MATAYO 23 - PIPÏLIA

¹ Kïmwochï Yeso söpïchis cho kimi nko kinetankachi lö,

² “Tïngeto man koneti kirurut nko Parisaytin* kïmwowï kïgh nyo mwoghöy Kirurut pö Musa.

³ Kïlenyona ater arïp kïgh anka tïkwïl nyo mwowokwa chane lö kighöy, wölo marïp ighisyewutkökwa, ompöwölo mwoghöy chane ngal amörïpöcha.

⁴ Rötyini pikö walaka pughway nïkisïntin cho echön amelö mököy chane lö tönama morïkwa kïsïtyï chane.

⁵ Ighöy ighisyewutkökwa löwïr lö tökïsïwa pich. Röto mötöwekwa nko ewunekwa angwoy cho kikikirchï Kirurut pö Tororöt akulach sïro cho koghöch akukarkar sïrokö lasiny!

⁶ Chömöy nyoman kumpuröy ngöcher cho pö konyït ompö wölo omisyegho pich cho echön akïchömöy ngöcherwo tagh ompö sinakokin

⁷ akïchömöy ketokwesöy chane ompö konyït, ompö donyö akekurö chane ‘Konetin.’

⁸ Wölo makany kekurenok, ‘Konetï,’ ompöwölo konetintenkwa kï akonga, ochikwa tupchö löwïr.

⁹ Amokurö chi anka tïkwïl, ‘Papo,’ ompö ngwïny, ompöwölo akonga Paponkwa nyo mi yïm.

¹⁰ Amakany kekurenok, ‘Echotyon,’ ompöwölo akonga Echotyontenkwa onkït nyoni kï Kristo.*

¹¹ Chi nyo wow ompö akwa, kïmïchini kïlïkwï mötworintekwa.

¹² Chi anka tïkwïl nyo syolöy kegh kerekuno, kïkany nyo rekuno kegh kesyolöy.

Katagh Yeso ngala lïsengwa

¹³ “Heywey akwa koneti kirurut nko Parisaytin! Lïsï! Kakarekwa pich kuka Pöyunöto Yïm, amolïtekwanye akwane amopïsini ompö pikö walaka cho kömököy kïlïtöy. [

¹⁴ Heywey akwa, koneti kirurut nko Parisaytin! Lïsï! Kakarteghekwa kegh köromnyö lö tökesïkö pöroyïn nyo osöro kor cho le mïsïktin tïkukwa asoghekwa sowut cho koghöch ompö lïsat! Osïkekwa ompö otöptonkwa nyoni kirwok nyo wow tya.]

¹⁵ “Heywey akwa koneti kirurut nko Parisaytin! Lïsï! Kapeghekwa nanamtin, aghyö koros löwïr lö tosïkö kighönin akonga akwotini konyorukwa aghakwa nyinte kunyara tya kïwö mapa kokay kïtïlakwa kïnyïl odeny!

¹⁶ “Heywey akwa kintöghoghï cho köryote! Akwa cho onetöy lö, ‘Ato walwala kegh Kö pö Tororöt,* kïmökïghnye, wölo ato ama muma koltin cho mi Kö pö Tororöt kïtïng nyinte pösön.’

¹⁷ Heywey kintöghoghichï köryote! Kunko nyu nyo pïchigh tya nya, koltin nya anta Kö pö Tororöt nyini ighöy koltinechini kïtïlilitu?

¹⁸ Onetekwa ngat lö, ‘Ato walwala chi kegh ato kïpelo amöros, kï melö kïgh wölo ato walwala nyinte kegh tyonyini kïpelo atoni, kïtïng pösön.’

¹⁹ Ochikwa köryote nyoman! Nyonö nyo pïchigh nya, tyonyini kïpelöy nya anta otini kïpelo amörostin tökwigh tyonyini kïpelöy kïtïlilit?

²⁰ Kïlenyona ato walwala chi kegh ato kïpelo amörostin, kï kewalwala tïkuchini mi parakunyi löwïr.

