MALAKI 1 - PIPÏLIA

Chomnyo ECHOTYON ompö pipö Israel

¹ Kimwochï ECHOTYON werkoyon Malaki kïmwochï pipö Israel lö,

² “Ochömokwa, wölo otepanïkwa lö, ‘Ichömechanyi ompö or ne?’ Oyokunan ante ECHOTYON, lö, ‘Ayo, melö so ki werpö chi akonga Esau nko Yakopo? Wölo kyachaman Yakopo,

³ areyan Esau, anyaran komos pö korenyi, acholchan kïpöyit chepkonöwo surkwen.’

⁴ “Ato lö pipö Edom cho pö ara Esau, ‘Kïrkegh kenyar kanastinecha, kïtekecha ngat,’ omwoghan ante ECHOTYON Kimuktoghin lö, ‘Orultenan kïrkegh kïtek ngat.’ Kïkuro korengwa, ‘Koro ghöyityö,’ kekurö pikökwa, ‘Pich cho nörekyini ECHOTYON kokay.’ ”

⁵ Pköchinokwa nyu otini kasïwekwa ompö konyikwo kinyaratanoni. Omwoghekwa nyu lö, “Awes ECHOTYON! Kikelïm owesyenyi kurel ompö koros cho lowöch ompö koro Israel.”

Kakut ECHOTYON tïsï

⁶ Lenchini ECHOTYON Kimuktoghin tïsï, “Konyïtöy monïng kwanta akïkonyït mötworintö echotyontenyi. Kwato ochan paponkwa, kunko konyïtönkwa? Akwato ochan echotyontenkwa, kwompö ne tömokonyïtanïkwa? Osösanïkwa, ayokyï atep lö, ‘Kakïsasichanyi lö ne?’

⁷ Kasasanïkwa otini opunekwa ompö ato kïpelo amöros omisyö nyo le sïmnyon, alekwa kakisïmnyonöcha nyi ompö or ne? Kosïmnyonökwa ompö otini melö kötokonyïtökwa ato kïpelo amörosechan

⁸ nko otini oropkanïkwa kyak cho köryote nko cho ngwolsot nko cho tongunote kïlïkwï amörostin cho opelwanïkwa. Ayo, möpköchinokwanye so lö gha kïyoni? Ato iropchinyi chi pöytoghin kyak cho lata choni, ilentenyi ngörokyini anta porunyi pöropchö?” Mwoghöy ECHOTYON Kimuktoghin.

⁹ Kïlenyona nyu akwa tïsï, asagha Tororöt atökusyonchech. Wölo ato lata choni ropöwe cho opchinekwa nyinte, porwokwa nyoman pöropchenyi?

¹⁰ Mwoghöy ECHOTYON Kimuktoghin lö, “Opï kakar chi akong ompö akwa kukoti Kö pö Tororöt* atömemï chi kuna ma nyo pö kwïle ompö ato kïpelo amörosechan. Melö ongörökyinekwa amelö otokan ropöw cho opkanïkwa nyonikïny.

¹¹ Wölo kusöy kaynenyan pipö ngwïny kïmïkul kïngeta kiwasan ntökïröytö asis. Pelwanïn tïkwïn cho ngutoy cho onyïn ompö wop anka tïkwïl akwipkanïn amörostin cho tïlilöch ompöwölo konyïtanïn chane löwïr.

¹² Wölo osïmnyonekwa kaynenyan otini kosïmnyonökwa ato kïpelo amörosköchan ompöwölo koropkanïkwa ompö atoni omisyö nyo kyasasakwa.

¹³ Omwoghekwa lö, ‘Ne chï ngale kesusecha kyoghochenö le nyï!’ Atolapay asïngwïltanïkwa. Kopkanïkwa kyaki amöros cho pö chorsyö nko cho ngwolsot nko cho tongunote. Olentekwa so otokan kyakichoni? Mwoghöy ECHOTYON.

¹⁴ “Chïpote chi nyo yomisanïn lö oropkanïn makal nyo karam ompö kyakichi atolapay kïlïsanïn akïropkanïn nyo ngwolöy. Ochan pöytoghin nyo wow akuwöghanïn puntoni ngwïny kïmïkul.” Mwoghöy ECHOTYON.