MARKO 14 - PIPÏLIA

¹ Kitomönye osiswö odeny ntökwitïta Ichon pö Pasaka* nko makatin cho puryö mumar. Ompö atoni kï kimi tïsï cho echön nko koneti kirurut kïyöröy or nyo lepo Yeso tökïnam akïpar.

² Kïmwochinö lö, “Makany kegha ngölyontonï ompö asis nyo wow, atömötöp ntökwar kegh pich.”

Kakiyila Yeso mwagh ompö Petaniya

³ Otini kimi Yeso Petaniya, kö pö Simon nyo kyamate psenkwet, kungwïn korka wölo mi Yeso nyo kitïng chupa nyo kimi mwagh nyo pö ket nyo kikuro nardo. Kïyat kokononi chupanay akuyin mwaghay möt pö Yeso.

⁴ Kïnörekyö pich walaka cho kimi atoni lö, “Pö ne kelasta mwagh nyo lata nyï?

⁵ Kötö kyoltegho mwaghï ropïyen cho tïlöy 300, atolapay keporchï mey!” Kugheghchï kokonay nyoman.

⁶ Kïlenchï Yeso chane, “Opïstenö kamanï ompö ne tosusekwa nyinte? Keghwanïn nyinte kïgh nyo karam nyoman.

⁷ Mi meyï nko akwa osis lapay amukekwa ntangarak chane asis anka tïkwïl, wölo melö omitan nko akwa osis löwïr.

⁸ Kegh nyinte kïnyini kemï kwigh kanya nyinte kuyilanïn kïtomö tïpenyan.

⁹ Omwowokwa nyoman lö, kinonöy kïyï, kegh kokonï ompö ngwïny kïmïkul ato kyomtoy Lökoyechï Karamach kenono nyinte.”

Kacham Yuda kïwïchtö Yeso

¹⁰ Atolapay kïwö Yudas Iskariote nyo kile akonga ompö chay le taman nko odeny, wölo mi tïsï cho echön atökumï kïwïchtö Yeso.

¹¹ Kïngörekyö chane nyoman otini kilïm lökoyechoni pö Yudas akuyomis nyinte ropïyen. Kïyar Yudas pöroyïn ompö atoni nyo wïchtegho Yeso.

Kam Yeso omisyo Pasaka nko kinetankachi

¹² Otini kitïta asisto tagh nyo pö Ichon pö Makatin cho puryö Mumar, asis nyo kikïyengöy wawa kech nyo kikyomo Pasaka, kïtep kinetankachi nyinte lö, “Imökenyi kepecha keghecha onö wölo iomonenyi Pasaka?”

¹³ Kïyonta Yeso kinetankachi odeny akïmwochï lö, “Ape atanga kanasyan, oryomekwa nko chi nyo itöy töto pögh arïpa nyinte

¹⁴ ntökïtenö kïlït kö nyo kolït olenchï chito kot, ‘Lentöy konetintö nko kot nyo omonan Pasaka nko kinetankachu?’

¹⁵ Porwokwa kö nyo wow nyo pöro nyo mi parak nyo kikemin, aghenakwa nyu omisyö wöloni nyo le nyincha.”

¹⁶ Kïnget kinetanchay, kïpa kutang kanasyantanay, kïnyorï le nyaye kömwochï Yeso chane. Kwigh omisyonay pö Pasaka.

¹⁷ Otini kimön, kungwïn Yeso nko kinetankachi.

¹⁸ Akwotini kimi chane kwomisïyi, kïlö Yeso, “Omwowokwa nyo pö nyoman lö, wïchtonanïn chi akong ompö akwa, lïku nyinte nyo omisïyi nko ani.”

¹⁹ Ompö atoni kutor chane kunonsyö nyoman akïtep chi tïkwïl ompö chane lö, “Ani nyini wïchtoninyi?”

²⁰ Kuyokyï Yeso lö, “Chi akonga ompö akwa chete le taman nko odeny nyinte nyo kenönokö makatan tïwan akonga nko ani.

²¹ Nyoman wetöy Wero Chi le wölo mwoytoy Kirurut cho Tïlilöch, wölo heywey chichona wïchtoy Wero Chi! Kitö roko chichoni möyïnye chi nyinte!”

Omisyo Echotyon

²² Akwotini kimi kwomisïyi, kïchengwï Yeso makatyan, akusoyön akïmïnchïr akutö kinetankachi akïlö, “Achenga, portönyan nyete.”

