MATAYO 16 - PIPÏLIA

¹ Kïpa Parisaytin* nko Sadukaytin* wölo mi Yeso, kimököy chane kutö nyinte ngöghöp, kïlenyona kïsom nyinte lö teporchï kiporunöt nyo ngwïno yïm.

² Wölo kuyokyï Yeso lö, “Otini kemön olekwa, ‘Peköy asïyech ompöwölo pïrir yïmö!’

³ Kïkany kuwas olekwa, ‘Ropönöy ompöwölo pïrir yïmö akï kïruntï.’ Ato onkïtökwa angoröy atöptino osis otini kotopönökwa yïm akwanyï momuchekwanye ntangor möchey pö otöptino osiswechï.

⁴ Pïn nyo gha nyo melö ghanate nyo yöröy kiporunöt! Wölo möminye kiporunötö nyo osïkekwa nyonikïny, kïpoto nyanya pö Yona.” Kïpïstö Yeso chane akïwechï kegh.

Mumara Parisaytin nko Sadukaytin

⁵ Otini kyoghyö kinetankachi nanamay kïlö kiros kichö kïwutyeghö chane kwip makatin.

⁶ Kïlenchï Yeso chane, “Orip kegh mumara Parisaytin nko Sadukaytin.”

⁷ Kumöl kegh chane opïn kïlentöy, “Kamwa so lenyoni ompöwölo melö kakipucha makatin.”

⁸ Kunkïtï Yeso wölini kimwoghtoy chane, kïtep lö, “Kölö ne tomölekwa kegh lö ompöwölo melö kakipucha makatin? Wechï mïnïng kighanatenkwa!

⁹ Tomönye so kïpköchokwa? Mononekwanye atanya kyamïnchïran makatin mut apagha mïrön 5,000, kyanyïghitakwa ngötunön köröpon ata?

¹⁰ Anta makatinechanya le mut nko odeny kyapaghan mïrön 4,000? Kyanyïghitakwa ngötunön köröpon ata?

¹¹ Kwompö ne tömöpköchokwa lö melö kongölononan ngala makatin? Oripenö kegh mumara Parisaytin nko Sadukaytin!”

¹² Atolapay kunkïtï kinetankachi lö melö kirirchini nyinte chane lö orip kegh mumar cho kïpöghisyegho ompö makatin, wölo kimököy chane kïripo kegh kinetut pö Parisaytin nko Sadukaytin.

Kamwa Petro lö, Wero Tororöt Yeso

¹³ Otini kit Yeso okumpö Kaysaria Pilipi, kïtep nyinte kinetankachi lö, “Lentöy pich ngo Wero Chi nya?”

¹⁴ Kuyokyï lö, “Lentöy walaka ichinyi Yoana Kipatisanin, kïlentöy walaka Eliya, kïlentöy walaka Yeremia anta akonga ompö werkoy.”

¹⁵ Kïtep Yeso chane lö, “Ekï akwa köny, olentekwa ochan ngo?”

¹⁶ Kuyokyï Simon Petro lö, “Ichinyi Kristo,* Wero Tororöt nyo satate.”

¹⁷ Kïlenchï Yeso, “Ichinyi soyönote, Simon Par Yona, ompöwölo melö kenkïtunyi ngalechï pö man ompö chïreryo ptangengmöt, wölo köngongunyi Paponyan nyo mi yïm.

¹⁸ Kïlenyona ye nyu, omwowunyi Petro lö, ichinyi ghat atekan paraku ghatyanï kanisenyan nyo memukönye ompö meghat kïrïntoy.

¹⁹ Okoninyi yotöwo Pöyunöto Yïm, kïgh anka tïkwïl nyo keratanyi ompö ngwïny keröto yïm tïkwïl, akï kïgh anka tïkwïl nyo kechömchinyi ompö ngwïny, kechömchini tïkwïl ompö yïm.”

²⁰ Atolapay kïtagha Yeso kinetankachi lö tömömwochï chane chi anka tïkwïl lö ki Kristo nyinte.

Kingalana Yeso kiwongunötenyi nko meghenyi

²¹ Kutor Yeso kïngeta atoni kuporchï kinetankachi lö, “Mïchinanïn owan atang Yerusalem atökuchopanïn kong poyï nko tïsï cho echön nko koneti kirurut ompö wölini, akïtïghanïn, wölo otutunan asispa sömök.”

²² Kumït Petro nyinte kamas akïchil, kïlenchï, “Möminye kïgh nyo igho ompö nyi, Echotyon. Melö imeghenyi.”

²³ Kïwaghaka Yeso akïlenchï Petro, “Ngetena tawunyan Onyötonï! Ichinyi tömölin, ompöwölo melö pö kinonutköku Tororöt, pö ptangengmöt!”

²⁴ Kïlenchï nyu Yeso kinetankachi, “Ato mököy chi anka tïkwïl kïrïpanïn kïmïchini kusalta kegh akïkasan kimurtöwontenyi akïrïpanïn.

²⁵ Ompöwölo chi tïkwïl nyo mököy kïsöru söpontanyi, kwighöy kupotöy, wölo anka tïkwïl nyo soltoy söpontanyi ompö ani kïsöru.

²⁶ Ompöwölo tïng chi kinyiwut ne ato nyorï ngwïny kïmïkul akupotö söpon? Möminye kïgh nyonikïny nyo muköy chi ntökwala söpontanyi.

²⁷ Ompöwölo, ngwïnöy Wero Chi atoni ompö ororyeto Kwanta nko malaykenichi atökïghokyï chi anka tïkwïl kïrïp kegh nko ighisyewutkachi.

²⁸ Omwowokwa nyoman lö mi pich yeteyi cho melö sïwïyi meghat ntökïtenö kïsïwa Wero Chi kungwïnöy ompö Pöyunötenyi.”