LAWIN 9 - PIPÏLIA

¹ Nyini kit asisto mut nko sömök, kïkur Musa Aron nko werkachi nko poyi Israel

² akïlenchï Aron, “Chenga ngaryan kïlïkwï ropöwontengu nyo pö ngokï nko makal kïlïkwï amörostöngu nyo kïpelöy cho lïpopöch aitö ECHOTYON.

³ Atolapay imwochï pipö Israel kïcheng kwagha kïlïkwï ropöwonto ngokï akïcheng mogh nko wawa akïtïng köny akonga kwodeny akïlïpopöch kïlïkwï amöros nyo kïpelöy.

⁴ Akïcheng egh nko makal kïlïkwï ropöwonto pöghisyö, ompö ECHOTYON nko ropöwo pagh cho kikikulkulyö nko mwagh. Ompöwölo ngwïnchinokwa ECHOTYON asisete.”

⁵ Kwip chane tïkuchay kömwochï Musa kutang tawu Ema nyo mi ECHOTYON,* atolapay kïpka pipö Israel löwïr kïsagh ECHOTYON.

⁶ Kïlenchï Musa chane, “Nka nyete kini kimwowokwa ECHOTYON agha, atökungwïnchokwa ororyenyi.”

⁷ Kïlenchï Musa Aron, “Nyonö ato kïpelo amöros ateroptena ropöwonto ngokiku nko amöros nyo kïpelöy, atelinyenö nko ECHOTYON nyinte nko piköku, lenyini kimwa ECHOTYON.”

⁸ Kïlenyona kungwïn Aron ato kïpelo amöros akïyeng ngaryantanay le ropöwonto ngokichi.

⁹ Kwipï werkachi kisönkö kutö nyinte, kulut morïnenyi akïnyïra kuyo ato kïpelo amöros atolapay kïmïlchï kisönkö cho köngötï kelyo ato kïpelo amöros.

¹⁰ Kïpel sunetchay ompö ato kïpelo amöros nko söromoy nko koghogh wölo karam, lenyini kimwochï ECHOTYON Musa.

¹¹ Kïcheng pentö nko sïre kïpela sanypa möngot.

¹² Kïyeng amörostanyi nyo kïpelöy. Kwonkoghchï werkachi nyinte kisönkö, kïcheng akwisö kïghömï ato kïpelo amöros.

¹³ Kwonkoghchï werkachi nyinte tanani amöros nyo kïpelöy, kïmi nko mötït atolapay kïpel panye ompö ato kïpelo amöros,

¹⁴ kïmwat mutïne nko kïpestö, atolapay kïpel ompö paraku amörostin walaka ompö ato kïpelo amöros.

¹⁵ Atolapay kutötö Aron ropöwontonay pö pich akïnömï artanay pö ngoki pich, kïyeng akutötö kïlïkwï ropöwon le wölo keda nyay pö tagh.

¹⁶ Kïchengwï amöros nyo kïpelöy akïropta lenyini mwoghöy kirurut.

¹⁷ Kïcheng ropöwo pagh, kïram römut akïpel ompö ato kïpelo amöros kïmi nko amöros nyo pö tökwoghö.

¹⁸ Kïyeng ngaryante nko makalu le ropöwonto pöghisyö ompö pich. Kwonkoghchï werkachi nyinte kisönkö, kwisö kïghömï ato kïpelo amöros.

¹⁹ Kïcheng Aron sunetkö nko tore nko siro mu nko sörömoykö kwodeny nko koghoghtö wölo karam,

²⁰ akukana choni töketweko kyakichoni, atolapay kïpel sunetkö ompö ato kïpelo amöros.

²¹ Kïcheng Aron töketwe nko kïpesöyi okumpö tagh akuwiswis ompö ECHOTYON le ropöwon, lenyini kimwa Musa.

²² Atolapay kïsyol Aron ewunyi kutang wölo mi pich akusoyön chane. Nyini nyu kiwany kïropta ropöwonto ngokï nko amöros nyo kïpelöy nko ropöwonto pöghisyö akïrökwï ngwïny.

²³ Kïwö Musa nko Aron kïlïtöy Ema nyo mi ECHOTYON. Nyini kilïtu sany kusoyön pich. Kïsïwa pich ororyo ECHOTYON.

²⁴ Kïchïnuna ma wölo mi ECHOTYON akuwany amöros nyo kïpelöy nko sunetkö cho kömi ato kïpelo amöros. Nyini kisïwa pich kuteghyö ompö ngörekyö akïkïtïng ompö konyït.