MALAKI 2 - PIPÏLIA

¹ “Kïlenyona ye nyu, akwa tïsï, anyï ngölyon nyo omwowokwa:

² Mïchini okonyïtanïkwa ompö kïgh anka tïkwïl nyo oghekwa. Mwoghöy ECHOTYON Kimuktoghin. “Wölo ato materanïkwanye, ochïpokwa. Akyochïpokwa ompö nyete le ye, ompöwölo melö kyayangakwa ngal cho kyomwowokwa.

³ Onyörilan kong monekwa, achukan tokochwekwa sïköko kyakikwa cho pö amöros, atulokwa apeghena tawunyan.

⁴ Pköchinokwa nyu kyörurokwa lenyoni atö kumï kughyö kokay muma* nyo kyaman nko pipö ara Lawi.

⁵ “Ompö mumenyan kyoyomisön chane söpon nko kalya, atönön chane tïkuchoni atömanyïl kumï kïkonyïtanïn. Kikonyïtanïn chane nyoman osiswechoni, akuwa kaynenyan.

⁶ Kinet chane ngala man, amörumunönye putintön kutïwekwa. Kitïpï chane nko ani nyo karam akïmöngisyö kwighöy man. Melö pat kigh man kïpoto, wölo kimï kurur pich cho chang kïpïstö ara ngokï.

⁷ Mïchini tïsï kunet pich kunkïtï man pö Tororöt akï mïchini kïpechï pich tïsï atö kenet kirurutköchan, ompöwölo tïsï kï kiyoktoghi ECHOTYON Kimuktoghin.

⁸ “Wölo ye akwa tïsï, kopïstekwa ara man. Kaghakwa pich cho chang kwigh tïkwïn cho ghach ompö kinetutkökwa, awurakwa muma nyo kyaman nko akwa.

⁹ Kïlenyona oghan pipö Israel kïsasakwa akï mïnakwa ompöwölo melö kyarïpakwa machatenyan, aporukwa kïla ato kyonetekwa piköchan.”

Makïlïkwïnye pich cho ghönote ompö Tororöt

¹⁰ Ayo, melö so kïchicha monïngo papo akonga? Melö so Tororöt akonga nyo kighecha? Kwompö ne nyu tömökighönecha kegh achane ntökunka nyï kegh muma nyo kyam Tororöt nko papotïnecha kïlïkwï kwïle?

¹¹ Melö tökï pich cho ghönote pipö Yuda ompö tawu Tororöt. Kegh chane tïkwïn cho ghach nyoman ompö kanasyanta Yerusalem nko koro Israel kïmïkul. Kesïmnyon Kö pö Tororöt* nyo pö saghat nyo chömo kegh nyinte, atolapay kwipchï kegh kor cho soghöy tororötino pipö punton.

¹² Nya kunategha ECHOTYON pich cho ighöy lenyoni ompö kwenu pipö Israel. Mömïchininye pich cho lata choni kepïsï kutötö söwintön akwipchï ECHOTYON Kimuktoghin amöros anka tïkwïl.

¹³ Anyï kitö anka nyo kaghakwa. Kolokyekwa, anyïghit lokekwo ato kïpelo amöroso ECHOTYON ompöwölo melö tökïyongöy amelö tökïtoköy ropöw cho opchinekwa nyinte.

¹⁴ Wölo otepokwa lö, “Kölö ne tömakïtokönye ropöwe?” Ompöwölo nkït nyinte lö melö kitekamananyi kiyomisöt nyo kyamanyi nko korkengu nyo kipönyi otini kitechinyi chumwak. Kyoyomisökwa kegh tïkwïl ompö tawu Tororöt lö olïkunekwa pich cho ghönote akwanyï yenyu ketïlanyi kasar.

¹⁵ Melö so kighakwa Tororöt alïkuna por akonga nko mïkulögh akonga nko nyinte? Akine machata Tororöt kwighöy lenyoni? Kilentöy tosïkökwa monïng cho konyïtöy Tororöt nyoman. Kïlenyona, orip kegh mörumunö kwenunkwa ompö akong nyo penyöy kiyomisöt nyo kimwochï korkenyi.

¹⁶ Ompöwölo mwoghöy ECHOTYON, Tororöt pö Israel lö, “Otöghan nyoman ngala kityakat. Ghöchinanïn otini ighchini chi kïgh nyo gha nyo lata nyoni korkenyi. Kïlenyona, orip kegh lasiny mörumunö kwenunkwa ompö akong nyo melö ghanate ompö tawu korkenyi.”

Kikïrikï Asispa Kirwok

¹⁷ Kosusökwa ECHOTYON kwaghach ompö ngalekwa, alekwa, “Kakisusöcha nyinte kwaghach ompö or ne?” Kosusökwa ompö otini olentekwa, “Ngörokyini ECHOTYON mwokïyis akïchömöy chane,” anta otini otepekwa lö, “Kunko Tororöt nyï kïlentöy rwokyini ompö man nya?”