MIKA 6 - PIPÏLIA

¹ Apkana atera ngal cho mwoghöy ECHOTYON angeta orwokö kïlïm komoswo akïlïm kutïngkotï.

² Akwa kutïngkot, atera kirwoko ECHOTYON, atere tïkwïl sikotino ngwïny cho opo könyisyok. Rwokyini ECHOTYON pikachi, pipö Israel.

³ Lentöy ECHOTYON, “Heywey pikachu kaghwakwa ne nya? Kosusokwa lö ne? Omwowante.

⁴ Kyamïtunenekwa apkanena koro Misri, asörunenokwa otöp pö sekeynön. Kyokonokwa Musa kuntöghoghwokwa nko Aron nko Miriam.

⁵ We pikachu anane ngalechay kimököy Palak pöytoghinto Moap kwighwekwa, nko ngal cho kiyokyï Palaam wero Peor nyinte. Anana tïkwïl tïkwïn cho kighisyö ompö or, kwenu Syitim nko Kilkal, ankïtï wölo kyangaraktekwa asörwokwa.”

Kïgh nyo mököy ECHOTYON

⁶ Ne nyo opchinan ye ECHOTYON ato owetan osoghöy Tororöt nyo mi yïm? Opchan ye amöros pö mogh cho kïpelöy?

⁷ Ayo, ngöroköy ECHOTYON ato kiropchï mokol cho makïrar? Anta ato kïropchï mwowöy cho yintoy le puseryon? Otötan ye poretyenyu kïlïkwï putyon ompö lelutköchan kïwö kösïghyonto portanyan ompö söpontönyan?

⁸ Ewo, melö lenye nyoni we ptangengmöt. Kïgh nyo mökenecha ECHOTYON kï nyï: kegh man akeparta chomnyogh nyo mamïnïng, akemïnïngityï kegh Tororötïnyo.

⁹ Karam chi nyo woghöy ECHOTYON, kuröy ECHOTYON pipö Yerusalem kïlenchini “Atera pïchï osupo kegh kanasyan.

¹⁰ Tïng mwokïyis tïkwïn ompö kaplawachtinekwa cho kinyorï ompö ara putintön lilanïn kïgh nyoman.

¹¹ Olösteghchinan lö ne chi pöghisyegho ratilino putintön nko koghi cho pö putintön.

¹² Köpïr pikökwa cho le sïkön mey, akï mïröy putï chane pikö löwïr.

¹³ Kïlenyona kyotorön omungokwa, owongokwa akwompö ngokikwa.

¹⁴ Omisyekwa wölo melö opïghyongekwa sïrwekwa mutïnö ororekwa kaplawach wölo melö rorisyot opkonytenan cho karorakwa.

¹⁵ Okötkötisïyekwa wölo melö olekwa otïghekwa mwaghpa arol wölo melö oyilokwa kegh nyoni kïny olentekwa kïtïghöy sapipun taryaka wölo melö ogheghekwa dipaykö.*

¹⁶ Ompöwölo kyarïpakwa otöptino pöytoghin Omri nko otöptin löwïr cho pö kö pö Aap Akyarïpakwa tïkwïl ngalekwa nyo owonyokwa nyo mötïny akiroröchokwa pipö punton löwïr akïroröchokwa pipö punton ompö sasa.”