LUKA 4 - PIPÏLIA

¹ Kinyïghitate Mïkulögh nyo Tïlil Yeso otini kimïlegha Yordan. Kuntöghoghchï Mïkulögh kïwö surkwen,

² kïtyama Onyötö nyinte wölini ompö osis tömönut angwan. Akïmamnye kïgh nyonikïny osiswechoni löwïr, kwam kömöy lötuto osiswechoni.

³ Kïlenchï Onyötö, “Ato ichinyi Wero Tororöt, igh koghï kïlïkwï makatyan.”

⁴ Wölo kuyokyï Yeso lö, “Kikikir lö, ‘Mösöponye chi makatyan onkït.’ ”

⁵ Atolapay kumït Onyötö kïpusta wölo töror akuporchï pöyunötin cho pö ngwïny kïmïkul ompö pöroyin nyo tangogh.

⁶ Akïlenchï, “Okoninyi owesyö nko mökosye tïkwïl, akulet tagh kïlenchï, ‘Mito tïkuchï löwïr morichan nko ororyengwa amukan otöni chi kïtïkon nyo kakïlan ante.

⁷ Ato isaghaninyi, kïlïku tïkuchete löwïr cheku.’ ”

⁸ Kuyokyï Yeso lö, “Kirate lö, ‘Sagha Echotyon Tororötïngu aipöghisyechï nyinte onkït.’ ”

⁹ Atolapay kumït Onyötö Yeso ntökwït Yerusalem akïkany kughyongö Kö pö Tororöt* parak akïlenchï, “Ato ichinyi Wero Tororöt, isirchï ngwïny,

¹⁰ ompöwölo kikikir lö, ‘Yonu Tororöt malaykenichi atökïripïnyi,’

¹¹ akukirate ngat lö, ‘Nömoninyi malaykenichi ewunekwa atömaswany kagh kelyeku.’ ”

¹² Wölo kuyokyï Yeso lö, “Lentöy Kikirut, ‘Metyam Echotyon Tororötïngu.’ ”

¹³ Kïkany kuwany Onyötonay kïtyam Yeso ompö or anka tïkwïl, kïpïstö nyinte nyo tangogh.

Ketor Yeso pöghisyenyi ompö Kalilaya

¹⁴ Kïmïla nyu Yeso kutöngwï Kalilaya akimi owesyo Mïkulögh nyo Tïlil nko nyinte. Kikïmwatïta lökoyechi kïghömï korononi kïmïkul.

¹⁵ Kinetisyeghö kori sowut, kïsal pich lapay nyinte.

Kakïtagha Yeso Nasaret

¹⁶ Atolapay kïwö Yeso kutang Nasaret, wölini kinara, kïmi asispa Sapato* kïwö le wölo kilata otöptanyi kutang kö pö saghat.* Kughyö atökusomön Kikirut,

¹⁷ ketö nyinte kitapï, kïyat ato kikir werkoyon Isaya lö,

¹⁸ “Mi Mïkulöwu Echotyon nko ani, ompöwölo kikïlanïn omchï mey Lökoy cho Karamach. Köyonwanïn atomchï pich cho rötote lö, kityoköy chane, atökurosïta ngat chepkarotin, atöketyak pich cho kïpïröy,

¹⁹ atamwatïtan lö, kikwitïta ato söru Echotyon pikachi.”

²⁰ Kïkar Yeso kitapunay, akutö kingörokinto kö pö saghat, akumpur ngwïny. Kuchirchï pich nyinte konyïn tïkwïl cho kimi kö pö saghat.

²¹ Kutor kïmwochï pïchay lö, “Ketïta asisï Kikirutchï le otini kalïmakwa kesomön.”

²² Kïsöwintönchï chane tïkwïl lö, pö man ngalechï, kïtöngönchï pïchay ngala pöropchö cho kïngalan nyinte. Akïtep kegh lö, “Möweronye Yosep nyete so?”

