NEEMIA 9 - PIPÏLIA

¹ Otini ketïta nyu asispa 24 ompö arawanoni, kïghamït kegh pipö Israel, akïkïrur akulak sarankwachtin akïnyïra kegh terït mötöw kuporï nyarïltangwa.

² Kïmala kegh pipö Israel pipö punton löwïr, kughyö chane akïkötö ngokikwa nko cho pö papotïnekwa.

³ Kighyö chane akesomönchï kitapu Kirurut* pö ECHOTYON Tororötïngwa ompö satïn sömök atolapay kïkötö ngokikwa ompö satïn sömök ngat akïsagh ECHOTYON Tororötïngwa.

⁴ Kughyongö atosïtote ato ghyongo pipö Lawi nko Yeswö nko Pani nko Kadmiel nko Syepania nko Puni nko Syerepiya nko Pani nko Yenani akïsagh ECHOTYON Tororötïngwa ompö kut nyo wow.

⁵ Atolapay kïlö pipö Lawi ompö Yeswö nko Kadmiel nko Pani nko Asyapneya nko Syerepiya nko Odia nko Syepania nko Petaya, “Oghyongö asal ECHOTYON Tororötïngwo! Asala nyinte kokay nko kokay. Nya kïsal chi anka tïkwïl kaynenyi nyo oror, kaynat nyo kwolote kïtïl perur nko sölut löwïr!”

Sowut pö nganytaghata ngokï

⁶ Atolapay kïsagh Esra lö, “Ichinyi ECHOTYON onkït, kighanyi yïm nyo pö yïmwöy nko kokel nko ngwïny nko tïkwïn löwïr cho mi ori. Akighanyi nanamtin nko tïkwïn löwïr cho mi ori. Ikomönenyi chane löwïr akï soghinyi söpïchis pö yïm.

⁷ Nyi ECHOTYON Tororöt nyo kikïl Apram aimïtuna nyinte Ur nyo pö Papilonia, atolapay iwaghakanyi kaynengu kïlïkwï Apraam.

⁸ Ompöwölo kisïwenyi lö kighöninyi nyinte kyamanyi muma* nko nyinte lö, itöninenyi monechi koro pipö Kanan nko koro pipö Ititi nko Amori, koro pipö Peris nko Yepusi nko Kirkasyi. Kepuntenyi ye nyu kiwalwalatengu, ompöwölo ipoyenyi man.

⁹ “Kisïwenyi nyarïlpa papotïnecha ompö Misri, aiterchinyi chane lokekwa ompö Nanam nyo Pïrir.

¹⁰ Kighchinyi kiporut cho chang nko tïpö töngönchintin Parao nko mötworichi nko piko korenyi löwïr, ompöwölo kisïwenyi wölo kichopta kong papotïnecha. Irïntenyi chane akwororit kaynengu nko ye.

¹¹ Kimuryenyi nanam ompö tawungwa, kwoghyö chane nanamay kïtïyame, aiwirchinyi pich cho kirïpöy chane nanam ori le kagh nyo kakïwirchï puseryon nyo wow.

¹² Kintöghoghchinyi chane ompö pchöri polta pöghet, ompö pchöri ma oghö atökutömchï chane ore nyo petöy.

¹³ Kirökunenyi yïm ngwïny kutïng pö Sinay aingölönchinyi chane, atolapay itönyi chane kirurut cho pö man, nko kinetutköku cho karamach.

¹⁴ Kiporchinyi chane Sapatotöngu* nyo tïlil aimwochinyi mwoghwutköku nko kikirutköku nko kirurutköku ompö Musa mötworintengu.

¹⁵ “Kipaghenyi chane makatina yïm kuwany kömöyungwa aitönönyi pögh cho kipkana ghat kïnuk maralungwa. Atolapay imwochinyi chane kïpa kïnam kor nyo kiwolwolchinyi chane.

¹⁶ Wölo kïmen papotïnecha akwoghïghitu mötöwöy, melö kicham kïter kirurutköku.

¹⁷ Kitagh chane kïterunyi ngaleku, amökïyangcha töngönchintinechanya kighanyi ompö kwenungwa. Wölo kwigh chane mötöwekwa kwoghïghitu atolapay kïkïl kintöghoghintengwa, kuyoda chane kutang sekeynön ngat ompö koro Misri. Wölo ichinyi Tororöt nyo pö lastagh nko pöropchö nko kisyonchin. Melö inörekenyi lawel wölo wow chomnyengu nyo pö kokay nko nyoni melö kipïstenyi chane.

¹⁸ Kïrkegh otini kighchï chane körkeyïn pö mogh akïlö, Tororötïngwa nyï nyo kimïtunenokwa koro Misri, akïchïpinyi chane tyo.

