MATAYO 15 - PIPÏLIA

¹ Atolapay kïpkonchï Yeso Parisaytin* nko koneti kirurut cho kipkono Yerusalem akïtep nyinte lö,

² “Ompö ne tömörïpöy kinetanköku kinetut cho kikïsïkecha poy nya? Mewunöcha chane morïn kitomö kwomisyö le wölo keroko!”

³ Kuyokyï Yeso chane lö, “Kï kölö ne tachamenakwa kegh kinetutkökwa apeny Kirurut pö Tororöt?

⁴ Ompöwölo kimwa nyinte lö, ‘Techa kon nko komöt.’ Akwanka tïkwïl nyo swomöy kwanta anta kame akany ketïgh kïma.

⁵ Wölo onetekwa lö ato tïng chi kïgh nyo kemuköy kungöroko kwanta anta kame akïmwa lö, ‘Kiketö kïyï Tororöt.’

⁶ Kïmökurokonye kïkonyït kwanta ngat, lenye nyoni wölo osöstokwa ngölyonto Tororöt atarïpa kinetutkökwo akwane.

⁷ Heywey lïsichï! Kingor Isaya ngalekwa nyoman ato kimwa ompö parakunkwa lö lentöy Tororöt:

⁸ ‘Techanïn pïchï ompö kutïw kwïle, wölo lowöch mïkulöwekwa nko ani.

⁹ Soghanïn chane kwïle akunetöy kinetut pö pich, atökelentöy kirurutköchan!’ ”

Tïkwïn cho ighöy chi kïlïku sïmnyon

¹⁰ Atolapay kïkur Yeso tuyonay kïrïpöy nyinte akïlenchï, “Atere, akany kïpköchok!

¹¹ Molenchï kegh kïgh nyo röytöy kut nyo sïmnyonöy chi, kïpoto kïgh nyo ngwïno kutinyi nyo sïmnyonöy nyinte.”

¹² Kïpkonchï nyu kinetankachi akïlenchï, “Inkïtönyi lö kesus Parisaytin ngaleku nya?”

¹³ Kuyokyï Yeso chane lö, “Kïngöghtoy kösïghyon anka tïkwïl nyo ki makatkatnye Paponyan nyo mi yïm.

¹⁴ Opïstenökwa! Köryote chane akï kintöghoghi chepkarotin, kïkany kuntöghoghchï chepkarot chi nyo karote, kupïtyini pïrïm chane kwodeny.”

¹⁵ Wölo kïlenchï Petro, “Mwowecha köny kïgh nyo netöy körkeyïnoni?”

¹⁶ Kïlenchï Yeso, “Kichö tomönye so kïpköchokwa nko ye?

¹⁷ Tomönye so kipköchokwa lö kïgh anka tïkwïl nyo lïtöy kuti chi kïwetöy mu akurel sany!

¹⁸ Wölo tïkwïn cho pkono kut, kïpkono mïkulögh ori, tïkwïn cho lata choni cho sïmnyonöy chi.

¹⁹ Ompöwölo pkono mïkulöwu chi kinonut cho ghach cho lata pörchö nko cheporesnan nko chorsyö nko söwintöno putintön nko semsem.

²⁰ Tïkuchoni cho sïmnyonöy chi. Wölo kyomisyeghö morïn cho tomöcha kewun, kïmelö ighöy chi kïlïku sïmnyon.”

Kighanata korka

²¹ Kïngeta Yeso wölini akïwö kutang okumpö Tiro nko Sidon.

²² Kungwïnchï korka nyo pö Kanan nyo kimöngöy wölini akïrirchï nyinte lö, “Syonchante, Echotyon, Wero Daudi! Kep oy cheptönyan mi ye ato gha nyoman.”

²³ Wölo kimeyokyïnye Yeso nyinte ngölyon nyonikïny. Kïpkonchï kinetankachi kïsagh nyinte lö, “Mwochinö kïwechï kegh ompöwölo karïpecha akuteghöy tya!”

²⁴ Kïlenchï Yeso kokonay, “Kikïyonwanïn angwïn wölo mi kechir cho kipotyö cho pö pipö Israel kïpoto!”

²⁵ Kungwïn kokonay kïkïtïngchï kelyechi akïlö, “Echotyon, ngarakante!”

²⁶ Kïlenchï Yeso, “Mömïchininye kecheng omisyo monïng akewirchï kukïdin.”

²⁷ Kïlö kokonay, “Nyoman, Echotyon, wölo kwöghöy tïkwïl kukïdinö rarakan cho chïntegho mesa piko kïpö.”

²⁸ Kuyokyï Yeso lö, “Kamanï, itïngetenyi kighanat nyo wow! Nya kwigha lenyini imökenyi.” Kïsöp cheptanyi lenyini.

Sopöy Yeso pich cho chang

²⁹ Kïngeta Yeso wölini akïwö ntökwit nanampa Kalilaya. Kïpus kutïng akumpur ngwïny.

³⁰ Kïpkonchï söpïchtinö cho chang cho kimïtu pich cho kisipisyö porwöy nko chepkarotin nko cho kingwolsot nko kïmanytin nko pikö walaka cho chang cho kichiryot kutö tawu kelyechi, kusop Yeso chane.

³¹ Kïtöngönchï nyu pich otini kisïwa pich cho kile kïmanytin kïngölonöy, kïsöpchö cho kimeyta porwöy, kïpesta cho kingwolsot akurosïta chepkarotin. Kïsal chane Tororöt pö Israel.

Kapagh Yeso söpïch anka nyo wow

³² Kïkur nyu Yeso kinetankachi akïlenchï, “Osyonchinan pïchï, ompöwölo kötïpïyö chane nko ani osis sömök akïtomöcha kwam kïgh amochömanye oyontoy chane kïtomö kwomisyö, tömam kömöy chane kïpetöy kestonikwa.”

³³ Kïtep kinetanchay Yeso lö, “Akwonö wölo kïnyorchini omisyö nyo muköy pich cho tenö chï ompö wölï le surkwen?”

³⁴ Kïtep Yeso lö, “Otïngetekwa makatin ata nya?” Kïlenchï, “Mut nko odeny nko kaghagh tïkwïte cho mïnkech.”

³⁵ Kuchikyï Yeso tuyonay kumpur ngwïny.

³⁶ Atolapay kïcheng makatinechay le mut nko odeny nko kaghaghe akusoyön Tororöt kïmïnchïran akutö kinetankachi, kïcheng kinetankachi akutö pïchay.

³⁷ Kwam chane löwïr ntökïpïghyö atolapay kïghamït rarakan cho kingötï cho kinyïghï köröpon mut nko odeny.

³⁸ Ki mïrön 4,000 chane akimeyitnye chi kor nko monïng.

³⁹ Atolapay kuyomis Yeso kegh nko pïchoni. Kïwö kïlany meli kutang okumpö Makadan.