NEEMIA 6 - PIPÏLIA

¹ Otini kilïm Sanpalat nko Topiya nko Kesyem nyo le Marapyan nko pungköcha löwïr lö kyatekan nayatunay amelö tökïmi wölo pankas nko kimelö kyotönön tekech kukoti.

² Kuyokwï kut Sanpalat nko Kesyem lö, “Nyonö keryamena kanasyan nyo mi tömko Ono.” Wölo kimököy chane kïrïmanïn.

³ Ayontan kut olenchï, “Morökunanye wöloni, ompöwölo otïngetan ighisyö nyo wow akï ne topïstö ighisyö kughyö angwïn wölo omikwa.”

⁴ Kuyokwï kut ngat kïnyïl angwan le nyaye ayoktan kut tïkwïl le nyaye.

⁵ Kuyokwï Sanpalat kut kïnyïl mut ompö palalyan nyo kipu mötworintenyi kï yatat

⁶ nyo kikir lö, “Komwowanïn Kesyem lö lentöy pich cho le pöröris, imökenyi nko pipö Yaudi opesyenö, akunka nyï otekekwa nayatunï. Aipïrchinenyi lïkune pöytoghintengwa.

⁷ Akelentöy kikïlanyi werkoy cho ngorsïyi ompö Yerusalem lö, ‘Ichinyi pöytoghinto Yuda.’ Kïmwochini ye nyu pöytoghin ngalechï. Kïlenyona nyonö tökengalana tïkwïl.”

⁸ Olenchan nyinte, “Melö mi kïgh nyo lata nyoni ketamanyi chona onkït.”

⁹ Kimököy chane kwotyeghenecha lö, tökïmeghecha mutïnö mökïpöghisyö. “Wölo konante owesyö ye, we Tororöt!”

¹⁰ Owan nyu kö pö Syemaya wero Delaya wero Meetapel nyo kikïkörchï katanyi, kïlenchanïn, “Kepe kewïngena kegh Kö pö Tororöt* akekar kukoti, ompöwölo pkonöy kïpörinyi. Tïkon oghö nyo kapka kïparinyi.”

¹¹ Wölo olenchan, “Melö mïchini chi nyo lenye ani kuperta. Melö olentan towö Kö pö Tororöt lö tawïng kegh. Mowetanye.”

¹² Osöwan lö, melö köyonwanïn Tororöt Syemaya, wölo kal nyinte Topiya nko Sanpalat kungwïn kïmwowanïn ngalechï.

¹³ Kïlenyona kikyal nyinte lö tökwotyeghenanïn ngalechoni aghan ngokï, atökïkonanïn kaynat nyo gha tökïmïnanïn.

¹⁴ Asaghan lö, “We Tororötïnyu, rosa Topiya nko Sanpalat ompö ngalechï kegh chane nko Noadiya kokonï le werkoyon nko werkoy walaka cho mököy kwotyeghenanïn.”

Kiwangata teksyö

¹⁵ Kiwany pipö Yaudi nayatunay ompö osis 52 asispa 25 nyo pö arawa Elul.

¹⁶ Otini kilïm pungköcha löwïr cho kiwitecha lenyoni, kuwöghisyö akïsïch arasï, ompöwölo kinkïtï lö kingarakecha Tororöt kewonyö ighisyonï.

¹⁷ Kikirchini kegh palaltin chönökopïrtino Yuda nko Topiya.

¹⁸ Kinomnyotö nyinte nko pipö Yuda walaka cho kile wökï, ompöwölo ki kapikoyo Syekania wero Ara akip werïnyi Yeoanan chepö Mesyulam wero Perekia.

¹⁹ Kipka kïmwowanïn köromnyenyi akïpa kïmwochï nyinte ngalechan, kukirwanïn nyu Topiya palaltin kwotyeghenanïn.