NEEMIA 2 - PIPÏLIA

¹ Kïkany kiwer aro angwanï, achengan dipay* atö pöytoghin Artakerkes, kimelö kyanarekan asis anka ompö tawunyi.

² Kïtepanïn lö, “Ompö ne techinyi narekate amechï kasate? Melö ichinyi ngarakate.” Omïghön nyoman.

³ Olenchan pöytoghin, “Itökwï we pöytoghin! Ompö ne tömöwurön tokochunyan, otini kïratyan kanasyante nyo le mötöwöyi papotïnechan akikenyar kukot akepel?”

⁴ Kïlenchanïn pöytoghintö, “Ne ye nyo imökenyi?” Asaghan lenyini Tororöt pö yïm

⁵ alenchan pöytoghin, “Ato ichömenyi, we pöytoghin akï ato konyorwan chömchin ompö tawungu, ikany owan atang koro Yuda wölo mi kanasyanta nyo mi mötöwöyi papotïnechan, atowan atek ngat.”

⁶ Kïlenchanïn pöytoghintö kïmi korkenyi kamasunyi, “Iwetenyi nyo tya, aimïlonyi oyï?” Kïlenyona kïcham pöytoghintö, owan omwochan otini omïlenan.

⁷ Atolapay olenchan, “Ato ichömenyi, ikonanïn palaltin cho opchinan pröyöntino pöytoghin ompö lalwa Yuparet okumpö ta tökïchömwanïn awer ntatan koro Yuda.

⁸ Kono tïkwïl palalyan nyo pö Asap ripinto wuw pö pöytoghin tökïkonanïn ket cho kïteko kuka nayatu Kö pö Tororöt* nko nayatu kanasyan nko cho pö kö nyo omöngan.” Kïchömwanïn pöytoghintö lenyini katepan nyinte, ompöwölo kimi Tororöt nko ani.

⁹ Kïkonanïn nyu pöytoghintö yetïntino lïk nko pipö angoletin owan nyu onyorï pröyöntino pöytoghin ompö lalwa Yuparet okumpö ta atönön palaltinechay pö pöytoghin.

¹⁰ Wölo otini kilïm Sanpalat nyo kingwïna kanasyanta Pet Oron nko Topiya wowïn pö koro Amon lö kengwïn chi kungarak pipö Israel, kulil kïgh nyoman lö, ompö ne tökengöroköy chane?

¹¹ Otini kyatïtan Yerusalem otöpan osis sömök

¹² angetan oghö nko pich cho ngörï amelö kyomwochan chi nyonikïny kïgh nyo kikutö Tororöt mïkulöwunyan agh ompö Yerusalem. Melö kimi kïgh anka nko ani kïpoto sïkïryonini kyoweghonan.

¹³ Owan oghö olït Kuka Mpöghogh nyo töngöy kö pö pögho chepkonö alït Kuka Samï arosan nïyetwo Yerusalem wölo kikirultö nko kukoti cho kikïpel.

¹⁴ Atolapay owan tagh alïtön Kuka Kö pö Pögh nko Ngarpïlu pöytoghin. Wölo otini kyatatan atoni melö kimi wölo weröy sïkïryonay kyoweghonan.

¹⁵ Owan atoch oghonini, awer mpöghogh aros nayatunay. Atolapay amïlan ngat alïtön Kuka Mpöghogh arotan nyu.

¹⁶ Melö kinkïtï yetïntino kanasyan wölo kyowan anta kyowan agh ne. Kitomönye omwochan pipö Yaudi nko tïsï nko chönökopïr nko yetïntin nko pich löwïr cho ngöroku kwighöy ighisye.

¹⁷ Wölo omwochan chane lö, “Osïwïyekwa nyarïlnï kïmitö ye nya? Kalïkwï ne tökï kïratyan Yerusalem le nyï nko kukotichi chï kikïpel? Apkana nyu ateka nayatu Yerusalem tömökiwongwï ompö arasï.”

¹⁸ Omwochan chane wölo kingaraktanïn Tororötïnyan nyo karam amwochan ngala pöytoghin cho kimwowanïn. Kïlö chane, “Keteksyenö.” Kïlenyona kuchïchim kegh tökwigh ighisyö nyo karam.

¹⁹ Wölo nyini kilïm Sanpalat nko Topiya nko Kesyem nyo le Marapyan tötutköcha, kïroröchecha akïsasecha lö, “Ne kitö nyï oghekwa? Kotighintönchikwa pöytoghin?”

²⁰ Wölo oyokyan chane lö, “Ngörokecha Tororöt nyo kigh yïm kerïntena. Melö otïngetekwa mïlat amelö otïngekwa kïgh Yerusalem.”