LUKA 5 - PIPÏLIA

¹ Kighyongö Yeso asistanka sörömu nanampa Kenasaret, kimi pich cho kipïr kegh kutang wölo kimi nyinte cho kimököy kïlïmöy ngölyonto Tororöt.

² Kisïwa melin odeny cho kikïrötyï sörömu nanam, wölo kikingeta nömiko kaghagh oringwa, akimi kïmwötöy netinekwa.

³ Kïpus Yeso akonga pö melinechoni nyo kipö Simon, akïtep nyinte lö, “Ipö meli kutang pögh.” Kumpur Yeso melinay akunet söpïchay.

⁴ Kïkany kuwany kïngalan, kïlenchï Yeso Simon, “Yumtenö meli kutang pögh kwen atoreytenö netinekwa atanama kaghagh.”

⁵ Kuyokyï Simon lö, “Echotyon, kökinoghyecha amïna kïyech amökïnamachanye kïgh nyonikïny. Wölo ato imwaghanyi lenyoni, oreytonan netine.”

⁶ Kureytö netinechay kïpa pögh ori, kïnam kaghagh cho möngörï ntökïmach kïngötïy netinekwa.

⁷ Kïlenyona, kïkurö morïn pikökwa walaka cho kimi melinay anka kïpka kungarak chane kuchut kaghaghe. Kunyïghit kaghaghechay melinekwa kwodeny ntökïmach kïlït pögh meline.

⁸ Kïkany kïsïwa Simon Petro choni kighisyö, kupïtyï kelyo Yeso akïlö, “Ngetena wölo omitan, Echotyon, ompöwölo ochan chi pö ngokï.”

⁹ Kimwa Petro lenyoni ompöwölo kïtöngönchï nyinte nko cho kimi tïkwïl, chongïn pö kaghagh cho kinam chane,

¹⁰ kitöngönchï tïkwïl Yakopo nko Yoana cho kile werpö Sepedayo akï cho kightoy akonga pöghisyengwa nko Simon. Kïlenchï Yeso Simon, “Mewöghisyö, ompöwölo kïngeta ye kutang tagh, inömunenyi pich le nya kïnömöy kaghagh.”

¹¹ Kuchutyï Simon nko pïchay kimi tïkwïl melinekwa sörömu nanam, akïpïstö tïkukwa löwïr akïrïp Yeso.

Sopöy Yeso chi

¹² Ato kimi Yeso asistanka kanasyan nyo kimi korononi, kungwïn chi nyo kyamate psenkwet. Otini kisïwa Yeso, kïwirchï kegh ngwïny kïrïwotö mu akïsagh nyinte, lö, “Ato imökenyi Echotyon, imukenyi itïlilanïn.”

¹³ Kughïtö Yeso ewunyi akïswany nyinte akïlenchï, “Omökan, tïlilitunö ye.” Kïnyini lawel kïngeta nyinte sömewonay.

¹⁴ Kïtagha Yeso nyinte lö, “Memwochï chi ngölyontononi, wölo rotanyi ntet wölo mi tïsin aipïsï nyinte kurosinyi, atolapay itötö amöros ompö kisopötengu le wölo kimwayta Musa, atökunkïtï chi anka tïkwïl lö, ketïlilitunyi.”

¹⁵ Wölo kitas tagh kïyasta lökoyechi, kïghamïtï kegh pich cho chang kïpka kïlïm ngalechi, akesop cho kichiryote.

¹⁶ Kïkany kulowit kegh nyinte, kïwö wölo le siriron tökïsagh.

Kisop Yeso chi nyo kimeyta por

¹⁷ Kinetisyegho asistanka Yeso wölo kimi Parisaytin nko koneti kirurut cho kipkana kanastin löwïr cho pö Kalilaya nko Yudea nko Yerusalem. Kutö Tororöt Yeso owesyö nyo sopo pich cho kichiryote.

¹⁸ Kipka pich cho kikösöno menyon chi nyo kimeyta por. Kumukyï chane or nyo kiptoy chichay kïlït köyoni kimi Yeso atökutö tawunyi,

¹⁹ wölo kimemïcha ompö chongïn pö pich chang pich cho kimi atoni. Kïlenyona kïpus chane pörko köyay akïngany, akurekunö chichay kïmi nko menyontenyi ntökwitï kwenu tuyonay otini le tawu Yeso.

