MATAYO 18 - PIPÏLIA

¹ Kïpkonchï Yeso kinetan kachi akïtep lö, “Ngo nya nyo wow ompö Pöyunöto Yïm?”

² Kïkur Yeso monïng akïkany kughyongö tawungwa

³ atolapay kïlö, “Omwowokwa nyoman lö ato mowöghökisyekwanye akarkegh nko monïng cho mïnkech, kïmolïtekwanye Pöyunöto Yïm nyonikïny.

⁴ Chi anka tïkwïl nyo ipöy kegh ngwïny le monïngï, kï nyinte nyo wow ompö Pöyunöto Yïm.

⁵ Akwanka tïkwïl nyo toköy monïng akonga nyo lata nyete ompö kaynenyan, kïtokanïn.

Tïkwïn cho mïtyini pich ngokï

⁶ “Ato töp chi ntökïlelchï akonga ompö monechï mïnkech kïpïstö kighanatengwa nyo tïng ompö ani kötö mïchini kerötyï katïnyi koghpa pagh nyo mamïnïng akewirchï nanam ori.

⁷ Heywey ngwïny nyo pkono työmut cho ighöy pich kïpïstö kighanatengwa! Pkonöy tyomut nyo mötïny wölo heywey chichini pkono!

⁸ “Kïlenyona ato ighïn ewungu anta keltöngu igha ngokï, idingtö aiwirta! Karam ompö nyi nyorunö söpon kïpuryö egh anta kel kïtïl mitenö nko moriku kwodeny anta kelyeku kwodeny akewirchin mapa kokay.

⁹ Akwoto ighïn kontangu igha ngokï, iködötï aiwirta! Karam ompö nyi nyoruno söpon ichï toler kïtïl mitenö nko konyiku kwodeny akewirchinyi mapa kokay.

Körkeyïn pö kech nyo kipot

¹⁰ “Orip kegh tömasas nyo le ompö akonga ompö monechï mïnkech. Ompöwölo omwowokwa lö mi malaykenikwa yïm kïnomnyö tawu Paponyan nyo mi yïm. [

¹¹ Ompöwölo kingwïn Wero Chi kïsörï pich cho kikupotyö.]

¹² Olentekwa ne nya? Ighöy ne chi nyo tïng kechir 100 ato pot nyo le akonga, kïpïsyini chinö le 99 achey akïwö kïyarata nyinö le akonga kepot.

¹³ Otini könyorï, omwowokwa nyoman lö ngörökyini tya kechanini le akonga kïtïl chay melö kepotyö le 99.

¹⁴ Kïlenyoni tïkwïl, mömökönye Paponkwa nyo mi yïm lö tepot nyo le ompö akonga ompö monechï mïnkech.

Wölo kingöroktoy kegh

¹⁵ “Ato lelun werïngwo, iwö imwochï nyinte lelutyenyi ompö sison akwa opïn. Ato terunyi, kï kesörunyi werïngwo.

¹⁶ Wölo ato möterunyinye, imït chi akonga anta pikö walaka odeny kïpa nko nyi atökechïchim ngölyon anka tïkwïl ompö kutïwa söwï odeny anta sömök.

¹⁷ Wölo ato möterchïnye chane, imwochï kanisa. Kïkany ato möterchïnye kanisa, oyit nyu nyinte kïkarkegh nko chi nyo menkïtnye Tororöt akïkarkegh nko kwöghinto surï.

Ketagha nko kechömchï

¹⁸ “Omwowokwa nyoman lö kïgh anka tïkwïl nyo orötokwa ngwïny, keröto yïm akï kïgh anka tïkwïl nyo otyokokwa ngwïny, ketyoko yïm.

¹⁹ “Omwowokwa ngat lö ato chomnyechï pich odeny ompö akwa kïgh anka tïkwïl nyo somöy ompö ngwïny, kwighchini Paponyan nyo mi yïm.

²⁰ Ompöwölo ato tuyö pich odeny anta sömök ompö otö akonga ompö kaynatenyan omitan kwenungwa.”

Körkeyïn pö mötworin nyo mölöstoghchïnye chitö anka

²¹ Atolapay kïwechi Petro Yeso akïlenchï, “Ato lelwanïn werïncha, olöstoghchinan nyinte kïnyïl ata? Kïnyïl mut nko odeny?”

²² Kuyokyï Yeso lö, “Ewo, melö kïnyïl mut nko odeny, wölo 70 kïnyïl mut nko odeny.

²³ Ompöwölo karkegh Pöyunöto Yïm nko pöytoghin nyo kimököy kunkïtu wölo kiriptoy mötworichi ropïyenichi.

²⁴ Nyo otini kitökïmi kwighöy lenyoni kemïtï nyinte akonga ompö mötworichi nyo kipösön ropïyen cho makïrar.

²⁵ Kimötïngnye mötworintonini ropïyen chonikïny cho kighoktegho pösöntanyi, kïlenyona kïmwatïta echotyontenyi kyalta kïlïkwï sekeyon, nyinte nko korkenyi nko monechi nko tïkwïn löwïr cho kitïng atökemï keghakta pösöntanyi.

²⁶ Kupïtyï mötworintonay kelyo echotyontenyi akïlenchï, ‘Mïkukönwante atoghokun pösöntöngu kïmïkul!’

²⁷ Kusyonchï echotyontononi, akïmötochï ghosyonini akïpïstö kïwechï kegh.

²⁸ “Wölo kïngeta mötworintonay ataye akïtuyeghö mötworintengwa anka nyo kighoköy nyinte ropïyen 100. Kïnam akuket kïlenchini, ‘Ghokunö pösöntönyan!’

²⁹ Kupïtï ngwïny mötworintonay kipöghisïyi tïkwïl akïsagh nyinte lö, ‘Mïkukönwante atoghokun pösöntöngu!’

³⁰ Wölo kimöternye akïnyinö kitömïkukönchini kutötö nyinte ketorchï chela ntökïtenö kïghokï pösönay.

³¹ Otini kisïwa mötwori walaka ngalechini kighisyö, kwotyö nyoman, kïpa akimwochï echotyontengwa ngalechini kighisyö.

³² Kïkur nyu echotyontenyi mötworintonini kïwö kö ori akïlenchï, ‘Ichinyi mötworin nyo gha! Kyomötowunyi pösönay kïmïkul ompöwölo kisaghaninyi,

³³ melö so kitömïchininyi syonchinö mötworintonï kemitenyi tïkwïl le wölini kyosyonchinyi?’

³⁴ Kïnarek nyoman echotyontonay akutötö nyinte kenyaril kong ntökïtenö kïghokï pösöntö löwïr.”

³⁵ Kuwany nyu Yeso kïlenchï pïchay, “Lenyoni asïyech wölo idoy Paponyan nyo mi yïm, chi anka tïkwïl nyo mölöstoghchininye werïngwa ompö mïkulöwunyi kïmïkul.”