NEEMIA 1 - PIPÏLIA

¹ Achï ngala Neemia wero Akaliya cho kigh. Kyomitan Susa kanasyan nyo wow ompö arawa Kislep könyi tömönut odeny nyo pö paytaghpa Artakerkes pöytoghinto Pasya.

Kösoghchï Neemia Yerusalem

² Kungwïna chi akong Yuda ompö werköcha nyo kïkuro Anani nko pich walaka. Atepan chane pöghisyo pipö Yaudi cho kingötï kïchïwïtyeghö pïnotön nko wölo lata Yerusalem.

³ Kïlenchanïn chane, “Mi pïchay kingötï, kichïwïtyeghö pïnotön nyarïl nko arasï, kikirultö nïyet pö Yerusalem akepel kukoti.”

⁴ Otini kyalïman ngalechoni, otöpan ngwïny alok, asönön osis cho te, akïrur asoghöy Tororöt

⁵ lö, “ECHOTYON Tororöt pö yïm, Tororöt nyo wow nyo wöghöy chi anka tïkwïl! Ikomönenyi mumengu, aitïng kisyonöt ompö chane cho chöminyi, airipöy kirurutköku.

⁶ Iterwante airosanïn otini osoghan pöghet nko nangat ompö mötworiku pipö Israel. Okötenan ngoki pipö Israel cho kiwunyi. Kyaghan ngokï tïkwïl nko papotïnechan.

⁷ Kiketïpicha otöp nyo gha ompö tawungu amelö kitö keripöcha kirurutköku löwïr cho kimwochinyi Musa mötworintengu.

⁸ Nyo nana ye ngölyontonay kimwochinyi Musa lö, ‘Ato alïkukwa penyï, otoyonekwa oghömunö koroswo punton,

⁹ wölo ato oyokyanïkwa kegh arip kirurutköchan agh, oghömïtwokwa kïrkegh kyapekwa wölo low kïtya, omïtokwa ape wölo kyakïlan kesaghenanïn.’

¹⁰ “Piköku chane akï mötworiku cho kityakanyi ompö owesyengu nyo wow.

¹¹ Echotyon iterwante sowutkachu nko cho pö mötworiku cho chömo kegh kaynengu akïkonyïtinyi. Aingarakante kusyonchanïn pöytoghintö.” Kyochan nyu chi nyo kyopchini pöytoghin dipay.*