²³ Atolapay kïchengwï mpalawu akuyokyï Tororöt sörö, akwonkoghchï chane, kïgha chane lapay.

²⁴ Atolapay kïlechï Yeso chane, “Kisönköchan chete, nyo puntoy muma* Tororöt cho kïmïltoy ompö pich cho chang.”

²⁵ Amwowokwa nyoman lö, “Mogheghanye ngat dipay* ntökwitïta asisoni ogheghan dipay cho relach ompö Pöyunöto Tororöt.”

²⁶ Akwotini kïtum kumuchö, kïpa kutang kutïng pö Arol.

Kangor Yeso lö tiyot Petro nyinte

²⁷ Kïlenchï Yeso chane, “Otoyonekwa löwïr apïstanïn, ompöwölo Kikikir lö, ‘Opöran mösöwonte kïtoyö.’

²⁸ Wölo nyini kotutwan, onyoghokwa owetöy Kalilaya.”

²⁹ Kuyokyï Petro lö, “Kïrkegh köpïstinyi pikö walaka, mopïstoninyinye nyonikïny!”

³⁰ Kïlenchï Yeso Petro, “Omwowunyi nyoman lö, kïtomö kïwach kïrpö kokoroch kïnyïl odeny itiyonaninyi kïnyïl sömök.”

³¹ Kïlo Petro ompö chïrimnyö, “Kïrkegh kölïku meghe, kïmomukanye ntatagh lö, monkïtinyinye.” Akïmwa kinetanka chunö walaka löwïr lenyini.

Kasagha Yeso Ketsemane

³² Kïpa ntökwitï par nyo Ketsemane, kïlenchï Yeso kinetankachi, “Ompurö yi otï tosoghan.”

³³ Kumït Petro nko Yakopo nko Yoana kïpa nko nyinte. Kusus kegh nyinte kuwongwï,

³⁴ kïlenchï kinetankachi, “Wongunote mïkulöwunyan nyoman tökïlentöy chi omökan omeghe. Ompure yi aripsyö.”

³⁵ Kïwö yona kite, kupïtyï ngwïny akïsagh lö atomuko ikany kuwer sayanï pö ngwonïn.

³⁶ Kïsagh lö, “Ato muko, Paponyu, ichengena kölowonï! Mukisot tïkwïn lapay ompö nyi. Wölo melö ompö machatenyan, wölo ompö machatengu.”

³⁷ Atolapay kïmïla kutomï mi rïwön kinetankachi kïsömök, kïlenchï Petro, “Simon, irïwenyi so? Memukenyinye chïköne ompö nyo le sa akonga?”

³⁸ Atolapay kïlenchï chane, “Oripsyenö asagh tömölït työmut. Tïngeto mïkulögh machat, wölo nyarkalal portö.”

³⁹ Kïwö ngat kïsagh, akïmwa ngale chaye le nyaye.

⁴⁰ Kïmïla ngat kïnyorï kinetankachi rusot kinam rïwöntö nyo nïkis konyikwa. Akimökunkïtcha kïgh nyo yokyini nyinte.

⁴¹ Akwotini kimïla nyo pö sömök, kïlenchï chane, “Tomitenökwa rïwön nko kimïny so? Kakïmïchï! Kakwitïta sa! Arose, kakyonkoghchï Wero Chi pipö ngokï.

⁴² Ongetyenö kepe, kikwitï chichay wïchtonanïn.”

Kakïnam Yeso

⁴³ Panini kitökïngölonöy Yeso kuchumï Yudas, nyo kile akonga ompö kinetankachi chay le taman nko odeny. Kimito nyinte nko söpïch nyo pö pich cho kitïng chokon nko runkun, kiyonï chane tïsï cho echön nko koneti kirurut nko poy.

⁴⁴ Kökikuporchï wïchtoghintonay söpïchoni lö, “Ato asïwekwa chi nyo otokwesan ompö chïchïnat kï nyinte nyoni, anamakwa nyu amït oripotö.”

⁴⁵ Nyini kitï Yudas, kïwö wölo mi Yeso akïlö, “Konetin!” Atolapay kutakwes ompö chïchïnat.

⁴⁶ Atolapay kuwokï pïchay Yeso akïnam nyinte lasiny.

⁴⁷ Kïngwïsï chi akong ompö pich cho kighyongsot ompö atoni chok akuchat yit mötworinto Tïsin nyo Wow.*

⁴⁸ Atolapay kïtep Yeso chane lö, “Kapkanakwa nko chokon nko runkun anamanïn, le chorin?

