MIKA 1 - PIPÏLIA

¹ Kingwïnchï ngölyonto ECHOTYON Mika chi pö Moresyet akwompö paraku Samaria nko Yerusalem ompö osiswo pöytoghi Yuda. Choni kï: Yotam nko Aas nko Esekia. Kingwïnchï nyinte ngölyonte ompö sïwïyagh.

Rirat nyo pö Samaria nko Yerusalem

² Atera ngalechï akwa pipö punton löwïr, alïma pich löwïr cho omöngöy ngwïny, Echotyon TORORÖT nyo yotu lelutkökwa, otini kangalan ompö Konyi nyo tïlil.

³ Rose, ngwïno ECHOTYON katanyi, röku ngwïny akïtyakatyak, paraku kutïngkot ompö ngwïny.

⁴ Wonyot kutïngkotï lö pïchïchïchi ompö kelyechi, yiyöy tömköy le tömönchö nyo köwochï ma, kuyinta le pögho chepsurur.

⁵ Kighisyö choni löwïr akwompö lelut pö Yakopo, nko ompö ngoki pipö Israel. Rumuno onö ngoki Yakopo nya? Ompö Samaria, kanasyantenyi nyo wow. Rumuno onö ngoki Yuda? Ompö Yerusalem kegh!

⁶ Oghan Samaria kïlïkwï kïratyan. Kilïkwï wölo kïkötkötyini sapipun, aronchinan koghichi mpöghogh, akalangta kitorutyenyi.

⁷ Kitïghotïghöy körkeyïntinechi löwïr kïlïkwï mïnchïran, akepel tïkwïn cho kitöni chepkarteni kö pö tororötïngwa. Kirïruköy körkeyïntinechi löwïr kïlïkwï samï. Kinyorchï Samaria tïkuchï ara cheporesnan, petöy nyu lenyoni ompö ara cheporesnan.

⁸ Kilö nyu Mika, “Oriran asönön ompö ngalechi, ongwïsan sïro, awö kïchïrut, oriran le chepkonöw cho teghyot, arir le cheptusonkoltin.

⁹ Ompöwölo melö tökïlösot moyokachi, akïlekït kïnyorï Yuda ngalechoni, kikwitï kukoti Yerusalem wölo mi piköchan.”

Körikyï pung Yerusalem

¹⁰ Momwochï ngalechete pipö Kat, amoriryö kïtörengu lok! Omelmelenö kegh terïtyon ompö Peteleapra kuporï lö omikwa lok.

¹¹ Opechinö kegh pipö Sapir, ape alïkuna pïnot ompö chïrutnön nko arasï. Motöp ntolïtï sany cho omöngöy kanasyanta Saanan. Mi pipö Petesel lok, nyo monyorchinekwanye chane kingörokut.

¹² Köngöy pipö Marot köromnyo ompö machat nyo wow ompöwölo kengwïna ghöyityö wölo mi ECHOTYON, tökurel kukoti Yerusalem.

¹³ Orötyinö kari lïk angole nyo pïrtït nyoman akwa pipö Lakis kyanamtekwa pipö Sayon* ngokï akwa cho kyomustekwa kegh lelut pö pipö Israel.

¹⁴ Kïlenyona otonekwa Moresyet Kat ropöw cho kiyomistoy lïku pipö Aksip kïgh nyo kïlïso pöytoghi Israel.

¹⁵ Pipö Maresya, ipkokwa ECHOTYON chi nyo pörokwa akïwö ororyo Israel kutang Adulam.

¹⁶ Angwïla kegh mötöwöy, amut putekwo ompö monïng cho ichömonyi kegh. Angwïla kegh le sichtin ompöwölo peghonekwa chane kïpetöy pïnotön.