LUKA 3 - PIPÏLIA

¹ Ompö könyi taman nko mut nyo pö paytaghpa Kaisari Tiperio, ki pöytoghinto Yudea Pontio Pilato, kï ki pöytoghinto Kalilaya Erode, aki pöytoghinto Iturea nko Trakoniti werïngwa Pilipo, kï ki pöytoghinto Apilene Lusani

² akï tïsï cho echön Anas nko Kayapa. Kingwïnchï atoni ngölyonto Tororöt Yoana Wero Sakaria ompö surkwen.

³ Kïlenyona kïwestotö Yoana kïghömï okumpö Yordan, kwomchini pich lö, “Okötenö ngokikwo tökepatisanak, atökïlöstewok Tororöt ngokikwo.”

⁴ Kile wölo kikikirta ompö kitapu werkoyon Isaya lö, “Mi chi nyo tegho surkwen lö, ‘Agha ara Echotyon, oghïtenö ortïnechi.

⁵ Kinyïghitöy mpöghogh anka tïkwïl nyo mötïny. Akeporöy kutïng nyo wow nko nyo mïnïng kïghïtö, kighïtoy ortïn cho kikudisyö akeghöy ortïn cho mïkököch.

⁶ Sïwïyi nyu pich löwïr sörunöto Tororöt.’ ”

⁷ Kïpka nyu söpïchis pö pich wölo mi Yoana atökupatisan nyinte chane. Kïlenchï pïchay, “Heywey moroyutchï! Ngo nyï kömwowokwa lö, omukekwa ochïwïtone sito Tororöt nyo ngwïnöy?

⁸ Agha nyu tïkwïn cho poru lö, kyokötekwa ngokikwo amotor amwagh akwane lö, kïchï monïngo Apraam. Omwowokwa nyoman lö, muköy Tororöt kwighöy koghichete kilïkwï monïngo Apraam!

⁹ Kimi oywö kïpsach nyo töröy ighin pö ket. Kïtöröy ket anka tïkwïl nyo meyinönye akwa cho karamach akewirchï ma.”

¹⁰ Kïtep pïchay nyinte lö, “Akeghecha ne ye nyu nya?”

¹¹ Kïlenchï, “Ato itïng chi anka sïro odeny, itö akonga chi nyo chopöy, akwanka tïkwïl nyo tïng omisyö kupar nko chitö anka.”

¹² Kipka kwoghi surï tïkwïl atökepatisan, kïtep nyinte lö, “Echo le acha köny konetin, kighecha ne?”

¹³ Kïlenchï, “Metöp chi ntekwagh surï cho tïlöy cho kikïmwowokwa.”

¹⁴ Kïtep askarin tïkwïl lö, “Ekwacha köny, kighecha ne?” Kïlenchï, “Masara chi ropïyen ompö charut anta orwokyï chi ompö putintön akany kïmïchok ropïyenikwo cho onömöy.”

¹⁵ Kïsïch pïchay kinonut cho chang, ompö paraku Yoana akunonsyö lö, ekï Kristo* nyinte nya anta ewo.

¹⁶ Kïlenchï Yoana chane löwïr, “Opötisönekwa ompö pögh, wölo pïnï lötunyan chi nyo wow kïtïlanïn nyo mömïchinanïnye ompö atyak kweghkachi. Pötisönekwa nyinte ompö Mïkulögh nyo Tïlil nko ma.

¹⁷ Tïng seröwontenyi nyo sero paghechi akïghömïtyini paghe töpotenyi, wölo pelo morïre ma nyo memisonye.”

¹⁸ Kïngölonchï Yoana pïchay ompö ortïn cho chang otini kyomchini Lökoy cho Karamach.

¹⁹ Wölo kïsyölchï Yoana pöytoghin Erode ompöwölo kip Erodiya, korketo werïngwa akwigh tïku walaka cho ghach cho chang.

²⁰ Wölo kitas Erode ghöyïntanyi tya otini kilut Yoana chela.

Kipatisanata Yeso

²¹ Kïkany kepatisan pïchay löwïr, kepatisan Yeso tïkwïl. Otini kisoghöy kïyata yïmö,

²² kïrökyï Mïkulögh nyo Tïlil nyo kitïng por nyo lata chepïrïm. Kungwïna kut yïm nyo kilö, “Ichinyi Werïnyan kegh nyo le chamanenyan. Ochömeninyi kegh tya.”

Ara yiyo Yeso

²³ Kitor Yeso pöghisyenyi ato kitïng könyis tömönut sömök akilentöy pich wero Yosep nyinte, wero Eli,

²⁴ wero Matat, wero Lawi, wero Melki, wero Yanay, wero Yosep,

²⁵ wero Matatiya, wero Amos, wero Naum, wero Esli, wero Nakay,

²⁶ wero Mati, wero Matatiya, wero Semeyin, wero Yosek, wero Yoda,

²⁷ wero Yoanan, wero Resa, wero Serupapel, wero Syealtiel, wero Neri,

²⁸ wero Melki, wero Adi, wero Kosam, wero Elmadam, wero Er,

²⁹ wero Yoswö, wero Elieser, wero Yorim, wero Matat, wero Lawi

³⁰ wero Simion, wero Yuda, wero Yosep, wero Yonam, wero Elyakim,

³¹ wero Melea, wero Mena, wero Matata, wero Natan, wero Daudi

³² wero Yese, wero Oped, wero Poas, wero Salman, wero Nasyon

³³ nyo kile wero Aminadap, wero Admin, wero Arni, wero Esron, wero Peres, wero Yuda

³⁴ wero Yakopo, wero Isak, wero Apraam, wero Tera, wero Naor

³⁵ wero Seruk, wero Reu, wero Pelek, wero Eper, wero Syela

³⁶ wero Kaynan, wero Arpaksad, wero Syem, wero Noa, wero Lamek

³⁷ wero Metusela, wero Enok, wero Yared, wero Malalel, wero Kaynan

³⁸ wero Enos, wero Set, wero Adam wero Tororöt.