²³ Kïlenchï pïchay, “Onkïtön nyoman lö, omwowanïkwa körkeyïnay lentöy, ‘Sopö kegh, we chepsakïtyan.’ Amwowanïkwa ngat lö, ‘Ighene yeteyi le kanasyanteto katangu tïkuchanya kikïlïmacha lö, kighisyeghö Kapernaum.’ ”

²⁴ Kïlenchï Yeso omwowokwa nyoman lö, “Möminye werkoyontö nyo kïchömuno kanasyanteto katanyi.

²⁵ Wölo omwowokwa nyoman lö, kimito korï cho le mïsïktin cho chang koro Israel ompö osiswo Eliya, atanya kipech könyis sömök nko aro mut nko akonga, kwitï kömöy kore kïmïkul,

²⁶ wölo kimöyontanye chi Eliya kïwö wölo kimi mïsïktine walaka ompö Israel, kïpoto mïsïk akonga nyo kimöngöy Sarepat, nyo mi okumpö Sidon.

²⁷ Akimito koro Israel pich cho chang cho kyamate psenkwet ompö osiswo werkoyon Elisya, amelö kikisop nyo le ompö akonga, kïpoto Naaman nyo pö Sirya.”

²⁸ Kïnörekyö tya pïchoni kimi kö pö saghat otini kilïm ngalechoni,

²⁹ kughyö akuretö Yeso kïweghö kanasyantanay, akumït kïpus kamas nyo kitek parakunyi kanasyantengwa, ntökwit wölo le renker. Kimököy kïyumteghö nyinte atoni.

³⁰ Wölo kïweghö Yeso söpïchay kwen akïwechï kegh.

Chi nyo kitïng oy cho ghach

³¹ Atolapay kïwö Yeso kïröytö Kapernaum, kanasyan nyo mi Kalilaya, wölo kinetisyeghö nyinte asispa Sapato.

³² Kïtöngönchï chane wölini kinetïtoy pich, ompöwölo kitïng ngalechi owesyö.

³³ Akimi chi köyoni pö saghat nyo kitïng oy cho ghach, kutegh tya lö,

³⁴ “Kengwïnanyi so Yeso, chi pö Nasaret, isusecha? Kengwïnanyi so tewanyecha? Onkïtön lö, ichinyi Nyo Tïlil nyo pö Tororöt!”

³⁵ Kuteghchï Yeso nyinte lö, “Sisa aingetunö chichï!” Kïwirta oyichay chichay ompö tawuto pïchoni, akïngetunö nyinte wölo kimedanye kïgh nyinte.

³⁶ Kïtöngönchï chane löwïr akïtep kegh lö, “Ne ngale chï? Chikyini nyinte oy ompö kimukat nko owesyö akïterchini chane.”

³⁷ Kemwatïta lökoyechi kwitïta korononi kïmïkul.

Sopöy Yeso pich cho chang

³⁸ Kïngeta Yeso köyay pö saghat akïwö kutang kö pö Simon, kutomtö chirate pokörto Simon nyo kyamate tïnyon, kïmwochï pïchay Yeso ngaleko poroni.

³⁹ Akughyongö Yeso pöröyunyi kamas akutul, kïngeta nyinte tïnyontonay panini, kïnget nyinte akïpöghisyechï chane.

⁴⁰ Kikany kïröytö asis, kumïtï pich löwïr kongotikwa cho kichirsot ompö sömewut walaka nko walaka kïpka wölo mi Yeso, kukanagh morichi akusop chane löwïr.

⁴¹ Kingeta oy tïkwïl pich cho chang cho kiteghyot lö, “Ichinyi Wero Tororöt!” Kuchikyï Yeso chane akimökïchömchïnye kïngalan, ompöwölo kinkït chane lö ki Kristo* nyinte.

Omtegho Yeso kori sowut

⁴² Kïngeta Yeso kanasyan otini le kiwasan akïwö wölo le siriron, kïmarata pich nyinte, otini kituyeghö kumukyï kïsagh nyinte kïtöpö nko chane,

⁴³ wölo kïlenchï, “Mïchinanïn amtan Lökoy cho Karamach cho pö pöyunöto Tororöt kwitïta kanastine walaka tïkwïl, ompöwölo nyoni nyo kimïtwanïn Tororöt agh.”

⁴⁴ Kïlenyona kwamtategha kori sowut löwïr ompö korononi pö Yudea kïmïkul.