⁴⁹ Kyomitan nko akwa kïnomnyö Kö pö Tororöt,* wölo melö kyanamanïkwa. Wölo nya kïpïntö Kikirut.”

⁵⁰ Atolapay kïtoyotö kinetankachi kïpïstö Yeso.

⁵¹ Kimito chumwaka nyo kirïpöy Yeso löt nyo kiloköy ananka. Kimököy pïchoni kïnömöy nyinte,

⁵² wölo kurïp, kudong ananke akïtïrista kïchïrut.

Kakip Yeso tawu Kokwö*

⁵³ Kumït chane Yeso wölo mi Tïsin nyo Wow, wölo kiryama tïsï cho echön nko poy nko koneti kirurut.

⁵⁴ Kïrïp Petro ompö wölo low kokay ntökwit sanypa kö pö Tïsin nyo Wow, akumpur nyinte wölini nko pich cho le ripï kïyïwöy ma.

⁵⁵ Kumukyï tïsï cho echön nko Kokwö kïmïkul kïyar söwintön nyo rwokyinegho Yeso atökïpar nyinte, wölo kimönyorïcha nyonikïny.

⁵⁶ Ompöwölo ki chang pich wölo cho kimïrchï Yeso putintön kimanamcha kimörïpcha kegh ngalekwa.

⁵⁷ Atolapay kughyö pich cho te akïmïrchï putintön lö,

⁵⁸ “Kikïlïmacha nyinte kïlentöy, ‘Ongonyan Köyete pö Tororöt kitek pich akwompö osis sömökï atekan anka nyo mötekonye chi morïn.’ ”

⁵⁹ Wölo kïrkegh kile choni, kimanamcha kegh ngalekwa.

⁶⁰ Kïnget Tïsin nyo Wow ompö taghtangwa lapay akïtep Yeso lö, “Ayo, metïngetenyinye kïgh nyo imölyöngu?”

⁶¹ Wölo kïsï Yeso ameyokyïnye ngölyon nyonikïny. Kïtep ngat Tïsin nyo Wow lö, “Aichinyi Kristo,* Wero Tororöt nyo Soyönote?”

⁶² Kïlö Yeso, “Ochan asïwïyekwa Wero Chi kumpuröy okumpö tagh nyo pö Kimuktoghin nyo pö owesyö löwïr akungwïnöy ompö poltoy pö yïm.”

⁶³ Kïkarer Tïsintonay Wow sïrokachi ompö nörekyö akïlö, “Tökïpö ne söwï walaka?

⁶⁴ Kalïmakwa kimwoghsyenyi. Omwoghekwa lö ne?” Kïmwa mïchini kepar.

⁶⁵ Kutor walaka ompö chane kïngwïtyï Yeso akulum konyïn akïmuny. Atolapay kïlenchï, “Ngore köny lö, ngo nyinte nyini kerapakinyi!” Kïpechï ripï kïnam nyinte akurapach.

Kötiyö Petro lö monkït Yeso

⁶⁶ Otini kimito Petro kumpuröy wölo le sanypa kö pö Tïsintonay Wow, kungwïn työ nyo kile mötworin.

⁶⁷ Nyini kisïwa Petro kïyïwöy ma, kuros nyinte akïlö, “Kemitenyi tïkwïl nko Yeso nyo pö Nasaret.”

⁶⁸ Kïtiyö Petro lö, “Monkïtönye, amöpköchinanïnye kini imwoghenyi.” Atolapay kïwechï kegh kïlït or, panini lawel kïwach kïrpö kokoroch.

⁶⁹ Kïsïwa chepay le mötworin Petro ngat kïmwa ngalechaye, kïmwochï pich cho kighyongo kamas lö, “Akonga chichï nyo pö chane!”

⁷⁰ Kïtiyö Petro ngat. Kïmi soya kite kïpechï pich cho kighyongöy nko Petro kïlenchï ngat, “Ichinyi akonga nko chane ompöwölo ingwïnonenyi Kalilaya tïkwïl.”

⁷¹ Kutor kïchïp kegh akïlö, “Monkïtönye chichoni ongölononekwa!”

⁷² Wölo nyini kitomönye kuwany, kïwach kokorochö nyo pö odeny, kunan Petro ngölyontonay kimwochï nyinte Yeso lö, “Itiyonaninyi kïnyïl sömök lö, menkïtanïnyinye kïtomö kïwach kokorochö kïnyïl odeny.” Kïlok nyu Petro ompö ngwonïn.