MARKO 6 - PIPÏLIA

¹ Kïngeta Yeso wölini kïwö kutang korenyi, nyo kiyetunö kïrïp kinetankachi.

² Kutor kunetisyö asispa Sapato* ompö kö pö saghat:* kitöngönchï pich chang cho kilïm kïlentöy, “Könyorchï onö chichï ngalechï? Akï ngöghomnyö ne nyï kikitö nyinte? Akï ne pöghisyewutchï ighisyegho morichi?

³ Melö so ighintonay ighöy pautin nyete, wero Marya akï werïngwa Yakopo nko Yose nko Yudas nko Simon. Amötipikwanye chay möngöy wölete nko acha?” Kïlenyona kurey nyinte.

⁴ Kïlenchï Yeso, “Möminye wölo mökïkonyïtöy werkoyon kïpoto ompö korenyi wölo kikïyichï nko tïlyayichi nko piko konyi.”

⁵ Akimökwighnye töngönchin ompö wölini, kïpoto pich cho ngörï cho kichirsot cho kikanagh ewunechi akusop.

⁶ Kïtöngönchï Yeso nyoman ompöwölo kimeghancha. Atolapay kïwesteghö Yeso keston cho kilekïtöch kunetata pich.

Kiyonta Yeso kinetankachi taman nko odeny

⁷ Kïkur kinetan taman nko odeny akïyonta kïpeghategha odeny odeny, akutö chane owesyö nyo yono oy

⁸ akuyomis lö, “Mop kïgh ompö pantangwo kïpoto lïkïp, mop makatyan anta sïkïna okörö, mopö ropïyen mïlotwekwo.

⁹ Atïkatena kwegh amalach anankis odeny.”

¹⁰ Akïmwochï chane lö, “Mïchini otïpinökwa kayona kolitökwa le to ntökïtenö angetenakwa wöloni.

¹¹ Kaw anka tïkwïl nyo machamakwanye pich anta ter ngalekwa, apegha atoni aparta terïtyon ompö kelyekwo, kïlïku söwintön ompö chane!”

¹² Kïlenyona kïnget kïpa kwamtata lö, mïchini kïngany pich ngokikwa.

¹³ Kïyon oy cho chang akuyila mwagh pich cho chang cho kichiryote akwïgh chane kïsöpchö.

Megha Yoana Kipatisanin

¹⁴ Kilïm nyu pöytoghintö Erode ngalechoni, ompöwölo kyororit kaynata Yeso ompö korononi kïmïkul. Kimwoghöy pich walaka lö, “Ki ketutï Yoana Kipatisanintö ompö ngwen nka nyï ighisyot pöghisyewutchï pö töngönchin ompö nyinte.”

¹⁵ Kïmwa walaka lö, “Eliya nyinte.” Kïlö walaka, “Werkoyon nyinte nyo karkegh nko werkoyi chay pö könyisyok!”

¹⁶ Nyini kïlïm Erode ngalechoni kïlö, “Yoana nyay kyodïngön möt, nyoni ketutï!”

¹⁷ Ompöwölo Erode nyo kimwa kenam Yoana kerat. Kigh lenyoni ompö paraku Erodiya, nyo kip nyinte, aki korketo werïngwa Pilipo.

¹⁸ Kimwochï Yoana Erode lö, “Mömïchinotnye chenganyi korketo werïngwo!”

¹⁹ Kïlenyona kwipö Erodiya Yoana sikong ntökïmököy kïtïghöy, wölo memïnye.

²⁰ Kiwöghöy Erode Yoana ompöwölo kinkït lö chi pö man nyinte aki chi nyo tïlil, kïlenyona kïrip nyinte lasiny tömökïrïm. Kichömöy kïteröy ngalechi ompö ngörekyö kïrkegh kisusöy söpontanyi ngalechoni kilïmo Yoana kïtenö osis.

²¹ Kitïta pöroyïn pö Erodia asis nyo kinono yiyo Erode. Kigh Erode ichon akïkur pich cho echön, cho lata kirwokot nko wowïntino soch nko pich cho ki echön ompö Kalilaya.

²² Kungwïn chepö Erodiya kïpirön. Kïngarak Erode nko toyechi. Kilenchï pöytoghintonay chepay, “Somï kïgh anka tïkwïl nyo imökenyi okoninyi.”

²³ Kuwalwal kegh kïnyïl cho chang lö, “Okoninyi kïgh anka tïkwïl nyo isomaninyi, kïrkegh kö kareranto pöyunötenyan!”

²⁴ Kïnget chepay akïwö kïtepa kame, “Osomön ne?” Kïlenchï kame, “Möt pö Yoana Kipatisanin!”

²⁵ Kungwïn chepay lawel wölo mi pöytoghintö akïlenchï, “Omökan konaninyi möt pö Yoana Kipatisanin nyete le ye ompö otupö.”

²⁶ Kwotyö nyoman pöytoghintonay. Wölo melö kitökumï kïtagha chepay, ompöwölo kiwolwolutkachi cho kiwalwala tawuto toyechi lapay.

²⁷ Panini lawel kïyonta ripin akonga ompö cho kiripsïyi kïwö kwipï möt pö Yoana. Kïwö ripintonay kutang kö pö rata akïdïng möt pö Yoana,

²⁸ akwipunö otupö akutö chepay, kïnget chepay kutö kame.