¹⁹ Wölo melö kipïstenyi chane ompö surkwen ompöwölo wow kisyonötengu. Amelö kinaka chane pchöri polta nyo kintöghoghchini chane ompö or pöghet nko pchöri ma nyo kipköngchini chane or oghö.

²⁰ Kitönönyi Mïkulöwungu nyo karam kunet chane, amelö kichïchukenyi chane mana cho kyomöy itönönyi chane pögh cho gheghöy.

²¹ Kipaghanyi chane könyis tömönut angwan ompö surkwen akï möminye kïgh nyo kirörchï chane. Melö kiwïryö sïrokökwa amökutucha kelyekwa.

²² “Kitönönyi chane pöytoghï nko pikökwa cho kimi söremwokökwa akïcheng koro Sion pöytoghinto Espon nko koro Ok pöytoghinto Pasyan.

²³ Kitasanyi monekwa kïchangit le kokel aimïtunyi ntökwit koronay kiyomisyinyi papotïnekwa kïcheng.

²⁴ Kïlenyona kïpa monekwa akïcheng koronay kïlïkwï nyingwa akirïntenyi pipö Kanan cho kipö korononi aitönönyi chane pöytoghikwa morikwa nko pikökwa kwida wölo kedoy.

²⁵ Kïnam kanastin cho tekote nko kor nyo akwagh, akïcheng korïn cho kinyïghï tïkwïn cho karamach nko kori pöghon cho kikïpal nko pareni sapipun nko keti arol nko keti akwa cho chang. Kwomisyö nyu kïpïghyö akïnöryö akïcham köromnyengu nyo wow.

²⁶ “Wölo kïpeny ngaleku akïtaghinyi akïpörchï patagh kirurutköku. Kïpar chane werkoyköku cho kichilöy tökuyokyinyi kegh Kichïpinyi chane kïnomnyö.

²⁷ Kïlenyona itönönyi chane mori pungkökwa rïntoninyi akuchopinyi kong. Wölo kïrirchinyi chane ompö nyarïltangwa, iterchinyi chane ompö yïm aitönönyi kintöghoghï cho kisörï chane ompö mori pungkökwa ompö kisyonötengu.

²⁸ Wölo otini kinyorï kalya, kwigh ngokï ngat, ipïstenyi kïrïnta pungkökwa chane akïpayta, wölo nyini keyokwï kegh akïrirchinyi, iterchinyi chane ompö yïm aisörunyi chane kïnyïl cho chang ompö kisyonötengu nyo wow.

²⁹ Kichilanyi chane tökuyokyï kegh kirurutköku, wölo kïtagh chane ompö menotön, akwigh ngokï kïpeny kirurutchoni cho ato rïp chi kïsöpöy. Kipörchinyi patagh ompö tighintön akwoghïghitu mötöwöy amökïterunyicha ngaleku.

³⁰ Kimïkukönönyi könyis cho chang ompö chane airirchinyi ompö Mïkulöwungu kuwerï werkoyköku, wölo kimöterchïcha chane kïlenyona itönönyi mori pipö punton.

³¹ Melö kipïstenyi chane anta iwang, ompöwölo wow kisyonötengu. Ichinyi Tororöt nyo pö köromnyö nko kisyonöt.

³² “Kïlenyona we Tororötïnyo nyo ichï wow, ichinyi awes, we Tororöt nyo kiwöghöy! Iripenyi mumengu nko chomnyengu nyo pö kokay. Melenchï kegh mïnkech kömpölelutchï kipkonchecha nko pöytoghicha nko kintöghoghicha nko tïsicha nko werkoyicha nko papotïnecha nko piköcha löwïr, kïngeta osiswo pöytoghi Asirya nko ye.

³³ Wölo iponyi man ompö chini löwïr kipkonchecha kighanyi man, wölo kakighacha nyo gha.

³⁴ Melö kirïp kirurutköku pöytoghicha nko kintöghoghicha nko tïsicha nko papotïnecha. Melö ompö kiyang chane ngaleku nko chilatengu.

³⁵ Kitönönyi chane paytagh aitö kor nyo akwagh akï pöro ompö köromnyengu, wölo melö kipöghisyeghunyi anta pïstö ighisyewutkökwa cho ghach.

³⁶ Topöne ye nyu lö kïchicha asisete sekey, ompö koronete kitönönyi papotïnecha tökïngörökyï akwechi nko ropöwechi cho karamach.

³⁷ Wetöy ye nyu sïkönöto kor wölo mi pöytoghï cho kitönönyi kïpaytecha akwompö ngokicha. Tïngeto chane owesyö ompö acha nko kyakicho, kïmicha nyarïl nyo wow.”

Kekir pich kikïniniot

³⁸ Kikikiracha nyu kikïniniot ompö choni löwïr kighisyö, akïtökön kintöghoghicha nko piköcha cho pö Lawi nko tïsicha.