MARKO 7 - PIPÏLIA

¹ Kusupchï kegh Parisaytin* nko koneti kirurut cho te cho kipkono Yerusalem tawu Yeso.

² Kïsïwa kinetanpa Yeso walaka kwomisïyi nko morïn cho le sïmnyon, cho tomönye kewun.

³ (Ompöwölo rïpöy Parisaytin nko pipö Yaudi löwïr kinetut cho kinyorchï chane poyikwa nyo momisïyicha kïtomö kewun morïn kïrïp kegh nko asïltineko poyikwa.

⁴ Akwato pkana chane donyö, kïmomisïyicha kïtomö kuwun kegh akimito ngala walaka cho kitach akïrïp cho lata, kewun mpalawis tören nko otupeni cho kikïgha taghoy.)

⁵ Kïtep Parisaytin nko koneti kirurut Yeso lö, “Ompö ne tömörïpöy kinetanköku kinetut cho kikïnyorchicha poy? Kölö ne tökwomisïyi chane nko morïn cho le sïmnyon?”

⁶ Kuyokyï Yeso chane lö, “Nyoman nyay kingorekwa werkoyonta Isaya chepölköstinechï otini kikikir lö, lentöy Tororöt, ‘Konyïtanïn pïchï ompö kutïw kwïle, wölo lowöch mïkulöwekwa ompö ani.

⁷ Soghanïn chane kwïle, akunetöy kinetut pö ptangengmöt tökïlentöchi Kirurut pö Tororöt.’

⁸ “Kopïstekwa Kirurut pö Tororöt anama kegh asïltino pich.”

⁹ Kïlenchï Yeso chane ngat, “Nkotïngetekwa chïreryö nyo gha nyo oghöpöno kinetut pö Tororöt atamuka arïpa asïltinekwo.

¹⁰ Ompöwölo kilö Musa, ‘Techa kon nko komöt, akwanka tïkwïl nyo mwoghöy kwanta anta kame akany ketïgh kïma.’

¹¹ Wölo anetakwa lö, ato tïng chi kïgh nyo kömököy kungöroko kwanta anta kame, atolapay kïmwa lö, ‘Kïyay komökan ongörokeninyi,’ kï, kakïpöyit Tororöt,

¹² aghakwa nyinte kïpïstö mengarak kwanta anta kame.

¹³ Aghakwanyu ngölyonto Tororöt kïlïkwï kwïle ompö otöptinekwo cho kyonyorchï poyikwo, aghakwa tïkwïn walaka cho chang cho karkegh nko choni.”

Tïkwïn cho sïmnyonöy chi

¹⁴ Kïkur Yeso ngat pich kïpka wölo mi nyinte akïlenchï, “Atere ngalechan, akwa lapay alïm.

¹⁵ Möminye kïgh nyo mi chi sany nyo ato wö orinyi kumuköy kusïmnyon nyinte, kïpoto tïkwïn cho pkono ori, choni cho ighöy chi kïlïku sïmnyon. [

¹⁶ Ato itïng chi yitïn cho ilïmo, ilïm!”]

¹⁷ Otini kipakachta tuyonay, akïlït kö, kïtep kinetankachi lö ne nyo poru körkeyïnay.

¹⁸ Kïlenchï Yeso chane, “Ayo möpköchinokwanye tïkwïl so? Mosïwïyekwanye lö, möminye kïgh nyo lïtöy chi nyo ngwïno sany nyo muköy ntökusïmnyon chi,

¹⁹ ompöwölo melö lïtöy mïkulöwunyi, wölo lïtöy muyenyi atolapay kurel sany.” (Kiporï Yeso ompö mwaghatanoni lö tïlilöch omisyewut lapay.)

²⁰ Atolapay kïlö, “Kïyinö ngwïno chi ori nyo sïmnyonöy nyinte.

²¹ Ompöwölo pkono mïkulöwo pich ori kinonut cho ghach cho lata cheporesnan, chorsyö, pörsyö, atomi,

²² pïrchin nyo gha, köromnyö, lïsat, kelïkwï chepomu, ketora kipö chi kong, kiswomöt, kwolöto kegh nko sölwontön,

²³ pkono tïkuchï lapay ori chi akïchete cho ighöy chi kïlïku sïmnyon.”

Kighanata korka akonga

²⁴ Atolapay kïngeta Yeso wöloni, kïwö kutang okumpö Tiro nko Sidon. Kïlït kö akimachamnye lö tenkïtï chi wöloni kimi nyinte, wölo kimawïnganye.

²⁵ Kungwïn korka lawel lenyini nyo kitïng cheptanyi oy, akupïtyï kelyo Yeso.

²⁶ Ki pö Krik kokononi nyo kïngwïna Poinike ompö Sirya, kïsagh Yeso kutulö oy cheptanyi.

²⁷ Kuyokyï Yeso nyinte lö, “Nya kepagh monïng kïpïghyö. Mökaramnye kecheng omisyo monïng akewirchï kukïdin.”

²⁸ Kuyokyï kokonay Yeso lö, “Nyoman, Echotyon wölo muköy kukïdinö kïkwagh rarakan cho chuntoy monïngö.”

²⁹ Kïlenchï Yeso kokonay, “Ompö mwaghatengu nyoni, wïyö nyi nyu, kikïngeta cheptöngu oy!”

³⁰ Kïwö kaw, kutomtö montanyi rïwöy pöröy kikïngeta oyichay.

Kesop Yeso kïminy nyo mangate

³¹ Atolapay kïngeta Yeso Tiro akuwerata Sidon, ntökwit nanampa Kalilaya ntö kïlït Dekapoli.

³² Kumïtyï pich nyinte chi nyo kimingate akwaghïgh kut. Kïsagh Yeso kukanagh morichi parakunyi.

³³ Kumït Yeso chichay yona akulut morichi yiti chichay akïngwïtï akïswany ngalyapunyi.

³⁴ Atolapay kïtopön yïm akïwirï kimïny ompö sönönöt, akïlenchï chichay, “Epata,” lenye nyoni ato kïmwa lö, “Yatena!”

³⁵ Kïyotisyö yitichay, kutyaka ngalyapunyi kïngalan nyo karam.

³⁶ Atolapay kïmwochï pïchay lö, mötöp ntomwochï chi, wölo kïrkegh kimwa lenyoni kï kingangta pïchay akïmwatïta lasiny.

³⁷ Kïtangany pïchay nyo pö nyoman akïlö, “Kegh tïkwïn lapay karam nyo, kegh kïminytin kïlïm ngal akwigh kïmanytin, kïngalan!”