MATAYO 27 - PIPÏLIA

¹ Nyini kiyech, kïtuyö tïsï cho echön löwïr nko poyi pipö Yaudi tökïyar ngölyon nyo nömo Yeso tökïpar.

² Kïrata nyinte sïrïmtin akumït kïwö wölo mi Pilato nyo kipöytoy koronini.

Megha Yudas

³ Nyini kisïwa Yudas nyay kiwïchtö Yeso lö kikerwokyï Yeso kïma, kwotyechï kegh akuyoda kerpeschay le tömönut sömök kuyokyï tïsï cho echön nko poyi pipö Yaudi.

⁴ Kïlenchï, “Kaghan ngokï ompöwölo kowïchtan chi nyo melö kötïng lelut kepar.” Wölo kuyokyï pïchay lö, “Melö timecha ngalechona rara nyinte!”

⁵ Kïlösyï Yudas kerpeschay Kö pö Tororöt* akïlït sany kïwö kuket kegh.

⁶ Kïkwagh tïsï cho echön ropïyenichoni akïlö, “Ropïyeni kisön chï, melö chömwecha Kirurutköcho ketöne Kö pö Tororöt wölay kitöni kaplawachtin cho konu pich.”

⁷ Kikany kurwoch, kïchomnyechï lö nya kyala para chi nyo le Ighinto Tören atökïlïkwï wölo kïtïpchini to.

⁸ Nka nyoni tökekuro paranini nko nyete le ye “Para Kisön.”

⁹ Kïpïntö nyu ngölyonto werkoyon Yeremia nyo kilö, “Kicheng pich kerpes tömönut sömök, ropïyen cho kichomnyechï pipö Israel kwala nyinte,

¹⁰ akwala ropïyenichini para ighinto tören lenyini kimwowanïn Echotyon.”

Katep Pilato Yeso teput

¹¹ Kughyongö Yeso tawu pöytoghin Pilato, kïtep nyinte lö, “Kelenyi so ochï pöytoghinto pipö Yaudi?” Kïlenchï Yeso, “Kemwaghanyi.”

¹² Wölo kimeyokyïnye nyinte ngölyon tïsï cho echön nko poy ompö ngal cho kitep chane.

¹³ Kïlenchï Pilato, “Melïmenyinye so ngalechï löwïr ngöloneninyi pich?”

¹⁴ Wölo kimeyokyïnye Yeso ngölyon nyinte nyo le ompö akonga, kïtöngönchï pöytoghintö nyoman.

Kakirwokyï Yeso meghat

¹⁵ Kimi otöp nyo kipö pipö Yaudi nyo kichömchini pöytoghin osiswechoni kutyoköy chi nyo ratate asispa Pasaka,* chi anka tïkwïl nyo kösom chane.

¹⁶ Kimi osiswechoni chi nyo kiratate nyo kinkït pich löwïr nyo kikïkuro Parapas.

¹⁷ Nyini kïtuyö söpïchischini, kïtep Pilato chane lö, “Omökekwa ketyokwokwa ngo ompö pïchï le odeny? Yeso nyï kïkuro Kristo* anta Parapas?”

¹⁸ Kimwa lenyoni kunkït lö kitötö chane nyinte, ompöwölo kisösöy.

¹⁹ Akwotini kitökïtöpo Pilato ngacharu kirwok, kïyonta korkenyi ngölyon nyo kilenchï, “Meda kïgh chichona pö man, ompöwölo komighön nyoman amwa ompö kirwotïtogh ompö nyinte.”

²⁰ Kïkïnkïn tïsï cho echön nko poy söpïchini lö, “Atepa Pilato kutyak Parapas tökïkonï Yeso kepar.”

²¹ Kïtep pöytoghintö chane lö, “Ngo ompö pïchï le odeny nyo omökekwa ketyoköy?” Kuyokyï lö, “Parapas!”

²² Kïtep Pilato chane lö, “Odonane Yeso nyï kïkuro Kristo?” Kïlö chane löwïr, “Nya kewudochï kimurtöwon.”

²³ Kïtep Pilato lö, “Ompö ne, kegh ne nyo gha?” Kuteghyö tya lö, “Nya kewudochï kimurtöwon!”

²⁴ Otini kisïwa Pilato lö mökunyiwunye kïgh ngalechi akirich kwar kegh pich, kïcheng pögh akuwunö morichi tawu söpïchoni akïlö, “Motïngetanye lelut ompö megha chichï pö man! Opöyunö kegh akwane!”

²⁵ Kuyokyï söpïchay kïmïkul lö, “Nya kwamecha kisönkachi akwam monecha!”

²⁶ Kutyokyï nyu Pilato chane Parapas ompö chela, otini kiwany Pilato kïmuny Yeso, kutötö kewudochï kimurtöwon.

Köpirönö askarin Yeso

²⁷ Atolapay kumït askarino Pilato Yeso kutang kö pö soch, kïpka söpïch pö askarin kuwit nyinte.

²⁸ Kuchïrut nyinte akulokyï kolikö nyo pïrir,

²⁹ akïnöpchï tenta kato akulokyï mötïnyi akutö techan kïnama ewunyi nyo pö tagh akïkïtïngchï tawunyi kïnyerera kilentöy, “Takwes, Pöytoghinto pipö Yaudi!”

³⁰ Kïsïngwïlchï akïcheng lïkay kukoskosa möt.

³¹ Kikany kuwany kïnyerera, kïngwïsa sïranay akulokyï sïrokachi akumït kïlït kiror kïpa kewudochï kimurtöwon.

Kakïwudochï Yeso kimurtöwon

³² Akwotini kimi kïpetöy, kïtuyeghö chi nyo kingwïno koro Kurene nyo kikïkuro Simon, kuchikyï nyinte kïkasan kimurtöwonto Yeso.

