MATAYO 21 - PIPÏLIA

¹ Otini kirich chane Yerusalem akwit ato kïkuro Petpake, tökepusta kutïng pö Arol. Kïyonta Yeso kinetankachi odeny kuntagha

² kïlenchï, “Ape atanga kanasyantaninö mi tawunkwa, otini katakwa onyorukwa sïkïryö nyo ratat nko wawenyi, atyakakwa akötwanïn.

³ Akwoto töp chi ntökïtepekwa kïgh, olenchï, ‘Mököy Echotyon chane,’ pïstonekwa nyinte lawel.”

⁴ Kighisyö choni tökïpïntö ngölyon nyo kimwa werkoyonta lö,

⁵ “Lenchinö kanasyanta Sayon,* Anyona pöytoghintengu ngwïnchininyi. Talase akungwïno sïkïryö, nko wawa sïkïryö nyo mïnïng!”

⁶ Kïpa nyu kinetanchay kwigh lenyini kimwochï Yeso chane.

⁷ Kïkötï sïkïryonay nko wawenyi, kukorkorchï pich sïrokökwa pataghu sïkïröyichini, kïpus Yeso akïtöpö.

⁸ Kukorkorchï sïrokökwa or söpïch nyo wow, kïtöröy pich walaka mori ket akukörkorchini arawet.

⁹ Kuteghyö söpïchtinö, akonga nyo kimi tawu Yeso nko anka nyo kirïpu löt akulïlighsot kïlentöy, “Nya kïsala Wero Daudi! Nya kusoyön Tororöt nyinte nyo ngwïno kayna Echotyon! Nya kïsala Tororöt nyo mi parak tya.”

¹⁰ Nyini kilït Yeso Yerusalem, kwar kegh pich ompö kanasyan akïtep kegh lö, “Ngo chichï nya?”

¹¹ Kuyokyï söpïchini lö, “Werkoyon Yeso nyo ngwïno Nasaret koro Kalilaya.”

Kiyona Yeso mïnchïrïs Kö pö Tororöt*

¹² Kïwö Yeso akïlït Kö pö Tororöt akutul pich löwïr cho kyolöy akwoltegho tïkwïn köyini, kïköpïghtö meseni pich cho kïwöghököy ropïyen nko ngöcherwo pich cho kyoltoy chepïrïmpen

¹³ akïlenchï, “Kirate ompö kirurut lö, ‘Kïkuro Konyan kö pö saghat.’ Wölo kaghakwa kïlïkwï köpöno pkatis!”

¹⁴ Kïpka chepkarotin nko cho kingwolsot Köyini, kusop Yeso chane.

¹⁵ Kinörekyö tïsï cho echön nko koneti kirurut otini kisïwa tïkuchini pö töngönchin kighöy nyinte kimi monïngö kïtumöy ompö Kö pö Tororöt kïlentöy, “Nya kïsala Wero Daudi!”

¹⁶ Kïlenchï pich Yeso, “Melïmenyinye so ngalechï mwoghöy chane.” Kïlenchï Yeso, “Owöy, olïman! Kichö tomönye so osomönökwa ngalechï kirate ompö Kikirut lö, ‘Keghanyi tengon nko mnyarkiltin kïkonï salat nyo tenate?’ ”

¹⁷ Kïpïstö Yeso chane akïngeta kanasyantanoni kutang Petaniya akïtöpö wöloni.

Köchïp Yeso moköngwö nyo kimötïnye akwa

¹⁸ Kyam kömöy Yeso tökwoghö ato kingwïnöy kutöngu kanasyan.

¹⁹ Kïsïwa moköngwö ompö ara or kamas kïwö kuros, puryö kïgh ketini kïpoto sökö kwïle. Kïlenchï ketay, “Meyinenyinye akwa kokay!” Kïyam moköngwonay lenyini.

²⁰ Nyini kïsïwa kinetankachi kïtöngönchï nyoman. Kïtep lö, “Kayamta onö moköngwonï lenyini lawel nya?”

²¹ Kuyokyï Yeso chane lö, “Omwowokwa nyoman lö ntökotïngetekwa kighanat nyo möminye tomtomönötö, kötomukekwa oghe le nyete kaghan akïmönyoninye onkït, kötomukekwa ompö ntölenchï kutïngï, ‘Ngeta aiwirchï kegh nanam,’ kötö igho lenyoni.

²² Akwoto oghönekwa, osïkekwa kïgh anka tïkwïl nyo osomekwa ompö saghat.”

Wowïn ne nyo tïng Yeso?

²³ Kïmïla Yeso ngat Kö pö Tororöt akwotini kinetisïyi kïpka tïsï cho echön nko poyi pipö Yaudi kïtep nyinte lö, “Ighonyi owesyo ngo ngalechï nya? Akï ngo nyo kökoninyi owesyonï?”

²⁴ Kïlenchï Yeso, “Otepokwa nyu tïkwïl ngölyon akonga nyo ato oyokwanïkwa, omwowokwa tïkwïl lö, owesyo ngo nyi oghonan ngalechï.

