LUKA 9 - PIPÏLIA

¹ Kïkur Yeso kinetankachi chay le taman nko odeny akutö owesyö nko wowïn paraku oy akusop sömewut.

² Atolapay kïyonta chane kwamta Pöyunöto Tororöt akusop cho chirsot.

³ Kïmwochï chane lö, “Mop kïgh nyonikïny ompö pantangwo, kö lïkïp anta mïloto okörö, anta omisyö anta ropïyen anta koti nyo pö odeny.

⁴ Ompurökwa kö anka tïkwïl nyo kakïtakenakwa ntökïtenö angetenakwa wöloni

⁵ akï wop anka tïkwïl nyo matekekwanye pich angeta wöloni akwotini opetöy aparta terïtyon nyo mi kelyekwa, lïku nyoni rirunat ompö chane.”

⁶ Kïpa kinetankachi kïlïtöy kanastin löwïr akwomtoy Lökoy cho Karamach akusop pich ompö wop anka tïkwïl.

Kawanga Erode

⁷ Kïkany kïlïm Erode kirwokinto Kalilaya löwïr tïkwïl cho kigh Yeso kïwanga, ompöwölo kilentöy pikö walaka, kikututï Yoana Kipatisanintö.

⁸ Kïlö walaka kikuchumï Eliya, kïlentöy walaka ketutunö pich cho kimeghö werkoyonto könyisyok.

⁹ Kïlö Erode, “Nkolentan kyasilan Yoana möt, kï ngo nyu nyï kalïman ngal cho pö kwongut?” Kïyar or nyo tuyegho nyinte.

Kapagh Yeso söpïch nyo wow

¹⁰ Kïmïlisyö kiyoktoghï wölo mi Yeso akïmwochï tïkwïn tïkwïl cho kigh chane. Kumït Yeso chane opïn kutang kanasyan nyo kïkuro Petsayda.

¹¹ Kikany kïlïm söpïchischay wölo kitany Yeso, kïrïp kïpa nyinte. Kïtak Yeso chane akïngölonchï ngala Pöyunöto Tororöt akusop pich cho kimököy kisopöt.

¹² Kïkany kwimön kïpa pïchay le taman nko odeny wölo mi Yeso akïlenchï, “Mwochinö pïchï kipechï kegh, kïpa kutang keston nko paren cho lekïtöch atökïnyorï omisyö nko wölo rusot, ompöwölo siriron wölete.”

¹³ Wölo kïlenchï Yeso chane, “Otönö akwane chane omisyö kwam.” Kuyokyï chane lö, “Kïtïngetecha makatin mut nko kaghagh odeny kïpoto! Eso nyu ato kïpecha kyolchï söpïchete kïmïkul omisyö!”

¹⁴ (Kingata söpïchoni kimi atoni, mïrön 5,000.) Kïlenyona, kïlenchï Yeso kinetankachi, “Omwochinö pikö kumpur ngwïny ompö söpïchis cho pö tömönut mut.”

¹⁵ Kwigh kinetankachi lenyoni, kumpur pïchay ngwïny löwïr,

¹⁶ Kïcheng Yeso makatinechay le mut nko kaghaghechay le odeny akïtopön yïm, akusoyön, akïmïnchïran akutö kinetankachi kuporchï pïchoni.

¹⁷ Kyomisyö pïchay tö kïpïghyö löwïr. Kïkwagh kinetankachi rarakan kïnyïghï köröpon taman nko odeny cho le ngötunön.

Kamwa Petro lö, Yeso kï Kristo*

¹⁸ Kimito asistanka Yeso kïsoghöy onkït, akimi kinetankachi ato lekït. Kïtep Yeso chane, “Lentöy pich ochan ngo?”

¹⁹ Kuyokyï chane lö, “Lentöy cho chang Yoana Kipatisanin, kïlö walaka Eliya, kïlö walaka ketutï akong ompö werkoyi könyisyok.”

²⁰ Wölo kïtep Yeso chane lö, “Acho le akwa, olentekwa ochan ngo?” Kuyokyï Petro lö, “Ichinyi Kristo nyo pö Tororöt.”

Ngölono Yeso kiwongunötenyi nko meghenyi

²¹ Kïtagha Yeso chane nyoman lö, “Motöp ntomwochï chi ngölyontononi.”