³³ Kïpka ntökwit ato kïkuro Kolkota nyo ato kïwaghach kelentöy, “Kowo Möt.”

³⁴ Kutönö nyinte atoni dipay* cho kikituyö nko tïkwïn cho ngwonöch, wölo nyini kichamcham Yeso kïmökïghanye.

³⁵ Otini kiwany kïwudochï Yeso kimurtöwon, kïpöghisyeghö chane söker kupar sïrokachi,

³⁶ atolapay kumpur ngwïny kïrïp nyinte ompö otini.

³⁷ Kukir ngal cho kikirwokyineghö nyinte akutö mötïnyi parak. Kikikir lö, “Nyï kï Yeso, Pöytoghinto pipö Yaudi.”

³⁸ Kiwudochï chane nyinte kimurtöwon nko pich odeny cho le mosï. Kiwudochï anka ewu tagh kewudochï anka ewu löt.

³⁹ Kukworyö pich Yeso cho kiweröy otini akupirpiröy mötöwekwa kïlentöy,

⁴⁰ “Nyi nyay kilentöy ongongöy Kö pö Tororöt, atek ompö osis sömök! Sörune kegh airökunö kimurtöwon ato ichï Wero Tororöt!”

⁴¹ Kukworyö tïsï cho echön ngalechoni nko koneti kirurut tïkwïl, kïlö,

⁴² “Kisörï pikö walaka akïmemukönye kïsöru kegh! Pöytoghinto Israel nyinte, nya kïrökunö kimurtöwon ye atökeghanacha nyinte.

⁴³ Kitwoytoy kegh nyinte Tororöt, nya kïsörï Tororöt nyinte ye ato chömo kegh nyinte, ompöwölo kilö. Ochï Wero Tororöt?”

⁴⁴ Kukworyö tïkwïl pkatischini kikïwudochï kimurtöwon nko nyinte.

Megha Yeso

⁴⁵ Nyini kighyö asis kulum tuwïn kor kïmïkul, ntökïtenö kwitïta satïn mut nko angwan.

⁴⁶ Nyini kïtïta satïn mut nko angwan, kutegh Yeso tya lö, “Eloy, Eloy lama sapaktani?” Ato kïwaghach kïlentöy, “Tororötïnyu, Tororötïnyu, kölö ne tepïstanïn?”

⁴⁷ Kïlïm pikö walaka cho kighyongo otini, kïlö, “Atere köny kuröy Eliya!”

⁴⁸ Kurïp chi akong ompö chane kïwö kïcheng kïgh nyo lata rotïn akulut dipay cho ngwonöch akïrötyï kïröyö wal akutö tökïgha.

⁴⁹ Kïlö pikö walaka, “Pïstenö tökesïwena lö ngwïnöy Eliya kïsöru nyinte!”

⁵⁰ Kutegh ngat Yeso tya, atolapay kïngat akïma.

⁵¹ Kïkarera ananka nyo kiporöy Kö pö Tororöt kïlïkwï odeny, kïngeta parak ntökwit ngwïny. Kurïngring korö akïkörerisyö ghatoy.

⁵² Kïyotisyö parsïkontinö tïkwïl, kututu pipö Tororöt cho chang cho kikïmeghö.

⁵³ Otini kingetunö chane parsïkontinekwa, otini kikututï Yeso kïpa kïlïtöy kanasyan nyo tïlil, kïsïwa pich cho chang chane.

⁵⁴ Otini kisïwa wowïn pö askarin nko pich cho kimi nko nyinte kïripöy Yeso wölo kirïngringtö ngwïnya nko ngalechini kighisyö, kuwöghisyö nyoman akïlö, “Kïlechï Wero Tororöt chichï nyoman!”

⁵⁵ Kimi atoni korï cho chang cho kitopöno wölo low, cho kirïpuna Yeso Kalilaya, kimi chane kïpöghisyechini nyinte.

⁵⁶ Kimi kwenu pich Marya Makdalena nko Marya yoto ompö Yakopo nko Yosep nko yoto werpö Sepedayo.

Kakïtïp Yeso

⁵⁷ Nyini kimön, kungwïna chi Arimatea nyo kile sïkön nyo kïkuro Yosep, ki chi nyo kile kinetana Yeso tïkwïl.

⁵⁸ Kïwechï Pilato akïsom kiwo kïror por pö Yeso. Kïmwatïta Pilato ketö nyinte.

⁵⁹ Kwip Yosep poray akïnonoghchï sïra nyo rel

⁶⁰ akulut pïrïmpenyi nyo rel nyo kitökïpölo ghat osiswechoni, atolapay kïmïlmïlchï kogh nyo wow kïkar kuketo pïrïmpon akïwechï kegh.

⁶¹ Kimi atoni Marya Makdalena nko Marya nyay anka kumpuröy ato kïtopönö pïrïmponini.

Ripinto pïrïm

⁶² Ato mi asïyechu, asispa Sapato,* kïpa tïsï cho echön nko Parisaytin* wölo mi Pilato

⁶³ akïlenchï, “Kïmicha echotyon, kenonöy lö kimwa kiyay lïsinto kïtomö kïma lö, ‘Otutunonan meghat ompö osis sömök!’

⁶⁴ Mwatïtena nyu kerip pïrïmpe lasiny ntökïtenö kuwer osiswechini le sömök atömachor kinetankachi akïlenchï pich kikututï nyinte. Yetu nyu lïsata nyo pö löt kïsir nyay pö tagh.”

⁶⁵ Kïlenchï Pilato chane, “Otïngetekwa ripï, ape oripsyenö lasiny le wölo omuktokwa.”

⁶⁶ Kïnget pïchay akïpa pïrïmponay akutö machey parakunyi akutö askaryon kïrip.