MARKO 3 - PIPÏLIA

¹ Kilït ngat Yeso kö pö saghat* wölo kimito chi nyo kimeyta ewï.

² Kïsöpchï pich Yeso lö tökesïwa kusopöy chi ompö asispa Sapato* atökenyorï wölo kirwokyinegho.

³ Kïlenchï Yeso chichay kimeyta ewï, “Nyone yi.”

⁴ Atolapay kïtep pïchay, “Mïchini keghchi ne pich ompö asispa Sapato? Mïchini keghchi pich nyo karam nya anta nyo gha? Mïchini kesörï söpon pö chi nya anta kepar?” Wölo kisisyö.

⁵ Kïranga Yeso chane konyïn ompö mïrmïryö akïsïwa ngwonïn ompö oghïghïnto mïkulïskökwa. Kïlenchï chichay, “Ghïtenö ewungu.” Kughïtö, kïsöp ewunyi lenyini.

⁶ Kïlïtöy Parisaytin* sany, akïpa kutuyö kegh nko pipö Erode, akïtat wölo tïghtoy Yeso.

Söpïch ompö sörömu nanam

⁷ Kïwö Yeso nko kinetankachi kutang nanampa Kalilaya, kïrïp pich cho chang cho kipkono Kalilaya nko Yudea

⁸ nko kanasyanta Yerusalem nko Idumea nko cho kipkana lalwa Yordan antakwagh nko Tiro nko Sidon. Kighömïtyï kegh pïchoni löwïr wölo mi Yeso, ompöwölo kilïm tïkwïn cho kigh nyinte.

⁹ Kïmwochï Yeso kinetankachi kutö meli ato lekïto nyinte tömetungï pich,

¹⁰ ompöwölo kisop nyinte pich cho chang nyoman. Kïlenyona kutungï kegh pich cho kichiryote cho kimököy kïswany nyinte.

¹¹ Nyini kisïwa pich cho kipote oy Yeso, kupïtyï tawunyi akuteghyö lö, “Ichinyi Wero Tororöt!”

¹² Wölo kïtagha Yeso chane nyoman mamwatïta lö ngo nyinte.

Kakïl Yeso pich taman nko odeny cho kiyoktoy

¹³ Kïpus Yeso kutïng akïkur pich cho kimököy kïpa wölo mi nyinte.

¹⁴ Kïkïl pich taman nko odeny, kitïpï nko nyinte tökuyoktö kïpa kwamtata

¹⁵ akïsich owesyö nyo yono oy.

¹⁶ Pïchoni kwompö: Simon (nyo kimïnchï Yeso kayna Petro)

¹⁷ nko Yakopo wero Sepedayo nko Yoana wertompö Yakopo, nyo kimïnchï Yeso kaynat nyo kïlentöy Poanerke, nyo ato kïwaghach kï, “Werpö Tïlöt,”

¹⁸ nko Andrea nko Pilipo nko Partolomayo nko Matayo nko Tomas nko Yakopo wero Alpayo nko Tadayo nko Simon nyo pö Kanan

¹⁹ nko Yudas Iskariote nyo kiwïchtö nyinte.

Yeso nko Pelsepul*

²⁰ Kïghamït kegh pich cho chang ngat wölini tömökïnyorïnye Yeso pöroyïn nyo omisyegho nko kinetankachi.

²¹ Kïkany kïlïm kongotichi ngölyontononi, kïpa kïnam nyinte ompöwölo kitöptö chi nyo kikwanga.

²² Kïmwa koneti kirurut cho kirökunö Yerusalem lö, “Namate chichï Pelsepul!” Akï, “Pöytoghinto oy nyo le kuke nyini töni owesyö nyo yono oy.”

²³ Kïkur Yeso pïchay akïngölonchï chane ompö körkeyïntin lö, “Muköy, lö ne Onyötö kïyonöy Onyöt?

²⁴ Akwato pesyö korö akutor kïpar kegh chane nko chane, kï melö tökughyongöy korononi.

²⁵ Akwato pesyö kö pö chi akïporyö chane, kïmelö tokughyongoy köyoni.

²⁶ Akwoto, töp ntökïchagha pöyunöto Onyöt, kïmelö tökughyongöy, wölo nyonyöy akuwonyö.

²⁷ “Möminye chi nyo wiröy kö pö chi nyo le nyakan lö tapar tïkuchi, kïpoto atonya kïrat nyinte, muköy nyu kïpar tïku.

²⁸ “Omwowokwa nyoman lö, kïlöstoghchini pich ngokï löwïr nko kimwaghat anka tïkwïl nyo mwoghsïyi.

²⁹ Wölo chi anka tïkwïl nyo ngölonöy kumwoghöy Mïkulögh nyo Tïlil nyo melö kïlöstoghchini, kegh nyinte nko ngokï cho pö kokay.”

³⁰ Kimwa Yeso lenyoni ompöwölo kimwa chane lö, “Tïng nyinte oy.”

Yoto Yeso nko werkompö Yeso

³¹ Kurelï yoto Yeso nko werkompö Yeso. Kighyongö chane sany akïmwatïta kekurï Yeso.

³² Kimito pich cho chang cho kimpur kurik Yeso, kïlenchï nyinte, “Kurinyi yongu nko werkökwa ompö sany.”

³³ Kuyokyï Yeso lö, “Yonyan nko werköcha ki ngo?”

³⁴ Atolapay kïtopön pïchay kimpur kurik nyinte akïlö, “Arosa! Pïchï mi yi kï yonyan nko werköcha!

³⁵ Chi anka tïkwïl nyo ighöy machata Tororöt, kï werïncha akï cheptöncha akï yonyan.”