LOK 3 - PIPÏLIA

Sitöt nko kötogh nko kikönöt

¹ Ochan chi nyo onkït ngwan kïtya sito Tororöt

² Kimïtyanïn wölo tuw akwighanïn owesteghö ortïn cho puryö löpoyïn.

³ Kintïlukanïn nyinte kwimön nyo puryö kisyonöt.

⁴ Kechïrkan portanyan akuriyanïn ko

⁵ Kirikyanïn akol nyo pö tangany nko nyarïl.

⁶ Keghanïn nyinte amang wölo tuw le mïntïruch cho pö könyisyok.

⁷ Kikörchanïn nyinte wölo momukanye ntachïwït karatenanïn sïrïmtin cho tïrusöch.

⁸ Korirchan ECHOTYON tökungarakan wölo katagh kïlïm saghatenyan.

⁹ Kakara nyinte koghïn cho echön orenyan ntökwigh wölini kowetan kupot.

¹⁰ Karkegh nyinte nko momöril nyo mi kusyepanïn lata ngötïny nyo pulchinanïn.

¹¹ Kipulchanïn ompö or akuchutanïn wuw atolapay kïpachpachanïn akïpïsyanïn wölini.

¹² Kinyigh kïwantinyi akïwutenanïn kotenyi.

¹³ Kirïnganïn mïkulögh koti möronkinyi.

¹⁴ Kalïkwan nyu kïgh nyo kïroröchini kötumenanïn chane löwïr ompö tumwöyikwa kwimön.

¹⁵ Keghanïn nyinte owongwï alatan chi nyo kökisïlum kïnïkïgh tïkwïn cho ngwonöch tya.

¹⁶ Keghanïn anyagh koghïn kuwonyanïn kelat akïwirchanïn terïtyon.

¹⁷ Kepotenanïn kalya lö poy melö tonkïtön ngörekyö lö nen.

¹⁸ Kïlenyona ononchan kegh lö, “Tökïmi onö ani söpon nya? Puryö kïgh nyo tokönan ompö ECHOTYON!”

¹⁹ Ononan nyarïl nko kiwongut nyo kyonyorwan, kiwongut nyo karkegh nko nyo pö chi nyo kakwigh kïnyïkwïda ködöwï.

²⁰ Otini kenan mïkulöwunyan choni, kwighanïn atïnkura otöpö onkït

²¹ Wölo anyï ngölyon nyo ato ananan kïkonanïn kikönot:

²² Möngötönye chomnyo ECHOTYON kokay, melö wonyot kisyonutkachi.

²³ Ompöwölo ighöy nyinte tïkuchoni kïpichöghöchitu ompö tökwoghö anka tïkwïl Tororöt nyinte nyo muköy pich kumanta kegh nyinte nyoman.

²⁴ ECHOTYON kï kaplawachtanyan kïmïkul kïlenyona mi kikönötenyan löwïr wölo mi nyinte.

²⁵ Karam ECHOTYON ompö pich cho twoyto kegh nyinte nko cho chömöy kïpöghisyechï

²⁶ Kïlenyona karam tya ompö acha kekönö sörunötenyi ompö mïkukönöt

²⁷ Akï karam chi anka tïkwïl kïnya kïnagh mïkukönöt otini tökïmïnïng.

²⁸ Karam ketïnkursyö opïn akesisyö ato kïnyorucha kiwongunöt ompö wölo mi ECHOTYON.

²⁹ Mïchinecha kengïrukisyenö ompö tawunyi akep kegh ngwïny ompöwölo manan tökïmi kikönötö.

³⁰ Ato kichopecha kong akemwaghecha, mïchini ketokocha choni löwïr.

³¹ Melö pörchinecha patagh Echotyon kokay.

³² Muköy nyinte kwighecha kelokyenö wölo syonchinecha ompö chomnyenyi nyo möngötönye.