²⁰ Kïkany kïsïwa Yeso kighanatengwa, kïlenchï chichay, “Wena Kikelöstowunyi ngokiku.”

²¹ Kïngölonchinö koneti kirurut nko Parisaytin akïtep kegh lö, “Akï chi nyo ngölonöy cho mwoghöy Tororöt nya? Chi ngo nyo muköy kïlöstoy ngokï, möpotonye Tororöt onkïtï?”

²² Wölo kipköchï Yeso ngalechini kingölonchinegho kegh, kïlenchï chane, “Ne ngale chï oteponekwa kegh mïkulis nya?

²³ Omwowune nyo kwïskwïs, kemwa lö, ‘Kikelöstowunyi ngokiku,’ anta kemwa lö, ‘Ngeta aiweghö kelyeku?’

²⁴ Wölo omökan Oporwokwa ye nyu lö tïng Wero Chi owesyö ompö ngwïnyinï nyo löstoghchini pich ngokikwa.” Kïlenchï chichay kimeyta por, “Ngeta aisït menyontengu aiwechï kegh katangu!”

²⁵ Kïngeta chichay tawungwa panini lawel akïsït menyontenyi akïwechï kegh katanyi, akï sölotoy Tororöt.

²⁶ Kïtöngönchö chane lapay nyoman, akukus Tororöt, akïwir chane mïghotö kïlentöy, “Kakïsïwecha asete tïkwïn cho tomö kesïwena asistanka.”

Kuröy Yeso Lawi

²⁷ Kïngeta Yeso kanasyantanay akwotini kimi pan, kïsïwa kwöghinto surï nyo kikïkuro Lawi, kimpuröy atay kïkwögho surï. Kïlenchï Yeso nyinte, “Rïpkanïn.”

²⁸ Kïpïstö tïkuchi löwïr akïrïp nyinte.

²⁹ Atolapay kikurchï Lawi Yeso omisyö nyo wow, kïtuyechï tuyot nyo wow ompö katanyi kïmi kwoghi surï.

³⁰ Kïngwïrngwïronchï, kinetanpa Yeso Parisaytin nko koneti kirurut kïlentöy, “Ompö ne tomisïyekwa agheghsïyi nko kwöghi surï nko mwokïyis?”

³¹ Kuyokyï Yeso chane lö, “Melö möröy pich cho karamach porwöy chepsakïtyan, kïpoto cho chiryote.

³² Kimangwïnanye okur pipö man, wölo mwokïyis atökïkötö ngokikwa.”

Kinetut paraku kïrurat

³³ Kïtep pikö walaka Yeso lö, “Atï kïruröy kinetanpa Yoana kïnomnyö akïsöghöy akwighöy lenyoni kinetanpa Parisaytin tïkwïl, wölo omisïyi akïgheghsïyi kinetanköku.”

³⁴ Kuyokyï Yeso lö, “Ekumuko kïkïrur to cho kapka koyögh otini tökïmi chito koyögh nko chane nya? Memukonye nyonikïny.

³⁵ Wölo pkonöy osiswö cho kïchengo kwenungwa chito koyögh, osiswechoni nyu ato kïruröy chane.”

³⁶ Kïmwochï Yeso tïkwïl körkeyïn anka lö, “Möminye chi nyo polöy sïra nyo rel akï kïnö sïra nyo kiyosit. Ato igh lenyoni kïkörero nyinö rel, amemukönye kïnöwonta nyo rel ntökïnomnyö nko nyo kiyosit.

³⁷ Metöninye chi dipay* cho kötökeryököy tökol cho kiyositu ompöwölo ato igh lenyoni, kïköreröy tökolkö akïmïlta kegh.

³⁸ Wölo mïchini ketö dipay cho kötökeryököy tökol cho relach.

³⁹ Möminye chi nyo chömöy kïgheghöy dipay cho kötökeryököy nyo kikïgha cho kipöyit köny, ompöwölo lentöy, ‘Dipay sonye chay kipöyit köny?’ ”