MATAYO 24 - PIPÏLIA

¹ Kïngeta Yeso Kö pö Tororöt akwotini kitö kïwetöy, kïpkonchï kinetankachi akuporchï wölo kikïtekta Köyini pö Tororöt.

² Kuyokyï Yeso lö, “Osïwïyekwa teksyonete kïmïkul nya? Omwowokwa nyoman lö möminye kagh ompö akonga nyo kïpïsyini kughyongo parakuto kada anka, kïwirchini ngwïny löwïr.”

Kisusut nko kichopata kong

³ Akwotini kimpuröy Yeso kutïng pö Arol, kïpkonchï kinetankachi akïtep ompö sison lö, “Mwowecha köny lö oyï ato ighisyot ngalechï akï ne nyo poru lö ketïta ato ingwïnenyi nko ato lïku sörömu ngwïny?”

⁴ Kuyokyï Yeso chane lö, “Orip kegh tömölïsak chi.

⁵ Ompöwölo pkonöy pich ompö kaynenyan cho lentöy, ‘Ochan Kristo,’* akïlïs pich cho chang.

⁶ Olïmekwa ngala poryotïn nko putintöno poryotïn. Orip kegh motyö, ompöwölo itu ngalechoni nyo mötïny, wölo meporucha ngalechoni lö kikwitïta sörömu ngwïny.

⁷ Ompöwölo setyini kegh puntonï akïporyö pöytoghi pöyunöt anka nko pöyunöt anka. Itu kömeywok nko potanata ngwïny ompö woptin löwïr.

⁸ Karkegh tïkuchoni löwïr nko kïghöto lusyogh.

⁹ “Kïnömekwa tökechopekwa kong aketïghokwa. Töghokwa koroswö löwïr ompö ani.

¹⁰ Pïstoy osiswechoni pich cho chang kighanatengwa akïwïchtö kegh chane akurey kegh.

¹¹ Atolapay kuchumï werkoyi putintön cho möngörï kïlïsöy pich cho chang.

¹² Wïsöy nyu chomnyo pich cho chang ompöwölo töso ghöyityö.

¹³ Wölo ato mïkukön chi ntökwït söröm, kesöru.

¹⁴ Wölo kyomchini Lökoy cho Karamach pö Pöyunöto Tororöt ngwïny kïmïkul tökïlïkwï söwintön ompö pipö Punton löwïr kwitï nyu sörömu ngwïny.

Kiwongunöt nyo wow

¹⁵ “Ato asïwekwa nyu ‘Ghöyïn pö otyogh pö Kinyarat,’ nyo kimwa werkoyon Daniel kughyongö ato tïlil. (Akanya kïpköchï chi nyo somönöy ngalechï!)

¹⁶ Akany kïryoghchï pich cho mi Yudea kutïngkot.

¹⁷ Makany kïrökwï chi nyo mi pörkö tökïsuw tïkuchi cho köpïsyï konyi,

¹⁸ amakany kïmïla chi nyo mi par tökïsuw sïrenyi.

¹⁹ Heywey wechï ghöyitu ompö osiswechoni ompö kor cho mirsïyi nko cho rerïyöy monïng!

²⁰ Asagha Tororöt atömalïkwï osiswechoni oryöghöy osiswo kaghïtan anta asispa Sapato!*

²¹ Ompöwölo yetu osiswechoni ghöyïn kïtïl anka tïkwïl kïngeta otini kikïtowï ngwïny ntökïtenö nyete le ye amelö tökungwïnöy anka ngat.

²² Wölo ntökimelö kikingörïngit osiswechoni, kitömöminye chi nyo kïsöru nyonikïny. Wölo kingörïngitöy osiswechoni ompö kïlanpa Tororöt.

²³ “Kïlenyona nyu, ato lenchokwa chi, ‘Arose anyï Kristo,’ anta lenchok, ‘Anyinö mi otinö,’ maghan.

²⁴ Ompöwölo chumu pich cho kuro kegh Kristo ompö putintön nko werkoyi putintön, ighöy chane kiporut cho echön nko töngönchintin tö ato muko, kïlïsöy ompö chini le kïlanpa Tororöt.

²⁵ Alïma nyu, komwowokwa kïtomö kwitï ngalechï.