³³ Ompöwölo melö ngörökyini ECHOTYON otini nyörilecha kong anta ighecha kesönönchenö.

³⁴ Atï kakichop kong ratan löwïr ompö kor,

³⁵ amökeghchïnye pich man le nyo kömökino ompö tawu Tororöt nyo töror tya

³⁶ akemas man ompö kokwotïn, olentekwa so mösïwïyinye Echotyon choni löwïr?

³⁷ Ngo nyo muköy kïmwa lö ogho kïgh akwigha lenyini ato kitomönye kïmwa Echotyon lö igho?

³⁸ Ayo, melö so kuti ECHOTYON nyo Töror nyo mwoghöy lö igho kïgh nyo karam anta nyo gha?

³⁹ Kwompö ne nyu tökengwïrngwïronecha cho kïchï ptangengmötin, ato mungecha ECHOTYON ompö ngokicho?

⁴⁰ Mïchinecha kesyaka ortïnecho akemïlonchö ngat wölo mi ECHOTYON.

⁴¹ Keyotyinö Tororöt nyo mi yï mïkulisköcho akesagh nyinte kelentöy,

⁴² “Kakighacha ngokï akepeny ngaleku, we ECHOTYON, wölo tomönye löstewechanyi.

⁴³ “Kilumenechanyi nörekyengu aiyonotecha aiparechanyi nyo puryö kisyonchin.

⁴⁴ Kiluminyi polto nörekyengu nyo kikarta sowutköcha metunyi.

⁴⁵ Keghechanyi kelïkuna samï ompö kwenu pipö punton.

⁴⁶ “Kangemecha akïmïnecha pungköcha löwïr.

⁴⁷ Kakitupucha kong nyarïl nko kiwurat nyo kïmitecha ye nko nyökoryö.

⁴⁸ Kalokan kïtörengwanïn lok cho rotöy le pögho lalwa akwompö kinyarat nyo pö piköchan.

⁴⁹ “Törengwanïn lok nyo möngötönye,

⁵⁰ ntökïtenö kïtopönunö ECHOTYON yïm akïsïwecha kemi ngwïny.

⁵¹ Köngwonchanïn nyoman, wölo kikinyarilta kor ompö kanasyantenyan.

⁵² “Kinamenanïn pung ngöghöp le tarit akureyanïn chane kwïle.

⁵³ Kiwirchanïn chane pïrïm otini kitosöpan akïkara koghïn kuti pïrïmponay.

⁵⁴ Kïmach kulumanïn pögh möt ononchan kegh lö, ‘Nkï kyameghan.’

⁵⁵ “Kyokurinyi, we ECHOTYON, otini kyomitan pïrïm to,

⁵⁶ kilïmaninyi otini kyokurinyi lö, ‘Sörwante.’

⁵⁷ Kingwïnchaninyi ailenchanïn, ‘Mewoghisyö!’

⁵⁸ “Kiporyewaninyi, we Echotyon, aisörï söpontönyan.

⁵⁹ Kisïwenyi, we ECHOTYON, ghöyin nyo kighwanïn pungköchan, sötwo nyu ngalechu aikany kïrumï lö motïngönye lelut.

⁶⁰ Inkïtönyi wölini reytonanïn pungköchan nko tötutkökwa cho mököy kïrïmanïn.

⁶¹ “Kelïmanyi nyinte, we ECHOTYON lö kemwaghanïn chane ainkïtönyi tötutkökwa cho mököy kïrïmanïn.

⁶² Ngölonenanïn chane akïwökanïn kwimön.

⁶³ Tumenanïn chane kïyeköy akwimönöy.

⁶⁴ “Tökyinö chane, we ECHOTYON ompö ghoyïn nyo kigha morikwa.

⁶⁵ Nya kïkwarir mïkuliskökwa aichïp chane.

⁶⁶ Yonotena chane ompö nörekyengu aitïgh kuwonyegho ngwïny lödo.”