MIKA 2 - PIPÏLIA

¹ Heywey chane cho ighöy ngokï akïtat wölo idoy ghöyityö nangat ato ruyot pöröyonikwa. Tökwigh asïyech otini kayech ompöwölo mi owesye morikwa.

² Pïrchini pareni pich akïcheng lenyini, pïrchini korïn akïchengchï kegh, ghopghopöy pich nko monekwa akïsara tïku.

³ Kïlenyona lentöy ECHOTYON oghchinan nyu ghöyityö kayï nyo memukonye tochïwïtyeghö. Amelö tokwolekwa kegh ompöwölo ghöyitu ompö akwa.

⁴ Kïtumenekwa asisoni ompö ngwonïn pö sönönöt kelentöy, “Wechï kakiwongucha nyoman, kikïcheng ECHOTYON pareni piköchan, akutö pïchay kinamecha kelïkuna pïnot.”

⁵ Kïlenyona ato itïtoy atoni, möminye nyo tökemutyini par.

⁶ Kitönkösyanïn pich lö metönkösyinecha nko ngaleku melö pïstonecha Tororöt.

⁷ Ngale chete cho kimwoghöy so pipö Israel? Nyo melö tökïmïdoy ECHOTYON? Ngalechi ye so chï cho kegh? Mengörokönye so ngalechan chane cho pö man?

⁸ Kuyokyï ECHOTYON pïchoni lö kopokyikwa piköchan le pung. Oköngekwa chane tasarena sïrokö amasa pösönutkökwa pich cho kömi kalyengwa.

⁹ Owösyikwa sany koruko piköchan ompö korikwa cho pïchighöch, asarakwa monekwa kisoyonutköchan cho pö kokay.

¹⁰ Angeta apechï kegh! Melö tökïmi wölo kimungo yi, kikunyara koronï ompö sïmnyontön, akikïwïr kemötö.

¹¹ Petöy pïchï kwomtotoy oy nko putintön kïlentöy Rotwokwa kumïn le pögh nko choni nyu piko cho kichomöy.

¹² Wölo oghömïtokwa löwïr pïchï pö Israel, atuyokwa le kechir ompö akol. Oghömïtokwa, we ngötunön pö Yakopo, le kyak ompö achey, alïkunekwa pich cho möngörï.

¹³ Yotöy Tororöt nyinte oreto kanasyan akuntöghoghchï chane kïpa. Wiröy chane lö pölölo akïlïtöy kurel sany. Ntöghoghchini chane Tororöt nyo le pöytoghintengwa.