïruchoni ompö osis sömök nko nïsï amelö chömchini ketïp.

¹⁰ Ngöreksot pipö ngwïny akïturonchö ompö megha pïchoni kwodeny. Ngörökyini akïropchï kegh ropöw ompöwölo kisus tya werkoyichoni kwodeny pipö ngwïny.

¹¹ Wölo nyini kipöghön osis sömök nko nïsï, kungwïna kimïny pö söpon wölo mi Tororöt akïlït oringwa atolapay kughyö chane. Kwotyö nyoman pich cho kisïwa chane.

¹² Atolapay kïlïm werkoyichay le odeny kut nyo wow nyo kingwïna yïm nyo kilenchï chane, “Apusuna wölï!” Kïpa chane kïlïtöy yïm ompö polta kïmi pungkökwa kïtopönöy.

¹³ Otini lawel, kurïngring ngwïnya tya nyo kiwur kareran akonga ompö taman nyo pö kanasyantanoni. Kimeghö pich cho le 7,000 ompö korïngringoni pö ngwïny. Kuwöghisyö pikö chinö köngötï tya akïsal Tororöt kïlentöy, “Wow kïtya owesyengu we Tororöt nyo imi yïm!”

¹⁴ Kewonyö ompö atoni nyarïlto odeny, wölo itu nyete ye lawel nyarïlto sömök!

Kontito mut nko odeny

¹⁵ Atolapay kïkut malaykayanteto mut nko odeny kontinyi, kuteghyeghö kutïwa yïm cho kilentöy, “Mi ye nyu paytaghpa ngwïny mori Echotyontencha nko Masiyenyi, akïpöytoy kokay nko kokay!”

¹⁶ Atolapay kïköpïghchï kegh ngwïny kïrïwotö mutïnekwa akïsagh Tororöt poyichay le 24, cho kitïpïyot ngöcherwekwa cho pö paytagh ompö tawu Tororöt

¹⁷ akïmwa lö, Kiyokucha nyi sörö, “We Tororöt Kimuktoghin, nyo imitö ye akimitö könyisyok! Ompöwölo kepöghisyeghenyi owesyengu nyo wow aitor ipayta!

¹⁸ Kinörekyö pipö punton kumes, Wölo kikwitïta asisto sïngiryengu, akwitïta asis nyo kirwokyini pich cho kimeghö. Kitïta tïkwïl ato iropchinenyi tïkwïn mötworiku ompö werkoy nko pich löwïr cho kikïlanyi nko lapay cho konyïtöy kaynengu, kö echön anta kö mïnkech. Ketïta ato kinyoröy pich cho nyoröy ngwïny!”

¹⁹ Atolapay keyat Kö pö Tororöt* nyo mi yïm, kesöchï Santuku Muma* ori. Atoni nyu kuryal lö chwatchwat akïtïl akurïngring ngwïnya akïropan nyoman kïchïnu takarïs.