NEEMIA 4 - PIPÏLIA

¹ Otini kilïm Sanpalat lö kikïmitecha keteköy ngat nayat, kïnarek akïnyïta akïroröchï pipö Yaudi.

² Atolapay kïngalan ompö tawu pikachi nko pipö lïk cho pö Samaria lö, “Lentöy kighöy ne pïchï nyörkölöl pö Yaudi nya? Möchöy so kïtek ngat kanasyantanï? Lentöy so kitötegho atoni amörostin? Muköy kuwany teksyö ompö asis akonga? Lentöy so kïnyorchini koghi teksyö samï cho kikïpel?”

³ Kïlö Topiya nyo kimi nko nyinte, “Lentöy kakïtek ne nya, kïgh nyo ato tyar ompö chepkonö, kïrul nayatungwa nyo lentöy kakïteka koghïn.”

⁴ Asaghan olan, “Tera, we ECHOTYON Tororötïnyo! Tera wölo kïsöstonecha, yokyinö chane sastaghtangwa aikany kerang chane kïpa kïlïkwï pïnot ompö kore anka.

⁵ Melöstoghchï chane ngokikwa amewutyeghö ngokikwa kokay, ompöwölo keratecha cho kïteksïyi.”

⁶ Ketasacha tagh ketek nayatunay ntökïmut kïrut lö tïch, ompöwölo kitïng pich machat kïpöghisyö.

⁷ Wölo otini kilïm Sanpalat nko Topiya nko pipö Arapia nko cho pö Amon nko cho pö Asdod lö tösöy tagh tekata nayatu Yerusalem akemicha kekïnöy wölay kingatangat, kïnörekyö nyoman.

⁸ Atolapay kïtat kïpka kïporyeghö Yerusalem atökïkwanykwany pich mötöw,

⁹ wölo kesaghacha Tororötïnyo aketö pich cho ripsïyi nangat nko pöghet.

¹⁰ Wölo kïlö pipö Yuda, “Kikupöl pich ighisyonï, kïsïtöy samï akwanyï chang. Melö tökemukecha keteke nayatunï ngat.”

¹¹ Nonöy pungköcha lö melö kinkïtucha anta kïsïwa chane ntökïtenö kïpka kwenuncha akïparecha akïkar teksyonï.

¹² Otini kilïm pipö Yaudi cho kimöngöy nko chane, kïpka, kïmwowecha kïnomnyö lö, “Pkono pungköcha koroskökwa löwïr akïporyeghenecha.”

¹³ Otönön nyu pich chokon nko ngötwö nko kotï atat chane, kipeghategha ortïnekwa ompö nayat wölo kitomönye kuwonyö.

¹⁴ Atolapay olenchan chönökopïr nko yetïntin nko pich löwïr, “Mawagh chane, anana ECHOTYON nyo awes nyo pö otyogh ato poryechinö werkökwo nko monekwo nko korukwo nko kestonikwo.”

¹⁵ Kïkany kïlïm pungköcha lö kikenkïtucha akïsïwa lö kikunyar Tororöt tötutkökwa, kemïlisyecha aketek nayatunay.

¹⁶ Kïngata asisoni achaghan pikachu kareran kiteksyö walaka, kïnam walaka ngötwö nko longoy nko kotï akulach sïro pö karïn cho körtegho kegh. Kungarak kintöghoghicha pipö Yuda löwïr

¹⁷ cho kiteksïyi. Kïkömpölelchï pïchay kisïtöy tïkwïn cho kïtektoy, ompöwölo kinömo karïn ewu anka kïsïto tïkwïn ewu anka.

¹⁸ Kirötyï tekin anka tïkwïl chokenyi mu otini kiteksïyi, kighyongo kutinto kontï kamasunyan.

¹⁹ Atolapay olenchan chönökopïr nko yetïntin nko pich löwïr, “Awes ighisyonï pö nayat akï wow nyo kemurmuryecha kelowöchitunö.

²⁰ Otini kalïmakwa wölo chögho kontï oryöwï wölo kïmicha, ompöwölo poryewecha Tororötïnyo.”

²¹ Kïlenyona kepöghisyecha nko pïchay tïng karïn kïngeta nyaye kayech ntökulïwï kokel.

²² Olenchan pich ompö atoni, “Nya kïrï chi anka tïkwïl nko mötworintenyi Yerusalem nangat anka tïkwïl tökïripecha atolapay kïteksyö pöghet.”

²³ Kïlenyona melö mi chi ompö acha nyo kiwö kïngwïs sïrenyi. Kinam chi anka tïkwïl karichi.