MATAYO 17 - PIPÏLIA

¹ Kikany kuwer osiswö cho le mut nko akonga, kumït Yeso Petro nko Yakopo nko werïngwa Yoana kïpus kutïng nyo kogh chane opïn.

² Atolapay kuwenga Yeso ompö tawungwa. Kulïwï tokochunyi le asis, kïrelachitu sïrokachi löka.

³ Atolapay kïsïwa kinetanchay pö Yeso Musa nko Eliya kïngölonöy nko nyinte.

⁴ Kïlenchï Petro Yeso, “Echotyon, karam nyoman kemicha yi! Ato imökenyi, otekan yete tunkun sömök, nyengu akong kïpöyit anka Musa, kipöyit anka Eliya.”

⁵ Otini kitökïngölonöy, kulum polta chane nyo rel akungwïna kut poltonini nyo kilö, “Werïnyan Anyï nyo le chamanenyan nyo ochömonan kegh nyoman atera ngalechi.”

⁶ Otini kilïm kinetanchay kutinini, kïmïghyö akupïtyï ngwïny.

⁷ Kungwïn Yeso kinam chane akïlenchï, “Angeta, mowöghisïyi!”

⁸ Kïkany kïsyol konyïn, kïmökïsïwacha chi kïpoto Yeso onkït.

⁹ Kïkany otini kirökuno chane kutïng, kïkar kong Yeso chane lö, “Momwochï chi nyonikïny ngalechï kasïwekwa ntökïtenö kututunö Wero Chi ngwen.”

¹⁰ Atolapay kïtep kinetankachi nyinte lö, “Atay lentöy koneti kirurut, nyoghöy Eliya kwitu nya?”

¹¹ Kuyokyï Yeso chane lö, “Nyoman, nyoghöy Eliya kungwïnöy atökutenar tïkwïn löwïr.

¹² Wölo omwowokwa nyoman lö kikwitï Eliya amelö kinkïtï pich nyinte, wölo kwighchï chane le wölo kimachta. Kichopöy kong Wero Chi tïkwïl lenyoni ompö ewunekwa.”

¹³ Kunkïtï nyu kinetankachi lö kimwochini Yeso chane paraku Yoana Kipatisanin.

Kisop Yeso karöchïnin nyo kipote oy

¹⁴ Kïkany kïmïlonchö kïtuyö ngat nko söpïch pö pich, kïwechï chi akong Yeso akïkïtïngchï

¹⁵ akïlö, “Echotyon karam syonchinö werïnyan nyo ipote oy akïmi nko nyarïl nyo wow nyoman, ompöwölo wirchini kïgh ma kïnomnyö akïwirchini pögh kïnyïl cho chang.

¹⁶ Kyomïtyan nyinte wölo mi kinetanköku wölo melö kimï chane kusop nyinte.”

¹⁷ Kuyokyï Yeso chane lö, “Ne pïnta nyï mötïng kighanat akïchumpönote nya! Otöponan nko akwa nko oyï? Omïkukönan nko akwa nko oyï? Amïtuna montö yi omitan!”

¹⁸ Kuteghchï Yeso oyichay kïngeta monïngay, kïsöp nyinte lenyini.

¹⁹ Kïpkonchï nyu Yeso kinetankachi ompö ato le sirö akïtep lö, “Kölö ne tömökimukacha keyona oyichay nya?”

²⁰ Kuyokyï Yeso chane lö, “Ompöwölo mïnïng kighanatenkwa. Omwowokwa nyoman lö ntökotïngetekwa kighanat nyo tenö kösïghyonto ket pö aradali kötomukekwa olenchinö kutïngï, ‘Ngetena yi aiwö atara,’ kötöngetöy akömökïminye kïgh nyo memukonye ompö akwa. [

²¹ “Wölo möngetöcha oy cho lata chï kwïle, kïpoto ompö saghat nko kïrurat.”]

Kangalana Yeso meghenyi panto odeny

²² Otini kituyö nko kinetankachi ompö Kalilaya, kïlenchï Yeso chane, “Karich ketötö Wero Chi

²³ kepar, wölo kighöy nyinte kututu asisto sömök.” Kuwongwï chane nyoman.

Kwaghata surï cho pö Kö pö Tororöt*

²⁴ Otini kitï Yeso Kapernaum nko kinetankachi, kïpka pich cho kwogho pich surï ompö Kö pö Tororöt akïtepa Petro lö, “Tötoy konetintenkwa suru Kö pö Tororöt nya?”

²⁵ Kuyokyï Petro lö, “Ay, tötoy.” Kïkany kïlït Petro kö, nyini tomönye kïngalan, kïnya Yeso kïlö, “Simon, inonenyi lö ne nya nyo le nyi? Kwöghchini ngo surï pöytoghi ngwïny? Piko koronini nya, anta to?”

²⁶ Kuyokyï Petro lö, “To.” Kïlenchï Yeso, “Kwoto le nyona, kuporu lö möminye machata piko kore kïkwagh.

²⁷ Wölo merokonye kelelchinöcha pïchï. Kïlenyona wïyö tanga nanam aiwirchï pörköyö ori ainömï koghoghwö nyo nömöy pörköyononi nyo pö tagh aingany kut atenyorchinö ropïyon ateghaktena surucha kwodeny.”