²⁹ Kïkany kïlïm kinetankachi ngölyontonay kïpa kïsït portanyi akïtïpchï pïrïm.

Kapagh Yeso söpïch nyo wow

³⁰ Kimïlisyö kiyoktoghï wölo mi Yeso, akïmwochï tïkwïn cho kigh chane akunet.

³¹ Ki chang pich nyoman cho kipkonöy akïpetöy ntömökumïnye Yeso nko kinetankachi kïnyorï pöroyïn nyo omisyegho, kïlenyona kïlenchï Yeso chane, “Apkana kepe opïn wölo le sirö kempurö kesïkö kimïny kite.”

³² Kïpegho chane meli opïn kutang wölo le siriron.

³³ Kïsïwa pich cho chang chane kïpetöy kunkïtï lö ompö ngo chini, kïryagh kïpegha kelyön. Kingetunö kanastin löwïr, akïpa kinya Yeso tagh nko kinetankachi.

³⁴ Otini kingetunö Yeso melinay kïsïwa tuyot nyo wow, kusyon nyinte, ompöwölo kikarkegh tuyononi nko kechir puryö mösöwon. Kutor kunet chane ngal cho chang.

³⁵ Akwotini kirich kwimön, kïpechï kinetankachi Yeso akïlenchï, “Siriron wöl, akwanyï kikwïmön.

³⁶ Nya kïpa pïchï kutang paren nko keston cho lekïtöch tökwolchï kegh omisyö.”

³⁷ Kuyokyï Yeso kilenchï, “Otönö chï le akwa omisyö kwam.” Kïtep chane lö, “Imökenyi kepecha kyalena ropïyeni silpa cho le 200 makatin atökepaghena pich?”

³⁸ Kïtep Yeso lö, “Otïngetekwa makatin ata nya? Ape orosunö.” Nyini kinkïtï chane lö tya kïlenchï, “Makatin mut nko kaghagh odeny.”

³⁹ Kïmwochï Yeso kinetankachi lö, “Akanya kupar kegh pikö kïpeghategha surutöy kumpur suswechï nyörilöch.”

⁴⁰ Kumpur pïchay ngwïny kutïkumotö kegh, kïpeghategha 100 akïpeghategha tömönut mut.

⁴¹ Atolapay kïcheng Yeso makatinechay le mut nko kaghaghechay le odeny akuros yïm kuyokyï sörö Tororöt. Kïmïnchïran makatinechay akutö kinetankachi kutö pïchay. Kichöghchinotö kaghaghechay le odeny pïchay löwïr.

⁴² Kwam chane lapay ntökïpïghyö.

⁴³ Kusupotö kinetankachi ngötunön cho kinyïghityö köröpon taman nko odeny cho pö makatine nko kaghaghe.

⁴⁴ Aki mïrön cho le 5,000 choni kyam.

Köwesteghö Yeso pögh parak

⁴⁵ Panini lawel kïmwochï Yeso kinetankachi kïlany kïnya kuntagha meli kwoghyö nanam antakwagh kïpa Petsayda, otinö kïmi kuyomisöy nyinte tuyot.

⁴⁶ Otini kipakachta tuyonay, kïwö wölo le kutïng kïsagh.

⁴⁷ Otini kituwit, kï kimi melinay nanam kwen, kïmi Yeso onkït wölo tïyame.

⁴⁸ Kïsïwa lö kitïng kinetankachi kömpölelyö otini kimi kïkötoy meli mïkong, ompöwölo kikutuno yomöt taghtangwa, kïkany otini kimach kuwas kungwïn Yeso wölo mi chane kïwegho pögh parak akïmach.

⁴⁹ Kuwer, nyini kïsïwa chane nyinte kïwegho pögh parak, kunan lö töptoy kïtontögh, kuteghyö.

⁵⁰ Ompöwölo otini kisïwa chane lapay nyinte kuwöghisyö nyoman kïngölonchï Yeso chane lawel lö, “Onyökonitunö, ani nyete mowöghisyö.”

⁵¹ Kïlany melinini mi chane, kïwïs yomonay. Kïtangany nyoman kinetankachi,

⁵² ompöwölo kimöpköchïcha chane ngala makatin, ompöwölo kyoghïgh mötöwekwa.

Kesop Yeso pich cho kichiryote ompö Kenasaret

⁵³ Nyini kyoghyö nanam kïpa ntökwitïta koro Kenasaret kïrötyï meli atoni.

⁵⁴ Nyini kirökunö meli, kunkïtï pich Yeso panini.

⁵⁵ Kïlenyona kïryagh kïghömï korononi kïmïkul akutor kumïtï pich lapay cho kichiryote wölo mi nyinte. Kikïsïtö cho kichiryote menkökwa kïpa wolni kïnye kakïlïmchï Yeso lö mi.

⁵⁶ Kikimïtyï nyinte pich cho kichiryote ompö wop anka tïkwïl nyo kilït, ato ki kanastin cho mïnkech anta cho echön. Kumïtyï pich nyinte pikökwa cho kichiryote ompö donyö, kïsagh pïchoni nyinte kïpïsï pïchoni kichiryote kïswany kïnye sörömuto sïrenyi. Kisöpchö tïkwïl cho kiswany nyinte.