²² Kïmwochï chane ngat lö, “Mïchini Kuwongu Wero Chi nyoman, töghöy nyinte poyï nko tïsï cho echön nko koneti kirurut. Kïpöröy nyinte kïma, akwompö asispa sömök ketutunö wölo mi pich cho kimeghö.”

²³ Atolapay kïlenchï nyinte chane löwïr, “Ato mököy chi kïrïpanïn, kïmïchini kïwutyeghö kegh akïkasan kimurtöwontenyi osis löwïr akïrïpanïn.

²⁴ Ompöwölo chi anka tïkwïl nyo mököy kïsöru söpontanyi kwighöy kupötöy. Wölo anka tïkwïl nyo wirtoy söpontanyi akwompö ani, kïsöru.

²⁵ Ompöwölo tösini ne chi ato nyorï ngwïny kïmïkul akupot söpontanyi? Möminye kïgh nyonikïny!

²⁶ Ompöwölo anka tïkwïl nyo lolïyonöy ompö ani nko ngalechan ompö tawu pich, kïlolïyonchini tïkwïl Wero Chi, nyinte ato ngwïn ompö ororyenyi nko ororyeto Kwanta nko malayken cho tïlilöch.

²⁷ Omwowokwa nyoman lö, mi pich yeteyi cho mömeghsotcha ntökïtenö kïsïwa Pöyunöto Tororöt.”

Kewenga Yeso

²⁸ Kikany kuwonyö osiswö cho ngata mut nko sömök, kïngeta Yeso kïmwagha ngalechoni, kumït Petro nko Yoana nko Yakopo kïpa kïpus kutïng atökïsagh.

²⁹ Akwotini kitökïsoghöy, kuwenga tokochunyi kïsisit, akïrelachitu akukwerkwerisyö sïrokachi lö, pöt.

³⁰ Kïnyini lawel kïngalan pich odeny nko nyinte, choni kï Musa nko Eliya,

³¹ cho kichumï ompö ororyö akïngalan nko Yeso ngal cho kiporu wölo kimeghtoy nyinte ompö Yerusalem, kïrïp kegh nko tötut pö Tororöt.

³² Kimi Petro ompö rïwön kwen, wölo kikany kïngetyö, kïsïwa ororyo Yeso nko pïchay le odeny kighyongo kamasunyi.

³³ Kïkany otini kipïstoy pïchay Yeso, kïlenchï Petro Yeso, “Echotyon, pïchigh tya kemitenöcha yeteyi, nya ketekacha yete tunkun sömök, lïku nyengu akong, kïpöyit anka Musa, kïpöyit anka Eliya.” (Akimenkïtnye kini kimwoghöy.)

³⁴ Akwotini kitökïngölonöy Petro, kuchumï polta nyo kilum chane. Kimïghyö kinetanchay otini kilum chane poltononi.

³⁵ Kïlö kut ompö poltonay, “Werïnyan nyï nyo kyakïlan, alïm ngalechi.”

³⁶ Kïkany kutinay kingölonöy, kïmökïsïwacha chi kïpoto Yeso. Kimöngalanacha kinetanchay pö Yeso choni kighisyö akimömwochïcha chi anka tïkwïl choni kisïwa osiswechoni.

Sopöy Yeso karöchïnin nyo kipote oy

³⁷ Ato mi ato le asïyech, kïrökunö Yeso nko kinetankachi chay le sömök kutïngay. Kuryam nko söpïch nyo wow.

³⁸ Kutegha chi söpïchnoni nyo kilö, “Konetin, osoghinyi lö roswante werïnyu, ompöwölo montönyan nyete onkït.

³⁹ Nömöy mïkulögh nyo gha nyo ighöy nyinte kuta akïnyini kïwirta kupelpel ngwïny ntökungwïna tankararyanta kut, chopöy nyinte kong amöngetonye lawel.

⁴⁰ Olan orirchï kinetanköku lö tökutul, kïmökumïcha.”

⁴¹ Kuyokyï Yeso chane lö, “Ochech pïnï masteghate mötïng kighanat. Otöponan amïkukön nko akwa nko oyï?” Atolapay kïlenchï chichay, “Mïtune werïngu yi.”

⁴² Akwotini kitökungwïnöy monïngay kïwirchï oyichay nyinte ngwïny. Kuteghchï Yeso oyichay akusop monïngay akuyokyï kwanta.

