MIKA 3 - PIPÏLIA

¹ Kïlö werkoyonta Atere yetïntino Israel nko akwa kintöghoghi Israel. Melö kitömïchinokwa onkïtunö man?

² Akwa cho owoköy man, acham ngokï, oyengekwa piköchan kïsöpchot, akwöl panye ompö koyekwa.

³ Omekwa piköchan kïsopchot achïr önto chi kïsatate arïngarïng koye kïlïkwï mïtïkan atolapay otörotör le pempö tör.

⁴ Itïtoy nyu ato oriryokwa arirchini ECHOTYON wölo melö terwokwa nyonikïny porchinokwa patagh akïsis ompöwölo kyaghakwa ngokï.

⁵ Lentöy ECHOTYON akwompö werkoy cho lïsöy pikachi. Yomisyini chi kalya, nyo ketö kïgh kwam. Wölo mugho poryot, anka tïkwïl nyo metöninye kïgh nyo kyomöy.

⁶ Kïlenyona tuwitu ompö akwa werkoy, puryö sïwïyagh lïku tuwïn, puryö kïgh nyo kïngongwokwa. Rorisönchini werkoy akïlïkwï pöghetungwa tuwïn.

⁷ Kirotöy kirosikwa, wiröy wuw ngoratengwa, nömöy arasï chane ompöwölo melö terchini Tororöt chane.

⁸ Wölo nyo le ani otïngetan owesyö Tororöt nko mïkulöwu ECHOTYON nko man nko owesyö ato mwochan pipö Israel ngokikwa.

⁹ Atere ngalechi kintöghoghichi pö Yakopo nko akwa pöytoghi Israel cho owoköy man awaghach köromnye kïghaghit.

¹⁰ Kyatekan kanasyanta Sayon* mïltagh pö kisön ateka Yerusalem ghoyïn.

¹¹ Rwoko pöytoghichï kanasyanta asoya, netisïyi tïsï töketö ropïyen. Akingorsyö werkoyikwa tökïnyorï ropïyen akwanyï mwoghöy lö kitwoytoy kegh ECHOTYON kïlentöy “Melö mi so ECHOTYON nko acha? Nyo melö mi ghöyityö nyo nyorwecha.”

¹² Kïlenyona kïngoröy Sayon le par akwompö akwa lïku Yerusalem kïratyan nyo kirul kutïkumö, akïpita wuw nyo wow Kö pö Tororöt.