²⁵ Kingwïna yïm kipatisanata Yoana nya, anta kingwïna pich?” Kïngölonchï kegh chane opïn lö, “Kiyokyini ne ye nyinte? Ato kiyokyicha lö, ‘Kingwïna yïm,’ kïlenchecha nyinte, ‘Kwompö ne tömaghanakwa Yoana.’

²⁶ Kwoto kïlenchicha, ‘Kingwïna pich, kïmöngötunye chï nko söpïchï, ompöwölo kikughan pich löwïr lö werkoyon Yoana.’ ”

²⁷ Kuyokyï lö, “Mökinkïtöchanye.” Kuyokyï Yeso chane lö, “Kïmomwowokwanye tïkwïl wölo konyorchan owesyönï oghonan ngalechï.”

Körkeyïn pö wor odeny

²⁸ Kulet tagh Yeso kïtep chane lö, “Ononekwa lö ne nya, ompö chi nyo kitïng werkachi odeny nyo kiwö kïlenchï weri nyo wow, ‘Wïyö asisete werïnyu, igha kasï para sapipun.’

²⁹ Kuyokyï lö, ‘Mowetanye!’ Wölo kunonsyö ato le soya akïwö paranay.

³⁰ Kïwö chichay wölo mi weri nyo pö odeny akïtep le nyaye, kuyokyï lö, ‘Owöy owetan papo,’ wölo melö kitökiwö.

³¹ Ngo nyu nya werchï kwodeny nyo kigh machata kwanta?” Kuyokyï lö, “Nyay pö tagh.” Kïlenchï Yeso, “Omwowokwa nyoman lö nyoghöy kïlïtöy kwöghi surï nko cheporestin Pöyunöto Tororöt kïtïlekwa.

³² Ompöwölo kingwïnchokwa Yoana Kipatisanintö akuporwokwa ara man, wölo melö kyaghanakwa nyinte, wölo kighan kwöghi surï nko cheporestin nyinte, melö kyawaghakakwa mïkulöwekwa kïrkegh kyasïwekwa ngalechini löwïr, kïmelö kyaghanakwa ngalechi.”

Körkeyïn pö para sapipun nyo kikimönokyï ngori

³³ Kïlenchï Yeso pïchay, “Atere körkeyïntö anka. Kimi chi nyo kitïng parenyi nyo kikatkat sapipun, kuwach kasar kuwit kïtek wölo kïpïro sapipun kïlïkwï dipay* kïtek kïtar atolapay kumönokyï pich kingor akïrutö kor nyo low.

³⁴ Kïkany kwitïta osiswo sapipun, kïyonta sekeykachi kïpa kura pïchay kimönokyï nyinte par atökïsïkö chane kareranpa akwa.

³⁵ Kïnam pïchay sekeyichay, kïmuny anka, kïpar anka, kïwira koghïn anka.

³⁶ Kuyoktö chichay sekeykö walaka cho chang ngat kïtïl chay pö tagh, kwighchï pïchay mi par chane le nyaye.

³⁷ Ato mi lötï kïyonta werïnyi kïwö wölo mi pïchay, ompöwölo kilentöy, ‘Konyïtöy nyu werïnyan nyo mötïny!’

³⁸ Wölo otini kisïwa pïchay werïnyi kïmwochinchö lö, ‘Anyï werto chito par apkana kepara atökemïla tïkuchi!’

³⁹ Kïlenyona kïnam monïngay akuchut kïlït paranay pö sapipun sany akïpar.”

⁴⁰ Kïtep nyu Yeso pïchini lö, “Ekwato itï chi pö par ido ne nya pïchay kimonokyï par?”

⁴¹ Kuyokyï lö, “Pöröy chi pö par pïchini ghach ompö parat nyo gha akumönokyï paranoni pö sapipun pikö walaka cho töni nyinte kareranto akweko parenyi otini ketïta asispa ilö.”

⁴² Kïlenchï Yeso, “Tomönye so osomönökwa Kikirut atay lentöy, ‘Kiwaghaka koghay kitagh tekï kïlïkwï pchöri kö. Echotyon nyo kigh ngölyontononi, akï pö töngönchin ato kïsïwecha?’ ”

⁴³ Kïtas Yeso kïlenchï, “Kïlenyona, omwowokwa ye lö, kïchengenokwa Pöyunöto Tororöt aketö punton walaka cho yinöy akwechi. [

⁴⁴ Akwanka tïkwïl nyo pïtïni koghoni, keriyöy kïmïnchïrana akwoto chïnchï koghoni chi anka tïkwïl, kuropöy nyinte kïlïkwï terïtyon.”]

⁴⁵ Otini kiter tïsï cho echön nko Parisaytin* körkeyïntinechi, kunkïtï lö kingölono nyinte chane.

⁴⁶ Kïmach kïnam nyinte wölo kiwagh chane söpïchis, ompöwölo kikikuyit chane Yeso lö werkoyon.