LUKA 17 - PIPÏLIA

¹ Atolapay kïlenchï Yeso kinetankachi, “Pkonchini pich tïkwïn cho ighöy chane kwigh ngokï nyo mötïny. Wölo ochech chichona weru tïkuchoni.

² Mïchini chi nyo lenyoni kerötyï kat koghpa pagh nyo wow akewirchï nanam kwen, kïtïl kwigh akonga ompö cho mïnkech kwigh ngokï.

³ Orip kegh le! Ato lelunyi werïngwo isyölchï, akwato kötö ilöstoghchï nyinte.

⁴ Ato lelunyi nyinte kïnyïl mut nko odeny ompö asisini akonga akïmïla wölo imitenyi kïnyïl mut nko odeny akïlö, ‘Kokötan,’ kïmïchini löstoghchinönyi nyinte.”

Kighanat

⁵ Kïlenchï asistanka kiyoktoghï Echotyon, “Töswecha kighanat.”

⁶ Kïlenchï Echotyon chane, “Ntökotïngetekwa kighanat nyo mïnïng nyo tenö kösïghyonto ket nyo kïkuro aradali, omukekwa omwochï ketï lö, ‘Ngeta nko ighinköku lö ikötkötyï kegh nanam,’ kïterwokwa.”

Ighisyo mötworin

⁷ Kitas tagh Yeso, kunetisyö lö, “Ato itïngönyi mötworin nyo ngoröy par anta nyo yokuyöy kyak, akwotini körotï kaw, melö ilenchinenyi töpenö ngwïny lawel aiyomisyö.

⁸ Wölo ilenchinenyi, ‘Ighe omisyenyan aipkanïn aiköngisyö ntomisyan agheghsyö. Atomuchö iomisyö aigheghsyö nyinte.’

⁹ Ayo, kiyokyini mötworin sörö lö, ompöwölo kegh kïgh nyo kikïmwochï kwigh?

¹⁰ Kïlenyoni ompö akwa tïkwïl, akanya otini kaghakwa tïkwïn löwïr cho kökïlenchokwa agha, amwagh lö, ‘Kïchicha mötworköku cho mökïmöro kïgh kikusat. Kakighacha pat tïkuchini kökïmwowecha kegha kïpoto.’ ”

Kesop Yeso pich taman

¹¹ Otini kimi Yeso pantanyi kutöngöy Yerusalem, kuwerata rotyo Samaria nko Kalilaya.

¹² Kïkany kilït kanasyan akonga ompö wöloni, kïtuyeghö pich taman cho kyamate psenkwet. Kighyongö chane wölo low kite,

¹³ atolapay kuteghyö kïlentöy, “Yeso, Echotyon, syonchecha.”

¹⁴ Otini kisïwa Yeso chane, kïlenchï, “Ape ye oporchinö kegh tïsï.” Otini kimi pan, kïweghö chane.

¹⁵ Kïnget akong ompö chane nyo otini kisïwa lö kyosöp, kïmïla kïsölonu Tororöt ompö kut nyo wow.

¹⁶ Kupïtyï kelyo Yeso akuyokyï sörö. Ki chi pö Samaria nyinte, pïchay sösöy pipö Yaudi.

¹⁷ Atoni nyu kïlö Yeso, “Ayo nki pich taman cho kökisop, pich taman, kunko chay le mut nko angwan?

¹⁸ Kölö ne tökïlïkwï chichï le ton onkït nyo kamïla kuyokyï Tororöt sörö?”

¹⁹ Atolapay kïlenchï Yeso chichay, “Ngeta aiwechï kegh, kesopinyi kighanatengu.”

Kingwïnata Pöyunöto Tororöt

²⁰ Kïtep Parisaytin* walaka Yeso lö, “Ekwoyï ato itu Pöyunöto Tororöt?” Kïlenchï, “Molenchï kegh itu Pöyunöto Tororöt ompö or nyo kesïwïyi.

²¹ Möminye chi nyo muköy kimwa lö, ‘Arosa anyï,’ anta, ‘Onyinö,’ ompöwölo mi Pöyunöto Tororöt kwenunkwa.”

²² Atolapay kïlenchï kinetankachi, “Itu osiswö cho opïrchinekwa lö, tökïsïwa asis nyo le ompö akonga nyo pö Wero Chi, wölo mosïwïyekwanye.

²³ Pkonöy pich cho lenchinokwa, ‘Arosa, anyinö,’ anta, ‘Arosa anyï mi yi,’ wölo mapa lö sarpap, amarïp chane.

²⁴ Ompöwölo kïle wölo wöchtoy kiryol kuwongwongö ompö yïm, kïlïku nyoni Wero Chi ompö asistanyi.

²⁵ Wölo nyo pö tagh kuwongu nyinte nyoman akïtagh pïnete.

²⁶ Kïle wölo kilata ngala ompö osiswo Noa, kïlïku choni tïkwïl ompö osiswo Wero Chi.

²⁷ Kyomisïyi pich akïgheghsyö, kensïyi chane akuyiltoy monekwa, ntökwïtïta asisini kilït Noa meli. Atoni nyu ato kitï museryonta nyo kïtïgh chane lömïs.

²⁸ Kilata nyoni tïkwïl ompö osiswo Lot. Kimi pich kwomisïyi akïgheghsïyi akyolsïyi akwoltoy tïkwïn akikötkötisïyi akïteksïyi.

²⁹ Wölo otini kingeta Lot Sodoma, kïchïnuna yïm ma nyo kiwany chane lömïs.

³⁰ Lata nyoni wölo lïku asisoni chumu Wero Chi.

³¹ “Mörökunye chi nyo mi pörkö asisoni tökïcheng tïkuchi cho mi kö. Kïlenyoni tïkwïl ompö chi nyo mi par, mökïmïlonye kuros lö mi ne löt.

³² Anan ya cho kinyorï koko Lot.

³³ Anka tïkwïl nyo riröy söpontanyi, kïwirtoy, wölo anka tïkwïl nyo wirtoy söpontanyi ompani, kïsöru.

³⁴ Nyomwowok lö, ompö osiswechoni, mito pich odeny cho rusot pöröy akonga, kïchengöy anka, kepïstö anka.

³⁵ Mi tïkwïl korï odeny cho ngoghöy pagh akonga, kimïtoy anka kepïstö anka.” [

³⁶ Mi tïkwïl pich odeny par, kimïtöy anka kepïstö anka.]

³⁷ Kïtep kinetankachi lö, “Ighisyot choni ompö onö nya Echotyon?” Kuyokyï chane ompö ngötïnyö lö, “Ghömechini chesampunoy wölo mi kïgh nyo kama.”