⁴³ Kitongönchï pïchay löwïr wölo tenö owesyo Tororöt. Otini kitökïmi pich kïtöngönchini tïkwïn cho kigh Yeso, kilenchï Yeso kinetankachi,

Ngölono Yeso meghenyi ngat

⁴⁴ “Akapa yitikwo ater ngalechï ompöwölo kitöni Wero Chi mori pich.”

⁴⁵ Wölo kimöpköchïnye mwaghatanoni, kiwïnga ompö chane ntömökïsöwïcha, kuwagh kïtep Yeso kimi kimwoghöy.

Ngo nyo wow tya?

⁴⁶ Kit ato kimöl kegh kinetanchay kïlentöy ngo ompö kwenungwa nyo wow kïtïl.

⁴⁷ Otini kïpköchï Yeso kinonutyeto mïkulöwekwa, kïnam monïng akïkany kughyongö kamasunyi

⁴⁸ akïlenchï pïchay, “Anka tïkwïl nyo toköy monïngï ompö kaynenyan, kïtokanïn akwanka tïkwïl nyo tokanïn kïtoköy nyinte nyini kiyokwanïn. Ompöwölo anka tïkwïl nyo mïnïng tya ompö akwa löwïr, kï wow nyoni kïtïl.”

Chi nyo möwöchokwanye kïmi nko akwa

⁴⁹ Kimi ato kïlö Yoana, “Konetin kakïsïwecha chi nyo yonöy oy ompö kaynengu ketaghecha, ompöwölo kömökïminye nyinte nko acha.”

⁵⁰ Kïlenchï Yeso nyinte nko kinetankachi löwïr, “Matagha, ompöwölo nyo möwöchokwanye kïmi nko akwa.”

Katagh kanasyanta Samaria kïtak Yeso

⁵¹ Kikany kïrich osiswö cho kikipöy Yeso kïwö yïm, kïmut akonga kïwö kutang Yerusalem.

⁵² Kïyonta pich kuntagha cho kïpa wölo mi kestonï ompö Samaria atökwighchï nyinte wölo kimungoy.

⁵³ Otini kilïm pïchay pö Samaria lö kimi Yeso pan kiwetöy kutöngöy Yerusalem wölo makïchamcha kïtak nyinte.

⁵⁴ Kïkany kïlïm kinetankachi Yakopo nko Yoana ngalechoni, kïlenchï Yeso, “Echotyon, imökenyi kekurunöcha ma kungwïna yïm atö kuwany chane?”

⁵⁵ Kïwaghaka Yeso akïsyölchï chane kïlentöy, “Monkïtökwanye lö, mïkulögh ne nyo otïngetekwa, ompöwölo melö kingwïn Wero Chi kuwur söpon pö pich, wölo kingwïn kusop.”

⁵⁶ Atolapay kïpa löwïr kutang wölo mi kestoni walaka.

Cho lïku rïpanpa Yeso

⁵⁷ Kikany otini kipechini kegh pantangwa, kïlenchï chitö anka Yeso, “Orïpïnyi ompö wop anka tïkwïl wölo iwetenyi.”

⁵⁸ Kïlenchï Yeso chichay, “Tïngeto chepkonöw pïrïmpotikwa cho möngöy akïtïng töritwö korikwa, wölo mötïngnye Wero Chi wölo könoghöy mötïnyi atökumuny.”

⁵⁹ Atolapay kïlenchï Yeso chitö anka, “Rïpkanïn.” Wölo kïlö, “Echotyon, pïswante nyo pö tagh amïla atotïp paponyu.”

⁶⁰ Kuyokyï Yeso lö, “Nya kïsïnga pich cho kimeghö meghonkökwa. Wïyö nyo le nyi aiyamta lökoyo Pöyunöto Tororöt.”

⁶¹ Kïlö chitö anka, “Orïpïnyi, Echotyon, wölo pïswante nyo pö tagh owö kaw oyomis monechu.”

⁶² Kïlenchï Yeso chichay, “Ngo nyo menkït lö möngoronye par kuten ato nam chi köpompo eghin akïmi kurosöy löt? Kïlenyona ye, ato pïsï chi tïkwïn kukaper möngenyi, kïmötïngnye kinyiwut ompö Pöyunöto Tororöt.”