MARKO 9 - PIPÏLIA

¹ Atolapay kïlenchï Yeso chane, “Omwowokwa nyo pö nyoman lö mi yeteyi pich cho te cho mömeghsotcha kïtomö kïsïwa Pöyunöto Tororöt kungwïnöy ompö owesyö.”

Kewenga Yeso

² Kikany kuwer osiswö cho le mut nko akonga, kumït Yeso Petro nko Yakopo nko Yoana kïwö nko chane opïn kïpus kutïng nyo kogh. Atolapay kuwenga ompö tawungwa,

³ kukwerkwersyö sïrokachi kïrelachitu löpöt, nyo kimöminye mwötin ngwïny nyo kimuköy kïmwat kïrelachitu le choni.

⁴ Atolapay kuchumchï chane Eliya nko Musa akïngalan nko Yeso

⁵ Kïlenchï Petro Yeso, “Konetin, karam nyoman otï kömitecha yete nya ketekacha tunkun sömök, nyengu anka pö, Musa anka kïpöyit Eliya anka.”

⁶ Kimenkïtnye kïgh nyo mwoghöy ompöwölo kiwöghisyö chane nyoman.

⁷ Kungwïn polta kulum chane, kïngalana Tororöt poltonay lö, “Werïnyan nyï, nyo ochöman: atera nyinte!”

⁸ Nyini kilö kïtopöntö kinetanchay ngat kïmakïsïwacha chi anka nyo kimi nko chane kïpoto Yeso onkït.

⁹ Otini kimi kirökuno kutïng, kïmwochï Yeso chane lö, “Momwochï chi nyonikïny kïgh nyo kasïwekwa tökïtenö kututï Wero Chi ompö ngwen.”

¹⁰ Kikïr pïchay kiruröto Yeso wölo kimi kïtepo kegh chane lö, “Ketutï ompö ngwen kï ne?”

¹¹ Atolapay kïtep Yeso lö, “Atï lentöy koneti kirurut nyoghöy Eliya kungwïnöy?”

¹² Kuyokyï Yeso chane lö, “Nyoghöy nyoman Eliya kungwïnöy kïsötöy tïkwïn lapay. Mïchini onkïtunökwa tïkwïl lö mwoghöy ne Kikirut ompö paraku Wero Chi. Lentöy wonguno tïkwïn cho chang aketöghöy nyinte?

¹³ Wölo omwowokwa nyo pö nyoman lö, kikungwïn Eliya, kwighchï pich nyinte kïgh anka tïkwïl nyo kimököy chane kwida, le wölo kikikirta ompö nyinte.”

Kesop Yeso karöchïnin nyo kipote oy

¹⁴ Otini kisor wölo kimito kinetanka walaka, kïsïwa kutwö nyo wow nyo kiwit chane, kïmito koneti kirurut walaka cho kimölomölöy kegh nko kinetanchay.

¹⁵ Nyini kisïwa kutwonay Yeso, kïtangany nyoman akutirchï nyinte akutakwes.

¹⁶ Kïtepa Yeso kinetankachi lö, “Ne nyini kongölonekwa nko chane?”

¹⁷ Kuyokyï chi nyo kimi kutwonay lö, “Konetin, kamïtwan werïnyu, nyo tïng oyin nyo kigh nyinte kïminy.

¹⁸ Akwotini kepulchï oy nyinte, kïwirchini ngwïny, kungwïna pïchan kut akïnyagh kelat akuchïritö. Omwochan kinetanköku kïyon oyintonay wölo memïcha.”

¹⁹ Kuyokyï Yeso chane kïlenchï, “Ne pïnta nyï puryö kighanat, otöponan nko akwa nko oyï? Omïkukönan nko akwa nko oyï? Amïtuna nyinte.”

²⁰ Kemïtï nyinte wölo mi Yeso. Nyini kisïwa oyintonay Yeso kulï monïngay kungïrngira akupelpel ngwïny kungwïna pïchan kut.

²¹ Kïtepa Yeso kwanta lö, “Kinam kïyete kïngata oyï?” Kïlö, “Kïngata kïmïnïng.

²² Wirchini su oyintononi ma nko pögh otini yöröy kïtïghöy nyinte. Nyo karam syonchecha aingarakech!”

²³ Kïlenchï Yeso, “Ato ighönenyi! Kumukisyot tïkwïn lapay ompö chi nyo ghönöy.”

²⁴ Kuta papoto monïngay panini lö, “Oghönan, ngarakante aghan!”