²⁶ “Anta ato lenchokwa chi, ‘Arosa, anyinö mi surkwen,’ mapa wölini, anta lenchokwa, ‘Arose, anyï ghïpo yi,’ maghan.

²⁷ Ompöwölo ngwïnöy Wero Chi le kiryal nyo otini keryala kongasis kesöchini ta.

²⁸ “Ryomo mötonywö wop anka tïkwïl wölo mi kïgh nyo kama.

Kingwïnata Wero Chi

²⁹ “Otini kewonyö kinyarilata osiswechoni, meghöy asis amelïwunye arawa ngat nyonikïny, chïnuno kokel yïm aketimtimöy owesyotïno yïm.

³⁰ Atolapay kïrumunö kiporunöto Wero Chi yïm. Riryöt nyu puntoni ngwïny löwïr otoni söchï Wero Chi kungwïno poltoy nko owesyö nko ororyö nyo wow.

³¹ Yontoy nyinte malaykenichi nko kontï nyo chöghöy tya kïghamïtyï kïlankachi kïngetunö wop anka tïkwïl ompö ngwïny, kïngetunö yïm söröm nko söröm.

Körkeyïn pö moköngwö

³² “Anetene kegh körkeyïn pö moköngwö nyo otini kasanach morichi akusïl sökechi onkïtukwa lö, karikï osiswo kitokot.

³³ Kïlenyoni tïkwïl otini kasïwekwa tïkuchï löwïr, onkïtï lö karich kwitï Wero Chi, mi kukat.

³⁴ Omwowokwa nyoman lö mewerönye pïnete kïtomö kwighisyö ngalechï löwïr.

³⁵ Weröy yïmö nko ngwïny, wölo meweröcha nyonikïny ngalechan.

Möminye chi nyo nkït asista anta saye

³⁶ “Wölo möminye chi nyo nkït ato itu asisini anta saye, kïrkegh malayken cho mi yïm anta Weri, poto Paponyan onkït.

³⁷ Lenye kingwïnata Wero Chi wölo kilata osiswo Noa.

³⁸ Otini kitomönye kïnyïghï pögh ngwïny, kï kimi pich kwomisïyi akïgheghsïyi, ki kensïyi pich akuyiltoy monekwa ntökïtenö kwit asisini kilït Noa meli ori,

³⁹ akimenkïtcha lö ekine nyo kigha ntökïtenö kïnyïghï pögh ngwïny akuchut pich löwïr. Lïku nyoni nyu otini ngwïnöy Wero Chi.

⁴⁰ Mi pich odeny par atoni, kemït anka kepïstö anka.

⁴¹ Ngoghöy korï odeny pagh, kemït anka kepïstö anka.

⁴² Oripsyenö nyu, ompöwölo monkïtökwanye lö ekwasis ne ato itu Echotyontenkwa.

⁴³ Wölo anane ngölyontonï: ntökenkït chito kot lö sa ne nyo ngwïnöy chorin, kötempuröy kïripsïyi melö kötöpïsyini chorin kïwiröy konyi.

⁴⁴ Kïlenyona, otïpinö kïpsach, ompöwölo itu Wero Chi sa nyo melö kokönekwa.”

Mötworin nyo ghanate nko nyo melö meghanate

⁴⁵ Kulet Yeso tagh kïlö, “Ngo mötworintö nyo ghanate akï ngöghom nyo töni echotyontenyi kïpayta pikachi atökutö mötworichi omisyengwa otini kömïchini ketö?

⁴⁶ Soyönote mötworintö nyo nyoru echotyontenyi ighöy lenyini ato mïla!

⁴⁷ Omwowokwa nyoman lö töni echotyontenyi mötworintononi kughyongchï tïkuchi löwïr.

⁴⁸ Wölo ato mötworin nyinte nyo gha, kunonchini kegh ompö mïkulöwunyi lö, ‘Tökuropu echotyontenyan ompö osis cho chang,’

⁴⁹ kutor nyu kïmuny mötwori walaka akwomisyö akïgheghsyö nko ptamasis.

⁵⁰ Mïlo echotyonto mötworintononi ato mekönönye, akwompö sa nyo menkïtnye.

⁵¹ Tïghöy mötworintononi nyoman le wölo kïtïghtoy chepölköstin, akutö wölo riryegho pich akïnyagh kelat ompö kichïr.