NEEMIA 10 - PIPÏLIA

¹ Kinya kïtökön kikïniniot pröyönto pöytoghin Neemia wero Akaliya nko Sedekia. Achï pikö walaka cho kitökön: Seraya nko Asaria nko Yeremia Pasyur nko Amaria nko Malkicha Atus nko Syepania nko Maluk Arim nko Meremot nko Opadia Daniel nko Kineton nko Paruk Mesyulam nko Apiya nko Michamin Maasiya nko Pilkay nko Syemaya Yeswö wero Asaniya Pinuy nyo pö ara Enadad Kadmiel nko Syepaniya nko Odia Kelita nko Pelaya nko Anan Mika nko Reop nko Asyapia Sakur nko Syerepiya nko Syepania Odia nko Pani nko Peninu Paros nko Paat Moap Elam nko Satu nko Pani Puni nko Askad nko Pepay Adonicha nko Pikpay nko Adin Ater nko Esekia nko Asur Odia nko Asyum nko Pesay Arip nko Anatot nko Nepay Makpiyas nko Mesyulam nko Esir Mesyesapel nko Sadok nko Yadua Pelatia nko Anan nko Anaya Osyea nko Anania nko Asyup Aloes nko Pila nko Syopek Reum nko Asyapna nko Maaseya Aya nko Anan Maluk nko Arim nko Paana

Tïsï: Pipö Lawi: Kintöghoghi pich: Kikïniniot

²⁸ Kinget pich löwïr cho kingötï cho le tïsï nko pipö Lawi nko ripi nko tumï nko mötwori Kö pö Tororöt* nko chane löwïr cho kisirö kegh pipö punton kïrïp kegh nko kirurut pö Tororöt, chane nko korukwa nko monekwa löwïr cho kikïchïreröchitu

²⁹ akutuyö kegh nko pikökwa nko kintöghoghikwa akwam muma lö, kïrïpöy kirurut pö Tororöt cho kikitö Musa mötworinto Tororöt tökekaman kirurutchini löwïr pö ECHOTYON, Echotyontencha nko ngalechi nko kinetutkachi.

³⁰ Akïlö, “Mökeyilchinechanye tipicho pipö sany anta kïkensyechï werköcho tipikwa.

³¹ “Akwoto ipï pipö punton anta tïkwïn cho oltoy asispa Sapato* anta ompö asis nyo tïlil, kïmökyolechanye. “Mökïkösisïyechanye ompö könyi mut nko odeny pösön anka tïkwïl.

³² “Kikighönchinecha lö, kitötocha kramtin angwan cho pö silpa ompö köny anka tïkwïl tökepöghisyeghö ompö Kö pö Tororöt.

³³ “Kitötocha tïkuchï kepöghisyeghö ompö Kö pö Tororöt: makatyan nyo tïlil nko ropöwo pagh cho pö osis löwïr nko amörostin cho kïpelöy osis löwïr nko ropöwo osiswo Sapato nko Ichontino Relïn pö Arawa nko ichontine walaka nko ropöwe walaka cho tïlilöch nko ropöwo ngoki pipö Israel nko ighisyewut löwïr cho pö Kö pö Tororöt.

³⁴ “Pïröy pich kura köny anka tïkwïl nko tïsï nko pipö Lawi atökenkïtï lö pipö or ne cho ipu kwen cho kïpelo amörostin ompö ato kïpelo amöros pö ECHOTYON Tororötïnyo lenyini kikikir ompö kirurut.

³⁵ “Keghönchinecha kepunö Kö pö Tororöt poretayi akwa nko cho pö pagh ompö köny anka tïkwïl.

³⁶ “Akepchï tïsï cho pöghisïyi ompö Kö pö Tororöt poretayicha cho le wor nko twatan cho pö kyakicha, lenyini kikikir ompö kirurut.

³⁷ “Kepchï tïsï makatina poretayi pagh nko ropöwecha cho pö dipay* nko akwa ket löwïr nko mwaghpa arol ompö korïn cho mi Kö pö Tororöt. “Atolapay kepchicha pipö Lawi karerantina taman cho pö tïku parenicha, ompöwölo chane cho ghömïtöy karerantina taman ompö kanastinecha.

³⁸ Otini chengöy pipö Lawi karerantin löwïr cho pö taman kïmïlchini kïmito tïsin, wero Aron atoni, akwip pipö Lawi kareranpa taman cho pö tïkuchoni akutö kö pö kaplawach pö Kö pö Tororöt.

³⁹ Ipu ropöw pipö Israel nko werpö Lawi cho pö pagh nko dipay nko mwagh atöketö kö pö kaplawach wölo mi kari Kö pö Tororöt nko tïsï cho pöghisïyi nko ripï nko tumï. Melö kïpïstonecha Kö pö Tororötïnyo.”