²¹ Ato ama nyinte muma Kö pö Tororöt, kïkama muma atoni akwomchï Tororöt muma tïkwïl nyoni mi atoni.

²² Kïkany kuwalwala kegh yïm, kikewalwala ngacharu Tororöt nko nyinte nyoni töpo ngacharunoni.

²³ “Heywey akwa koneti kirurut nko Parisaytin! Lïsï! Omökekwa otöne Tororöt kareranpa taman nyo pö amörostin nko pinsarin nko chira, wölo moyongekwanye kirurut cho echön lata: kitenat nko kisyonöt nko kighanat. Mïchinokwa anyagha agha chï kïny, kïrkegh melö kömïchini opïstenökwa chini walaka.

²⁴ Heywey kintöghoghï chï köryote! Osyorekwa kalalyan nyo mi pögh cho ogheghekwa, anyïkwïda tamas awey!”

²⁵ “Heywey akwa koneti kirurut nko Parisaytin! Lïsï! Omwötekwa kikompa nko sani wölo le sany kwanyï nyïghïtate masata nko cho kakïsara pich.

²⁶ Parisaytin cho köryote! Anyagha nyo pö tagh amwata kikompe nko sani ori atökïrelit sanyta tïkwïl.

²⁷ “Heywey akwa koneti kirurut nko Parisaytin! Lïsï! Alatekwa pïrïmpoti parsikontin cho kakitö munyan nyo rel sany kïrelachitu, wölo nyïghïtate oringwa koyo pich nko sïmnyon anka tïkwïl.

²⁸ Alatekwa nyoni tïkwïl, sïwïyokwa pich ompö sany lö pich cho karamach wölo kinyïghitokwa orinkwa lïsa nko ghöyityö.

Kingor Yeso kichopata kong nyo ngwïnöy

²⁹ “Heywey akwa koneti kirurut nko Parisaytin! Lïsï! Katekakwa parsikontin cho pö werkoy nko pipö man asïlosïl,

³⁰ alekwa, ‘Ntökikïmitecha osiswo papotïnecha, kitö melö kïghömtocha nko chane parata werkoy.’

³¹ Keporï nyoni nyoman lö ochikwa chamate lö ochikwa monïng pïchini kipar werkoy!

³² Aleta tagh nyu opuntenö ighisyewut pö papotïnekwa!

³³ Heywey moroyut chï otïngetö ngwonö! Omukekwa ochïwïtyegho kirwoko mapa kokay lö ne nya?

³⁴ Kïlenyona omwowokwa lö, oyonwokwa werkoy nko pich cho ngöghomöch nko konetï ataparakwa walaka awudochï walaka kimurtöwon amungö walaka sinakokin, anyaril kong chane ompö kanastinekwo löwïr.

³⁵ Tötomi löt kïchïnchokwa kirwoko nyarïl ompö pörsyo pipö man cho kikïmïlta kisönkökwa, kïngeta kepar Apel nyo kimötïnye lelut ntökïtenö kepar Sakaria wero Perakiya, nyay kyopörchikwa Kö pö Tororöt, kwenu atay Tïlil tya nko ato kïpelo amörostin.

³⁶ Nyo omwowokwa nyoman lö nyoru sitöt pïnete ompö ngalechoni löwïr!

Wechï chömöy Yeso Yerusalem

³⁷ “Heywey Yerusalem, Yerusalem nyo ipöröy werkoy aiwira koghïn pich cho köyonunyi Tororöt! Kyamachan kïnyïl cho chang omukyï aghamïtï piköku wölo omitan le wölo ghömïtyini kokoroch warechi köpepoy, wölo itaghanyi!

³⁸ Kakicholunyi ye nyu kongu kï kïratyan.

³⁹ Omwowunyi nyoman lö mesïwïyanïnyinye ngat ntökïtenö mwaghanyi lö, ‘Nya kusoyönö nyinte nyo ngwïno kaynata Echotyon.’ ”