MATAYO 3 - PIPÏLIA

¹ Kingwïn osiswechoni Yoana Kipatisanintö akutor kwamtata ompö surkwen pö Yudea kilentöy,

² “Okötenö ngokikwo, ompöwölo kirikï Pöyunöto Yïm!”

³ Ki Yoana nyinte nyaye kingölono werkoyon Isaya ato kimwa lö, “Mi chi nyo tegho surkwen lö, ‘Agha ara Echotyon, oghïtenö ortïnechi.’ ”

⁴ Kiloköy nyu Yoana sïro cho kikïnapa puto tamas nko angwa mu akyomöy talam nko ponit.

⁵ Kïpkonchï pich nyinte cho kipkono Yerusalem nko okumpö Yudea kïmïkul nko koros cho kilekïto lalwa Yordan.

⁶ Kïnganyta chane ngokikwa, kupatisan Yoana chane ompö lalwa Yordan.

⁷ Otini kisïwa Yoana Parisaytin* nko Sadukaytin* cho chang kïpkonchini nyinte atökepatisan, kïlenchï, “Heywey moroyutchï! Ngo nyï kömwowokwa lö, omukekwa ochïwïtone sito Tororöt nyo ngwïnöy?

⁸ Agha nyu tïkwïn cho poru lö kyokötekwa ngokikwo

⁹ amolenchï kegh, möminye kïgh nyo omekwa, ompöwölo olentekwa, kïchï monïngo Apraam. Omwowokwa nyoman lö, muköy Tororöt kwighöy koghichete kilïkwï monïngo Apraam!

¹⁰ Kimi oywö kïpsach nyo töröy ighin pö ket. Kïtöröy ket anka tïkwïl nyo meyinönye akwa cho karamach akewirchï ma.

¹¹ Opötisönekwa ompö pögh tökuporï lö kokötekwa ngokikwo, wölo pïnï chi nyo lötunyan nyo pötisönekwa ompö Mïkulögh nyo Tïlil nko ma. Wow nyinte kïtïlanïn amömïchinanïnye ompö ntopchï nyinte kweghkachi.

¹² Tïng seröwontenyi nyo sero paghechi akïghömïtyini paghe töpotenyi, wölo pelo morïre ma nyo memisonye.”

Kipatisanata Yeso

¹³ Kingwïna nyu Yeso Kalilaya kutöngwï lalwa Yordan atökepatisan Yoana nyinte.

¹⁴ Wölo kimököy Yoana kïtöghöy lö, “Kö nyi nyo kepötisönanïn, irïpönyi nyu ingwïn wölo omitan lö ne?”

¹⁵ Wölo kuyokyï Yeso lö, “Chamanyi ye lenyoni, ompöwölo mïchinecha kepuntenö man anka tïkwïl lenyoni.” Kïcham nyu Yoana.

¹⁶ Akwotini kikipatisan Yeso kumuchö, kïngetunö pöghechay, kïnyini kiyata yïmö, kïsïwa Mïkulöwu Tororöt nyo kirökyï parakunyi le chepïrïm.

¹⁷ Atolapay kïlö kut nyo kingwïno yïm, “Werïnyan nyï nyo le chamanenyan, nyo ochömonan kegh nyinte tya.”