MATAYO 19 - PIPÏLIA

¹ Otini kiwany Yeso kïmwa ngalechi löwïr, kïweghö Kalilaya kutang okumpö Yudea, lalwa Yordan antakwagh.

² Kïrïp söpïchis pö pich cho chang, kusop nyinte chane ompö wölini.

³ Kïpechï Parisaytin* kïtyam nyinte kïtep lö, “Mwowune köny, chömu kirurut kutyoköy chi korkenyi ompö kïgh anka tïkwïl nya?”

⁴ Kuyokyï Yeso lö, “Tomönye so osomönökwa Kirurut cho Tïlilöch lö nyinte nyini kigh chi kïngeta towunöt kï kigh ngetat nko korka

⁵ akïlö, ‘Nka nyï pïstoy chi kwanta nko kame akïnomnyö nko korkenyi kïlïkwï chane kwodeny por akonga.’

⁶ Kïlenyona, melö tö kwodeny chane ngat, wölo por akonga. Kïlenyona nyu melö tökupesyot chane cho kakutuyö Tororöt.”

⁷ Kïtep Parisaytin nyinte lö, “Kwompö ne tökïmwowecha Musa lö kitöni korka palalyanta kityakat atökeyon?”

⁸ Kuyokyï Yeso chane lö, “Kichömwokwa Musa atyaka korukwo ompö oghïghyo mïkulöwekwa. Wölo melö kilata nyoni kïngeta towunöt.

⁹ Wölo omwowokwa ye lö, ato tyak chi korkenyi, kïpoto ompö cheporesnan akwip korketö anka, kï kegh cheporesnan nyinte tïkwïl. Akï nyinte nyo ipöy korka nyo kaketyak, kï kegh cheporesnan.”

¹⁰ Kïlenchï kinetankachi nyinte, “Kwoto lata nyoni ngala chi nko korkenyi, kïmömïchininye kekensyö.”

¹¹ Kuyokyï Yeso lö, “Melö pich lapay cho toköy kinetutchï kïpoto pich cho kakutö Tororöt.

¹² Ompöwölo mi ortïna cho chang cho ighöy pich memï kïkensyö: mi walaka cho kikïyï lenyoni, kïmi cho kigh pikö walaka lenyoni, kïmi cho machamcha kïkensyö akwompö Pöyunöto Yïm. Anka tïkwïl nyo muköy kïtoköy kinetutyononi akany kïtak.”

Kesoyön Yeso monïng cho mïnkech

¹³ Kumïtyï pich monïng Yeso tökukanagh ewunechi parakungwa akïsoghchï, wölo kïtagha kinetankachi pïchini.

¹⁴ Kïlö Yeso, “Opïsunö monïng kïpka wölo omitan motögho, ompöwölo pö Pöyunöto Yïm pich cho lata monechï.”

¹⁵ Kukanagh nyu ewunechi akïnget kiwechï kegh.

Chi nyo le sïkön

¹⁶ Kïwechi chi astanka Yeso akïtep lö, “Konetin, mïchini aghan kïgh ne nyo karam tonyorwan söpon pö kokay?”

¹⁷ Kïlenchï Yeso, “Ompö ne tetepenaninyi kïgh nyo karam nya? Möminye nyo karam kïpoto Tororöt. Ato imökenyi telïtö söpon ikaman kirurut.”

¹⁸ Kïtep chichay lö, “Kirurut chono?” Kïlenchï Yeso, “Chay lentöy, ‘Mepar chi, megh cheporesnan, mechorsyö, mesöwintönchï ngala putintön,

¹⁹ itech kon nko komöt aicham pöröryengu le wölo ichömtoy kegh.’ ”

²⁰ Kuyokyï chichay lö, “Kyarïpan kirurutchï löwïr, ne nyo tökïrörchinanïn ngat?”

²¹ Kïlenchï Yeso nyinte, “Ato imököy tetena, iwö iyalta tïkuku cho itïng aitö ropïyeni mey atesïkö kaplawach ompö yïm aingwïn irïpanïn.”

²² Otini kilïm mïrönonay lenyoni kïma mu, kïwö ompö nörekyö ompöwölo ki makos nyinte nyoman.

²³ Kïlenchï Yeso kinetankachi, “Omwowokwa nyoman lö aghïgh tya ompö sïkön kïlït Pöyunöto Yïm.

²⁴ Omwowokwa ngat lö kwïskwïs tya kïlït tamas kongpa södök kïtïl kïlït sïkönö Pöyunöto Tororöt.”

²⁵ Kikany kïlïm kinetankachi lenyoni, kïtöngönchï nyoman akïtep lö, “Ngo nyu nya nyo kimuköy kesöru?”

²⁶ Kura Yeso chane latok akïlenchï, “Memukonye ngölyontonï ompö pich, wölo muko kïgh anka tïkwïl ompö Tororöt.”

²⁷ Atolapay kïlö Petro, “Kïnyorucha ne nyu nya chï kakïpïstö tïkucho löwïr akerïpinyi?”

²⁸ Kïlenchï Yeso chane, “Omwowokwa nyoman lö ato ngwïn Wero Chi kïtöpö ngacharunyi pö paytagh ompö ororyenyi ompö kor nyo rel, apkanakwa nyu cho orïpanïn kï taman nko odeny ompur tïkwïl ngöcherwo paytagh arwokyï ortïna pipö Israel kïtaman nko odeny.

²⁹ Akwanka tïkwïl nyo köpïstö korichi anta werkökwa anta tipikwa anta kwanta anta kame anta monechi anta parenichi ompö ani, kïnyoru walaka kïnyïl 100 akïnyorï söpon pö kokay.

³⁰ Ompö wölo lïku pich cho pö tagh cho pö löt akï lïku cho löt cho pö tagh.”