MATAYO 10 - PIPÏLIA

¹ Kïkur Yeso kinetankachi taman nko odeny akutö kimukat nyo yono oy akusop sömew anka tïkwïl nko kösotyö anka tïkwïl.

² Achï nyu kaynötutko pïchoni kiyoktö nyinte le taman nko odeny: nyo pö tagh kï Simon nyo kïkuro Petro nko werïngwa Andrea nko werpö Sepedayo odeny, Yakopo nko Yoana nko

³ Pilipo nko Partolomayo nko Tomas nko Matayo nyo kile kwöghinto surï nko Yakopo wero Alpayo nko Tadayo nko

⁴ Simon nyo pö Kanan nko Yudas Iskariote nyo kïwïchtö Yeso.

Ighisyo kiyoktoghichay le taman nko odeny

⁵ Kiyonta Yeso pïchoni le Taman nko Odeny akïlenchï, “Mapa koro punton amolït kanasyan anka tïkwïl nyo pö pipö Samaria.

⁶ Wölo kaykay ape wölo mi pipö Israel cho kakupotyö le kechir.

⁷ Ape amtena lö, ‘Kikïrikï Pöyunöto Yïm.’

⁸ Osopö pich cho chirsot agh cho kïmeghö kututu asop pich cho kyam psenkwet, ayon oy kïngeta pich. Kyonyorukwa kwïle, otötenö nyu kwïle.

⁹ Mop koltin anta ropïyen anta kerpes ompö mïlotwekwo

¹⁰ amop mïloto okörö ato orutoy anta syatin odeny anta kwegh anta lïkïp, ompöwölo mïchini kïsïkö chi omisyö pöghisyenyi.

¹¹ “Otini katakwa kanasyan nyo wow anta nyo mïnïng amar chi nyo chömöy kïtochokwa, ampur nko nyinte ntökïtenö angetena atoni.

¹² Akwotini kolïtökwa kö atakwes piko köyoni.

¹³ Ato tach piko köyoni takwestankwa, kïtöpo kalyenkwa nko chane, wölo ato melö katachekwa chane, akany kïmïla kalyenkwa wölo omitekwa.

¹⁴ Akwato mi kaw anta kanasyan nyo matachakwanye anta ter ngalekwa anget apartegha terïtyon kelyekwo.

¹⁵ Omwowokwa nyoman lö, syonchini Tororöt asispa kirwok tya pipö Sodoma nko cho pö Komora, kïsir piko kanasyantanoni!

Itu kichopata kong

¹⁶ “Oyontonokwa ye nyu le kechir ompö kwenu suyï. Ongöghomöchitunö le moroyut, atölosöchitu le chepïrïmpen.

¹⁷ Orip kegh, ompöwölo pkonöy pich cho nömokwa akumïtyokwa ka kirwok, mungokwa chane ompö korikwa pö sowut.

¹⁸ Mïtyinokwa chane tawu pöytoghï cho mïnkech nko cho echön ompö kaynenyan atomchinö pïchoni Lökoy cho Karamach nko pipö punton tïkwïl.

¹⁹ Otini kemïtyokwa chane wöloni le ka kirwok, mosus kegh lö, ekemwoghöy ne anta kïmwoytoy onö, konokwa Tororöt ngölyon nyo omwoghekwa.

²⁰ Ompöwölo melö chikwa ngalechini omwoghekwa, wölo pkono Mïkulöwuto Paponkwa nyoni ngölonöy ompö orinkwa.

²¹ “Wïchtoy pich werkökwa kerwokyï atökepar akwighöy papotïnö lenyoni tïkwïl ompö monekwa. Ngetyini monïngö yiyikwa akïwïchtö chane kepar.

²² Nguyokwa pich tïkwïl akwompö ani. Wölo anka tïkwïl nyo ghyongtoy ntökwit söröm, kesöru.

²³ Kïkany kunyarilakwa pich kong ompö kanasyan akonga, oryöghchï kanasyante anka. Omwowokwa nyoman lö mowongekwanye ighisyewutkökwo löwïr ompö kanastina Israel kïmïkul kïtomö kïmïla Wero Chi.

²⁴ “Melö wow nyo kinetöy kïtïl konetintenyi, amöwownye mötworintö kitïl echotyontenyi.

²⁵ Nyo mïchini kinetan kïtöpö le konetintenyi, kïtöpö mötworintö le echotyontenyi. Akwoto kurö chane chito kot, Pelsepul,* kïmïnchini nyu chane, moneko köyoni kaynötut cho ghach tya.

Ngo nyo mïchini kewagh

²⁶ “Kilenyona, mawagh nyu pïchoni. Möminye kïgh nyo tïpote nyo melö kïwösu, akï möminye kïgh nyo wïngate nyo mökiporunye.

²⁷ Ngölyon nyo omwowokwa ompö tuwïn amwatïta ompö löpoyïn, kïkany kïgh nyo olïmokwa sison amwatïtegha pörkö.

²⁸ Amawagh chane cho pöröy por akïmemuköcha ntökïtïgh söpontö, wölo awagha Tororöt nyo muköy kuwuröy por nko söpontö ompö mapa kokay.

²⁹ Kimuköy kyolo alurïtin odeny senten angwan akï möminye ompö akong ompö chane nyo chïnchini ngwïny akïtomö kïchömchï Paponkwa nyo mi yïm.

³⁰ Wölo yitote chini le putekwa pö möt löwïr.

³¹ Kïlenyona, mowöghisyö, opokwa olyot nyo wow tya kïtïl alurïtin cho chang!

Kecham nko ketagh Kristo*

³² “Chi anka tïkwïl nyo portonanïn ompö tawu pich, oportonan nyinte tïkwïl lenyoni ompö tawuto Paponyan nyo mi yïm.

³³ Wölo anka tïkwïl nyo töghanïn ompö tawu pich, otöghan nyinte lenyoni tïkwïl ompö tawu Paponyan nyo mi yïm.

Toyogh

³⁴ “Molenchï kegh kyangwïnan opï kalya ngwïny. Kimangwïnanye opï kalya kïpoto poryot.

³⁵ Kyangwïnan atowulyö weri nko kwanta, awulyö cheptö nko kame, awulyö korka nko potïchtanyi,

³⁶ lïku pung pö chi cho ghach tya chini le piko katanyi.

³⁷ “Chi anka tïkwïl nyo chömöy kwanta anta kame kïtïlanïn, kïmerokonanïnye akwanka tïkwïl nyo chömöy werïnyi anta cheptanyi kïtïlanïn, kïmerokonanïnye.

³⁸ Akwanka tïkwïl nyo mepönye kimurtöwontenyi akïrïpanïn kïmerokonanïnye.

³⁹ Ato mököy chi kïnömtoy kegh söpontanyi, kïwirtoy, wölo chi nyo wirtoy söpontanyi ompö ani, kïnyoru.

Ropöw

⁴⁰ “Chi anka tïkwïl nyo tokokwa kïtokanïn, akwanka tïkwïl nyo tokanïn, kïtoköy nyinte nyini kiyokwanïn.

⁴¹ Akwanka tïkwïl nyo toköy werkoyon ompöwölo werkoyon nyinte, kïnyoru ropöwonto werkoynön, akwanka tïkwïl nyo toköy chi pö man ompöwölo pö man nyinte, kïnyoru ropöwonto chi pö man.

⁴² Akwanka tïkwïl nyo töni kikompo pögh cho köghïte akonga ompö rïpankachan chete mïnkech, ompöwölo rïpanïn nyinte, kïnyoru ropöwontenyi nyo mötïny.”