²⁵ Otini kïsïwa Yeso kutwonay lö kipkonöy kutiru, kuteghchï oyintonay lö, “Nyi oyin nyo ighöy pich kïmingö akïmany, kolan ngetena monïngï amelïtö nyinte ngat!”

²⁶ Kutegh oyintonay akïwirchï monïngay ngwïny, atolapay akïpïstö nyinte le chi nyo kima tökïlö pichi walaka tïkwïl, “Kikïma!”

²⁷ Wölo kïnam Yeso ewuto monïngay kungarak nyinte akunget kughyö.

²⁸ Kïkany kïlït Yeso kö, kïtep kinetankachi otini ki chane opïn lö, “Kïlö ne tömökimukacha keyona oy?”

²⁹ Kïlenchï, “Momukekwanye tayon oyin nyo lata nyi kwïle pata kïpoto ompö saghat.”

Kangalana Yeso meghenyi ngat

³⁰ Kïngeta Yeso atoni nko kinetankachi akuwer Kalilaya melö kimököy kunkïtu chi wölo kimito nyinte.

³¹ Ompöwölo kimi kunetöy kinetankachi lö, “Karich kyonkoghchï Wero Chi pich kepar nyinte, wölo nyini kemuchö parata kututu nyinte asisto sömök.”

³² Wölo kimöpköchicha ngölyontononi, kuwagh nyu kïtep nyinte.

Ngo nyo wow tya?

³³ Kwitïta chane Kapernaum. Kïkany kïlïtöy kö, kïtep kinetankachi lö, “Ne nyini kongölononekwa ompö arawet?”

³⁴ Kïsisyo ompöwölo kömi kïtepöy kegh ompö or lö ngo nyo wow ompö chane.

³⁵ Kumpur Yeso ngwïny akïkur pïchay le taman nko odeny akïlenchï, “Chi anka tïkwïl ompö akwa nyo mököy kïlïku nyo pö tagh kwip kegh ngwïny kïtïl pikö walaka akïlïkwï mötworinto pich lapay.”

³⁶ Kïcheng monïng akutö kwenungwa, akïsïtyï takat akïlenchï chane,

³⁷ “Ato tach chi monïng nyo lata nyï ompö kaynenyan kïkatachanïn akwato takanïn chi kïmelö katakanïn pat wölo katak nyinte nyini keyokwanïn.”

Chi nyo möwöchokwanye kïmi nko acha

³⁸ Kïlenchï Yoana nyinte, “Konetin, kakïsïwecha chi nyo ketulo oy kaynatengu, nyo melö akonga nko acha, ketaghecha.”

³⁹ Kuyokyï Yeso lö, “Matagha nyinte, ompöwölo möminye chi nyo muköy kwighöy töngönchin ompö kaynatenyan, nyo ato mi kite kuswomanïn.

⁴⁰ Ompöwölo chichona mötöghechanye kïmi nko acha.

⁴¹ Omwowokwa nyoman lö chichona konokwa pögh ompöwölo opoyekwa Kristo.* Kïnyoru ropöwontenyi nyo mötïny.

Työmut

⁴² “Akwoto lelchï chi monechï mïnkech kïpïstö kighanatengwa nyo tïng ompö ani, kï kaykay kerötyï koghpa pagh katïnyi akewirchï nanam.

⁴³ Akwoto ipinyi ewungu nteghanyi ngokï, idïng. Ngwangwa lïtö söpon kïmïtwö ewï kïsir tïngetenö mori kwodeny akewirchin mapa kokay. [

⁴⁴ Wölo mewonyocha nkutyechi amemisonye mat.

⁴⁵ Akwato lelun keltöngu, idïng. Ompöwölo karam lïtö söpon kïmïtwö kel kïsir kewirchin mapa kokay, tïngetenö kelyön odeny.

⁴⁶ Wölo mewonyotcha nkutyechi wöloni amemisonye mat.]

⁴⁷ Akwato lelun kontangu, iködötï, karam lïtö Pöyunöto Tororöt tïngetenö kong akonga kïsir kewirchin mapa kokay, tïngetenö konyïn odeny.

⁴⁸ Wölo mewonyotcha nkutyechi amemisonye mat.

⁴⁹ “Kitöni chi anka tïkwïl ma le wölay kitöntoy omisyö partin.

⁵⁰ Karamach partina, wölo ato wonyö onyïniengwa, ketöni ne ngat? “Otönö partina kongotnön oringwo, akany kïtöpö kalya kwenungwo.”