NEEMIA 13 - PIPÏLIA

¹ Kikisomön asisoni kirurut pö Musa kïlïm pich. Kenyorï wölo kikikir lö, mölïtönye chi pö Amon anta nyo pö Moap tuyo pipö Tororöt kokay,

² ompöwölo kimelö kitaroka chane pipö Israel omisyö nko pögh. Kikur chane Palaam kungwïn kïchïp, wölo kiwaghach Tororötïncha chïpononi kïlïkwï kisoyönöt.

³ Kïlenyona otini kilïm pipö Israel kirurut kesomönöy, kupesyö kegh nko pich löwïr cho pö punton.

Keyokwï ngat Neemia saghata man

⁴ Kitïng kongot Elyasyip tïsin nyo kighyongchini korïn cho mi Kö pö Tororöt* nyinte nko Topiya kïtomö kwitï ngalechï.

⁵ Kichomchï nyinte Topiya kïmang kö pö ori nyo wow, wölo kikïrorchini ropöw nko tïkwïn cho ngutoy cho onyïn nko karïn cho kïpöghisyegho ompö Kö pö Tororöt nko kareranpa taman nyo pö pagh nko dipay* nko mwagh cho kikïkonï ketö pipö Lawi nko tumï nko ripi Kö pö Tororöt lenyini mwoghöy kirurut.

⁶ Kimomitanye Yerusalem osiswechoni kighisyot ngalechï. Kyowan wölo mi Artakerkes pöytoghinto Papilon ompö könyi 32 nyo pö paytaghtanyi. Ato mi löt kïchömwanïn pöytoghintö

⁷ amïlan Yerusalem. Otomwan kigh Elyasyip ngokï otini kichömchï Topiya kïmang kö nyo mi Kö pö Tororöt ori.

⁸ Anarekan tya alösyan kari Topiya löwïr sany.

⁹ Atolapay amwatïtan ketïlil korichay awan oyokwï ngat kari Kö pö Tororöt nko ropöwo pagh nko tïkuchay ngutoy cho onyïn.

¹⁰ Osöwan ngat lö melö kitöketö pipö Lawi nko tumï cho kipöghisïyi karerantangwa, kïlenyona kïpa nyu chane kutang parenikwa.

¹¹ Achilan yetïntin lö, “Ompö ne tökepïstö Kö pö Tororöt le nyï?” Aghamïtan chane atolapay oyokyan chi anka tïkwïl ighisyenyi.

¹² Atolapay nyu kwipï pipö Yuda löwïr kareranpa taman nyo pö pagh nko dipay nko mwagh, ketö töpoton cho mi Kö pö Tororöt.

¹³ Akïlan Syelemia tïsin nko Sadok nyo le kikirin nko Pedaya nyo pö Lawi kughyongchï töpotonichay, akïlan Anan wero Sakur wero Mataniya kungarak chane, ompöwölo ki pich cho ghönote chane. Ki pöghisyengwa kïchöghchï werkökwa pasanichay.

¹⁴ Inanante, we Tororötïnyu, amewutyeghö ighisyewutköchan löwïr cho karamach cho kyaghan ompö kongu nko sowutkö.

¹⁵ Asïwan nyu osiswechoni pich ompö koro Yuda cho pïröy pögho sapipun ompö asispa Sapato.* Akïrat sïkïröyikwa kwipö pagh nko dipay nko sapipun nko makany nko sompïris cho nïkisöch, cho kipu chane Yerusalem asispa Sapato, Achilan otini kimi kwoltoy omisyewutchoni.

¹⁶ Kwipï tïkwïl pipö Tiro cho möngöy kanasyanta Yerusalem kaghagh nko tïku walaka akwolchï pipö Yuda ompö asispa Sapato.

¹⁷ Achilan kintöghoghi pipö Yuda lö, “Ne ngokichï oghekwa nya osïmnyonöy asispa Sapato?

¹⁸ Melö so kigh papotïnekwa le nyete? Kwipï Tororötïnyo ghöyityonï ompö acha nko kanasyantanete? Akwanyï ye opchinekwa pipö Israel nyarïl otï kosïmnyonökwa asispa Sapato.”

¹⁹ Otini kituwit kïtomö kïyekyï asispa Sapato, amwatïtan kekar ortïn ompö Yerusalem. Amwatïtan lö, “Mayat ntökïtenö kuwer asispa Sapato.” Atönan mötworichan walaka kïrip ortïn tömömi chi nyo kösönu kïgh kanasyan asispa Sapato.

²⁰ Kiruyö mïnchïrïs cho oltoy karïn kïtïkon Yerusalem sany kïnyïl akonga anta odeny.

²¹ Achilan chane lö, “Ompö ne toruyenekwa körköru nayatunï? Ato aghakwa le nyete ngat osïwïyekwa.” Kïngata atoni mökïpkacha asispa Sapato.

²² Atolapay omwochan pipö Lawi kutïlil kegh akïpka kïrip ortïn atö kïtïlilit asispa Sapato. Inanante ompö choni, we Tororötïnyu, aikamanante ompö chomnyengu nyo pö kokay

²³ Kyasïwan ompö osiswechoni tïkwïl pipö Yaudi cho kip kor cho pö Asdod nko Amon nko Moap.

²⁴ Akingölonöy monekwa karerana ngala Asdod nko ngale walaka, wölo melö kimï kïngalan ngala Yuda.

²⁵ Achilan chane achïp amuny walaka angagh putekwa, atolapay akanyan kwam chane muma ompö kayna Tororöt, kïmwa lö, “Mepöcha chane monecha amökipechanye chikwa.

²⁶ Kigh Solomon pöytoghinto Israel ngokï ompö kor cho lata chï. Akimöminye pöytoghinto ompö punton nyo karkegh nko nyinte. Kïcham Tororötïnyi nyinte akwigh kïlïkwï pöytoghin ompö koro Israel kïmïkul. Wölo kwigh koru sany nyinte kwigh ngokï.

²⁷ Kïterwokwa ye nyu akeghchï ngokï Tororötïnyo, kep koru sany?”

²⁸ Ayonan ompö wölo omitan wero Yeoyada wero Elyasyip Tïsin nyo Wow* nyo le santa ka Sanpalat nyo kingwïno kanasyanta Pet Oron.

²⁹ Inan, we Tororötïnyu ompöwölo kisïmnyon chane tïsintön nko muma* nyo kyamanyi nko tïsï nko pipö Lawi.

³⁰ Kïlenyona otïlilön chane ompö kïgh anka tïkwïl nyo kipö sany. Atolapay atatan ighisyewut pö tïsï nko cho pö pipö Lawi chi anka tïkwïl nko ighisyenyi.

³¹ Atolapay otötan kwen ompö amörostin cho kïpelöy ompö osis cho kiketat nko poretayi pagh nko cho pö akwa. Inanante, we Tororötïnyu, ompö köromnyö.