LOK 1 - PIPÏLIA

Sönönöto Yerusalem

¹ Wechï kalïkwï kïratyan kanasyanta Yerusalem nyo kimangate! Kikonyïtöy nyinte ngwïnya kïmïkul kanasyantanoni, wölo karkegh ye nyu nyinte nko korka nyo le mïsïk. Ki kanasyan Yerusalem nyo konyïtote ompö kanastin löwïr kalïkwï ye sekeyon!

² Karir nyinte nyoman kïyech, törenguno lok mötongwechi, möminye kongenyi ompö akong nyo köngötï tökïsaghsagh nyinte. Kilïs nyinte kongotichi löwïr akïwöghökisyö kïlïkwï pung.

³ Kakiwuw pipö Yuda kïpa pïnotön, Kapa nko kireyat nko sekeynön nyo gha! Kapa kïmang kwenu punton amelö mi wölo nyorchini kimïny. Kayon pung chane ntökïnam amelö mi wölo chïwïtoy.

⁴ Kisyonï ortïna cho petöy kugheghöy Sayon* puryö chi nyo weröy ortïnechoni osiswo ichontin ompö Kö pö Tororöt.* Möminye chi nyo kïsïwechini kukotichi, mi tïsichi lok ompö kiwongunöt. Kakichutsötö tipichi kwam nyarïl. Mi Sayon ngonïn nyo mamïnïng.

⁵ Pöytoy nyinte pungkachi, akï pung cho kisïch perur ompöwölo kechop kong ECHOTYON nyinte ompö ngokichi cho chang cho kigh kanam pung monechi akïrang kïpa wölo low.

⁶ Kikupotö ororyö Sayon nyo kitïng tagh. Karkegh pöytoghichi nko cheptirkichöy cho puryö wölo oketïyi. Mötïngcha owesyö ato pertegho pich cho mi sakas.

⁷ Kenan Yerusalem osiswo pöghisyö nyo kipö tagh otï kalïkwï kïratyan le nyï, Kapka pung kïnam nyinte amelö mi nyo kingwïn kïsörï nyinte, kïroröchï pung otini kikïrïnta nyinte.

⁸ Kigh Yerusalem ngokï cho ghach nyoman, kïlenyona kalïkwï Sïmnyon Kisas pich löwïr cho kikonyïtöy nyinte ompöwölo kisïwa chïrutyenyi. Loköy akïkörto konyichi ompö arasï.

⁹ Körumï sïmnyontenyi lötok, melö kiyang kinyaratenyi nyo pïnï yi. Kïlenyona kipït ompö or nyo gha nyoman puryö chi nyo soghsoghöy nyinte Kirirchï ECHOTYON kïlentöy, “Kaman nyarïl, sörwonte we ECHOTYON ompöwölo kalotanïn pung.”

¹⁰ Kasara Yerusalem pungkachi mökosyengwa lömïs nyo kitigho kegh kitopön pipö punton kïlïtöy Kö pö Tororöt wölo kitagha ECHOTYON chane kïlïtöy.

¹¹ Kiriryö pikachi ompö nyarïl nyo wow otini kisïngöy kïyörchini kegh omisyö. Kitötö mökosyengwa atökïnyorï omisyo tömömeghö Riröy Yerusalem kïlentöy, “Rosante we ECHOTYON omitan tangany!”

¹² Akïrirchï chi anka tïkwïl nyo kiwetöy arenyi kïlentöy, “Ayo, moyongekwanye so kïgh? Arosïtene köny! Ngo nyo kikïnyorï nyarïl nyo lata nyï konyorunan ECHOTYON ompö asispa nörekyenyi nyo ngwan?

¹³ “Kityorunö nyinte ma parak nyo kipelanïn olïmchan kegh ko, kïrat ngöghöp nyo kinamanïn kel awiran to Akïpïstanïn nyo kyaryalta, amïgh, awongwï ompö kichïr kwimön.

¹⁴ “Kisup Echotyon ngokichan löwïr akuwusö katïnyan kutunganïn le nyayma Kipïsyanïn ECHOTYON mori punkachan cho kimokönganye ompö poryot.

¹⁵ “Kisas Echotyon nyökon pö piköchan cho pö poryot, akïyonï lïk nyo kingwïn kïpar piköchan cho le chumwak Kitïghotïgh piköchan cho pö Yuda le matay cho kïtïgho könö.

¹⁶ “Nka nyu nyoni kïgh nyo keghanïn arir kariran kïnyïghitanïn lok kong möminye chi soghsoghanïn anta nyo kilanïn. Mökïminye kïgh nyo könöy monechan ompöwölo karïntanïn punyontenyan.

¹⁷ “Koghïtan ante Sayon ewunechu, wölo puryö chi nyo kengarakanïn kökur ECHOTYON pöröriskachan löwïr kïpka kïporyeghenanïn kalïkwan ante Yerusalem kïgh nyo le sïmnyon ompö tawungwa.

¹⁸ “Wölo pö man ECHOTYON, ompöwölo kyapenyan ngalechi. Wölo aterane akwa löwïr cho omi woptin löwïr, arose ngwonïn nyï omitan. Kikïrang monechan, tipi nko werkö, kapa le pïnot koros cho lowöch.

¹⁹ “Kyokurön kongot kungarakanïn wölo kilïsanïn chane. Kimeghyö tïsichan nko poy cho ngöghomöch ompö ortïna kanasyan, otini kiyörchinotoy kegh omisyö mömeghö.

²⁰ “Topöne köny chopatenyan, we ECHOTYON mi söpontönyan nyarïl nyo wow nyoman! Kewonyanïn por lökïr akwompö ngokichan mito pörchö ortïna kanasyan mi megha kömöy nko kichïr kestoni tïkwïl.

²¹ “Tere riratenyan, puryö chi ompö akonga nyo ngwïnöy kïsoghsoghanïn. Kingörekyö punkachan otini kilïm lö kipkanïn ECHOTYON nyaril. Kanya kwitï asis nyo kiyomisönyi lö orwokyini pich aigh punkachan kïnyorï nyarïl le ani.

²² “Tönö chane sitöt ompö ghöyityengwa kïmïkul Chopa kong chane le wölo kichoptaninyi ompö ngokichan omitan sönönöt nyo mamïnïng kiwonyanïn mïkulögh lömïs.”