NAUM 2 - PIPÏLIA

Rïntaghpa Ninawi

¹ Kikwitï punyon nyo ngwïnöy kïpörinyi, we Ninawi! Tïngeto nyinte owesyö kukarpesinyi! Otönö nyu ripï kïtöpï kïpsach wölo kïripsyegho! Orip mölïtï pung or nyo kïlïto kanasyan! Anapa kegh ompö poryot!

² (Karik kuyokyï ECHOTYON ororyö nko owesyö pikachi, pipö Israel nyo kitïng tagh kïtomö kïsara pungkökwa tïkwïn löwïr.)

³ Kanam pung pö Ninawi longoy cho pïröch, akulach sïro pö poryot cho pïröch lö tök. Kanap kegh atökïporyeghö. Ryölsot nkarinekwa cho pö poryot cho chutöy angoletinö le lyopöto ma, köchuryö angoletine ompö sirmoy pö poryot.

⁴ Köryöghsetö nkarinechoni pö poryot, petöy wölnö nko wölnö ompö ortïna kanasyan. Ryölsot le lyopöt pö mapa töpewö, akuköryol pich le kiryalata ilat.

⁵ Kikïkur yetïntinekwa kïpa tagh, kukïskus kegh akupïtyotoy otini kipetöy. Kïryögh lawel lïkonay kïsor nayat, atökïyar longa kunyïk nyo kïwiro nayat.

⁶ Atolapay kïyat pung kukot cho kimi okumpö lalwa, kïwir nyu otyogh nyo wow pipö ka pöytoghin.

⁷ Atolapay kenam akep koko pöytoghin le ratan. Kïriryö korï cho le mötworichi le cheptuken, akïwir kegh töket ompö sönönöt.

⁸ Kepulunö pipö Ninawi kanasyantengwa, karkegh nko pögh cho kenyanya takar. Kuteghyö yetïntinekwa kïlentöy, “Oghyongö! Oghyongö!” Wölo puryö chi nyo kiyokï kegh löt.

⁹ Achengena nyu silpeni, achenga koltine! Kinyïghï mökosyö Ninawi lakas! Mi kïgh anka tïkwïl nyo pö olyot nyo wow orinyi.

¹⁰ Wechï kinyara Ninawi akïtoyeghö pich! Kalïkwï kïratyan nyo tuw! Kimeghö pich mïkulis akïkwangkwang kïgh kutïngöy akïruronchö.

¹¹ Kunko ye nyu kanasyanta Ninawi nyay kilata köpöno ngötuny, wölo kipöy ngotïny panyechi, akïwïnchï warechï tömam kïgh?

¹² Kisökosöy ngötïny ntökïnyorï pentanyi, akïpachpach kïpagha warechi nko korkenyi, akunyïghit köpönenyi pany cho kikïpachpach.

¹³ Lentöy ECHOTYON Kimuktoghin, “Oreyinyi we Ninawi. Opelan nkarineku cho pö poryot cho chutöy angoletinö. Oghan ketïgh pipö lïkenkwa ompö poryot. Osöreninyi tïkwïn löwïr cho kipörunenyi pikö walaka amelö töketerchini ngat kïgh nyo mwoghöy piköku.”