NEEMIA 8 - PIPÏLIA

¹ Kïghamïtyï kegh löwïr Kö pö Tororöt* sany tawu Kuka Pögh ompö asispa tagh nyo pö arawanoni, kïmwochï pich Esra kikirin kwipï kitapu Kirurut* pö Musa cho kitö ECHOTYON Israel.

² Kwipï nyu Esra tïsin kitapu Kirurut tawu nyoryogh nyo pö mïrön nko kor nko monïng cho kipköchï kïgh.

³ Atolapay kusomön ompö atoni kirurut kïngata nyini le tökwoghö ntökughyö asis ompö tawungwa. Kïter pich nyoman ngala kitapu Kirurut.

⁴ Kighyongo Esra ato kikïteka ket kisïtö nyo kipö ighisyononi. Kimi kamasunyi Matitia nko Syema nko Anaya nko Uriya nko Ilkia Maaseya cho kighyongö nyinte ewu tagh. Kughyongö ewunyi pö löt Pedaya nko Misyael nko Malkicha nko Asyum nko Aspadana nko Sakaria nko Mesyulam.

⁵ Kïngany Esra kitapunay ompö tawu pich löwïr ompö ato kisïtö, otini kingany kughyongchö pich löwïr.

⁶ Kïkwol Esra ECHOTYON, Tororöt nyo awes. Kïlö pich löwïr, “Amen! Amen!”* Akïsyolöy morikwa yïm. Atolapay kïkïtïngchï ECHOTYON akïsagh kungïrukisyot.

⁷ Kungarak pipö Lawi pich kïpköchï kirurut: Yeswö nko Pani nko Syerepiya nko Yamin nko Akup nko Syapetay nko Odia nko Maaseya nko Kelita nko Asaria nko Yosapad nko Anan nko Pelaya. Kïmi pich kughyongo ataye.

⁸ Kusomön kitapu Kirurut pö Tororöt akïwaghach ompö kut nyo kinkït pïchoni akunet lasiny kïpköchï pich.

⁹ Otini kisöwï pich wölo lata kirurut kusyonchï kegh akïriryö, kïlenchï Neemia pröyönto pöytoghin nko Esra tïsin akï kikirin nko pïchay pö Lawi le koneti kirurut pïchay löwïr, “Tïlil asisï ompö ECHOTYON Tororötïnkwa, mosönönöy amolokyö.

¹⁰ Arota keston apa am ichon aghegh dipay* cho onyïn atö mey. Kïlenyona molokyot tïlil asisï ompö echotyontenyo, ompöwölo owesyenkwa ngörekyo ECHOTYON.”

¹¹ Kïsaghsagh pipö Lawi pïchay akïlenchï, “Osisyenö tïlil asisï mosönönöy.”

¹² Kirot nyu pïchay löwïr akïpa kwam ichon akutö mey. Kïngörekyö nyoman, ompöwölo kipköchï chane ngalechay kakisomönchï.

Ichon pö Tunkun

¹³ Kïpa asisto odeny poyi ortïna pich löwïr nko tïsï nko pipö Lawi akïpa wölo mi Esra kikirintö, atökunet kegh ngala kirurut.

¹⁴ Kenyorï kikikir ompö kirurutchay kimwochï ECHOTYON Musa lö, omöy pipö Israel Ichon pö Tunkun.

¹⁵ Atolapay kïmwatïta kïghömï kanastinekwa löwïr nko Yerusalem lö, “Ape komos, apï mori arol nko törokwö nko kapïrïmen nko sos nko ket walaka cho tïng sökö cho chang atöketeka tunkun lenyini kirate.”

¹⁶ Kïlenyona kïpa pïchay kwipï morichay pö ket akïteka tunkunekwa, kïtek chi anka tïkwïl pörketo konyi nko kiroroyikwa nko nyo pö Kö pö Tororöt nko nyo lekïto Kuka Pögh nko Kuka Epraim.

¹⁷ Kïtek pïchay kipkana pïnotön löwïr tunkun akïmang, ompöwölo melö kitökwigh pipö Israel lenyoni kïngata osiswo Yoswö wero Nun. Kïnyorï nyu ngörekyö nyo wow.

¹⁸ Kikisomön kitapu Kirurut pö Tororöt asis anka tïkwïl kïngata asisini kitor ichon ntökwit asispa söröm. Kwam Ichontino Tunkun ompö osis mut nko odeny. Atolapay kïtuyö löwïr ompö asispa mut nko sömök kïrïp kegh nko kirurut.